THUHRILTU 10
10
Indik nawna hnungthuolhai chu
1Tho thihai chun rim inhnik siemtu hriek chu rim thu an innamsuoktir a.
Chuong ang bawk chun, invêtna chite chun varna le inzâkaina chu a suksietpêk.
2Mi var lung chu a changtieng pangah a ngha a,
Mi invêt lung chu vawitieng a ngha.
3Anih, mi invêt chu lampuia a fe laiin,
A hrietthiemna chun ân hlawsamtir a;
Mi tin kuoma chun invêt a ni chu a hril hlak.
4Rorêltu lungril chu i chungah a tho chun,
I umna hmun chu mâksan naw la;
Intuklûtna hin lungninawna nasatak chu a sukrê sih a.
5Thil ṭha naw nisa hnuoia hin ka hmu chu a um a;
Rorêltua inthawk thil indik lo suok ang tak chu;
6Invêt chu insâng nasataka siein a um a,
Hausa chu hmun inhnuoia a ṭhung si hai hi.
7Siehlawhai chu sakawr chunga chuonga,
Lal nauhai chu hnuoia kea lâwn ka hmuh a.
8Khur chotu chu chutaka chun tlâng a ta,
Dâi nêrâwngtu chu rûlin chuk bawk a tih.
9Lung keilûttu chu suknatin um a ta,
Thing chêkkhawitu chu chutak- a chun sukṭitin um a tih.
10Thîr chu a mâwla, miin a sîr chu a tâtngei naw chun,
Hrâtna tam lem a hmang a ṭûl a;
Nisienlakhawm, hlawtlingna ding chun varna a ṭhangkai.
11Dâwivêt a ni hmaa rûl chun a chuk si chun,
Rûl dâwivêttu ta ding chun ṭhangkaina a um dêr nawh.
12Mi var baua thuhai chu a zainêm hlak a,
Mi invêt hmûrhai ruok chun ama chu lem a tih.
13A baua inthawka thu hung inṭanna khawm chu invêtna a na,
A thuhril tâwpna khawm chu intlâwkna pawitâwk thei a nih.
14Mi invêt khawma thuhai a sukpung a,
Mihriem chun ieng am a um ding a hriet nawh,
Ama hnunga chun ieng am a um ding ti tuin am ama chu hril thei a ta?
15Invêt sininrimna chun ama chu a suklungzîng a,
Khawpuia fe dân khawm a hriet si nawh a.
16Aw ram, i chung a rik! i lal chu naupang a na,
I rorêltuhaiin zîngkâr ruoi an ṭhe hlak si a.
17Aw ram, i lal chu mi ṭhahai naupa a na,
I rorêltuhai chun inruina ding el ni loa, hrâtna dinga
A hunbi taka an fâk lai chun i va hlim de!
18Zawmthâwtnaa chun inchung chu a chim a,
Thabona kuthaia chun in a far.
19Ruoiṭhena chu innuina dinga siem a na,
Uoin chun nun chu a suk- lâwm a;
Tangka ruok chun iengkim a thaw thei.
20Lal chu ṭawngsie inphur naw rawh, ngaituona khawmin;
I khum pindana chun mi hausa chu ṭawngsie inphur bawk naw rawh;
Chunga vate chun râwl rî chu phur a ta,
Chuong thla neihai chun thu chu hril rawi an tih.
Currently Selected:
THUHRILTU 10: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
