FESUOKNA 23
23
Indikna le felna
1 #
Ex 20.16 “Thuthang indiknaw chu hril dar naw la, hrietpuitu felnaw ni dingin mi rilo inthlawppui naw rawh.
2Thil suol thaw dingin mipui chu i zui ding a ni nawh a; indikna keikâwi dinga mi tamna tieng tienga ṭhangin thubuoiah hrietpuitu i ni ding a ni bawk nawh;
3 #
Lev 19.15 mi pasie khawm chu a thubuoiah i ditsak bîk ding a ni nawh.
4 #
Dt 22.1-4 “I hmêlma bâwngchal amanih, sabengtung fe hmang ding în tuokpui chun, ama kuomah i hung ṭhuoi kîr ngei ding a nih.
5Nangma theidatu che sa- bengtung chu a phurrik hnuoia zâlin, insuo dinga i ṭhangpui ṭul a ni chun, ama chu în suopui ngei ding a nih.
6“I mi pasie thubuoi rêlnaah indikna în hmang ding a ni nawh.
7 #
Ex 20.16; 23.1 Hêkna indik nawa inthawk chu insiekieng dai la, pawitâwklo le mi fel chu that naw rawh, a thiemnaw chu thiem kân changtir âwm si nawh a.
8 #
Dt 16.19 Chun, thamna i lâk ding a ni nawh, thamna chun hmutheina nei- hai khawm an mit a sukdel a, mi fel thuhai khawm a keikâwi hlak sih a.
9 #
Ex 22.21; Lev 19.33,34; Dt 27.19 Hnam dang chu i nêksâwr ding a ni nawh; nangni khawm Aigupta ramah hnam dang in ni kha hrein, hnam dang lungril chu in hriet sih a.
Kum sari kum le Ni sari ni
10 #
Lev 25.1-7 “Kum ruk sûng chu i ramah chi tûng i ta, chu sûng chun a rahai chu la khâwm i tih;
11kum sarinaa ruok chun in- châwltirin inumtir ṭawk ṭawk i tih, i mi pasiehaiin an fâk theina dingin le, an mâksanhai chu ramsahaiin an fâk theina dingin. Chuong ang bawkin, i grêp huonhai le i oliv huonhai chu thâwng i tih.
12 #
Ex 20.8-11; 31.15; 34.21; 35.2; Dt 5.12-15 Ni ruk sûng chu i sin thâwng i ta, ni sari ni ruok chun i bâwngchal le i sabengtung khawm chu an sâwldam theina ding le, i ina pieng i siehlawnu naupa le hnam dang mi khawm chu an insukhar theina dingin i châwl ding a nih.
13I kuoma ka hril ta po po hi pawisa la, pathien danghai hming hrim chu lam naw la, i baua inthawkin hriet khawm ni bawk naw raw se.
Ruoi kawng thumhai
(Ex 34.18-25; Dt 16.1-17)
14 #
Ex 34.22-24; Lev 23.1-44; Dt 16.1-17 “Kum khat sûngin ka kuomah ruoiṭhena ṭum thum i nei ding a nih.
15Chawl ṭhanglo bei ruoi i nei ding a na, ni sari sûng chawl ṭhanglo bei fâng i ta, thu ka pêk ang cheha, Abib thlaha hun ka ruotpêk che huna khan (chu thla chun Aiguptaa inthawkin i hung suok a ni sih a) chun, tukhawm ka hmaah kut ruokin an hung inlang ding an nawh.
16Loa i chîng i sininrimna ra hmasahai sîk hunah Busîk ruoi le, kum tâwpah loa inthawka i sinthaw rahai po po i lâk khâwm vawng pha Pâwltlâk ruoi i nei bawk ding a nih.
17Kum khatah ṭum thum pasal po po LALPA Pathien hmaah an hung inlang ding a nih.
18 #
Ex 12.10; 34.25; Lev 2.11; 7.15 “Ka inthâwina thisen chu chawl ṭhang leh în hlân ding a ni nawh a; ka ruoiṭhena sathâu chu zânkhawvâr, zîngkâr chenin a um zing ding a ni bawk nawh.
19 #
Ex 22.29; 34.26; Dt 26.2-11,14 I hnuoi ra hmasatak laia a ṭha tak chu LALPA i Pathien ina chun i hung lâk ding a nih. Kêlte chu a pui nênetuiah i suong ding a ni nawh.
Israelhai ṭhuoi dinga Lalpa vântirko tira um chu
20“Ngai ta, i lampuia enkawl ding che le, hmun ka buotsaia chun ṭhuoi ding chein i hmaah vântirko ka tir a nih.
21Ama chu pawisa unla, a râwl chu ngai unla, suklungsen naw ro; ka hming chu amaa chun a um a, in bawsietnahai chu a ngaidam naw ding cheu a ni sih a.
22Nisienlakhawm, ama râwl chu i ngai tak tak a, ka hril po po hi i thaw chun, i hmêlmahai ta dingin hmêlma nîng ka ta, i khingpuihai ta dingin an khingpui nîng ka tih.
23Ka vântirko chu i hmaah fêng a ta, Amor mihai le, Hit mihai le, Periz mihai le, Kanaan mihai le, Hiv mihai le, Jebus mihai rama chun ṭhuoi lût a ti che; chun, anni chu tan thlâng ka tih.
24An pathienhai kuoma chun i kûn ding a ni nawh a, an rawng khawm i bâwl ding a ni nawh a, an sin i thaw ding a ni bawk nawh; anni chu peithla letdêr i ta, an milimhai chu suknâwi vawng i tih.
25LALPA i Pathien rawng chu bâwl i ta, i tui le beia khawm mal sâwmpêk ka ti che; chun, nangmaa inthawkin natnahai chu la hmang bawk ka tih.
26“I ram sûngah ching le mâni nau ṭhe tukhawm um naw ni hai a, i dam sûng nihai chu sukkim ka tih.
27Ka ṭitumna chu i hmaah tir ka ta, mi an kuoma i hungna dinghai chu sukbohmang ka ta, i hmêlmahai chu hnung innghat ding chein siem ka tih.
28I hmaah khuoi tûrnei tir ka ta, chuongchun, Hiv mihai, Kanaan mi- hai, Hit mihai chu i hmaha inthawkin hnawt suok an tih.
29I hmaha inthawkin kum khat sûngin hnawt suok vawng naw ning, chuong naw chun ram chu râusan nîng a ta, ram sahai i chungah hung ṭuong rawi an tih.
30I hung pung a, ram chu i hluo thei zet hmakhat chu anni chu tlawmte têin i hmaha inthawkin hnawt suok hret hret ka tih.
31Tuipui Sena inthawka Philistin tuipui chen le, thlalêra inthawka Euphrates vadung chenin i ramri chu khang ka ta; a ram hluotuhai chu i kutah ka pêk ding che a ni sih a; chun, nangin i hmaha inthawkin hnawt suok i tih.
32“An pathienhai leh amanih, anni leh amani khawm thuthlung hrim i siem ding a ni nawh.
33I ram sûngah an um ding a ni nawh a, chuong naw chun ka chungah insuksuoltir rawi an ti che; an pathienhai rawng i bâwl chun, i ta dingin châng a ni ngei ngei ding a ni sih a, tiin” a tih a.
Currently Selected:
FESUOKNA 23: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
