TITAS 1
1
1Paul, Pathian thimmi hna zumhnâk ning le Pathian-ṭihzahnâk in biatak hngalhpinâk tlamtling he Pathian caah ṭemmi sal le Jesuh Krih Lamkaltu ka si. 2Cân hramthawk hlan in a rak kamh cangmi zungzal nunnâk ruahchannâk kha lih a chim kho lomi Pathian nih a cân hmân teah, 3kan Khamhtu Pathian nawlpêk ningin ka sinah a bia chimnâk thawngin a langhter. 4Titas, â khatmi kan zumhnâk i kafa taktak, Pa Pathian le Bawipa Jesuh Krih kan Khamhtu sinin zângfahnâk, velngeihnâk le daihnâk na sinah um ko seh. 5Hiruangah Kret tikulh ah kan chiah ta, cucu lîm lomi thil kha ningcang tein narak tuah i nawl kan pêk bangin khua kipah upa kha na rak chiah hna nâkhnga- 6mi pakhat khat kha sawiawk umlo, nupi pakhat ngei, zumhtlâk, fale nomhhnaihnâk le ningcang loin khua a sami an si lo ahcun upa rian ṭuan hna seh. 7Zeitintiah kawhhran hotu cu Pathian chawkengtu a si caah, sawi awk um lomi a si hrimhrim awk a si, mahnawl ummi, thinhun fawi, misurhang-duhtukmi, mi velhhmang, chawva ah hâkkaumi an si awk a si lo, 8asinain conglomh thiam, ṭhatnâk duhmi, lungfimmi, a dingmi, a thiangmi le amah le amah â uk khomi an si awk a si, 9cawnpiak a rak si cang bangin zumhtlâk bia fek tein â tlaihmi a si lai, cuticun a dikmi cawnpiaknâk in mi a chimhhrin khawh lai i elhnialtu kha an lung a pemter khawh lai. 10Zeitintiah nawlngai lomi duhpauh in biachim hmang le hlengtu tampi an um, a hlei in cuarpartanmi hna chungin an si, 11cuhna nih chawva ningcang loin an hmuhnâk dingah chim loding tiang anchim i chungkhar ningin an hlenmi zong an um, cuhna cu ankâ huhpiak hrimhrim ding an si. 12Anmah profet hna lak i pakhat zong nih, “Kret tikulh chungmi hna cu mi lihchim a sualmi sahrang bantuk, mi thathu mi pawkau an si,” tiah a ti kha. 13Hi hngalhtermi hi a dikmi a si, Cucaah zumhnâk dik ah an um khawh nâkhnga fak piin si hna, 14biatak mer takin Judah tuanbia le minung nawlpêkmi biapi ah a ruatmi hna bia kha zeiah rak rel hna hlah. 15Mithiang caah thil vialte a thiang, asinain mithûrhnawm le zumlotu caah a thiangmi zeihmanh a um lo, an ruahnâk le an chiaṭha-hngalhnâk tiangin a thûr cang. 16Pathian a hngal ngaimi in an i phuang nain tuahsernâk in an hlawt tawn, fih a nungmi, nawl a ngai lomi le thilṭha tuahnâk ah a tling lomi an si.
Currently Selected:
TITAS 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
