ROM 8
8
1Cucaah atu cu Krih Jesuh ah a um i thisa duhnâk zul loin, Thlarau duhnâk a zulmi hna caah cun thiamlocoternâk zeihmanh a um ti lo. 2Zeitintiah Krih Jesuh nunnâk Thlarau nawlbia nih sual le thihnâk nawlbia chungin a ka chuahter cang. 3Zeitintiah thisa zângder ruangah nawlbia nih a tuah khawh lomi kha, Pathian nih a Fapa kha sual thisa bantukin, sual ruangah a run thlah i thisa ah a ummi sualnâk cu thiam lo a coter, 4thisa duhnâk ah nung ti loin, Thlarau duhnâk ah kan nun i nawlbia nih tuahter a timhmi dinfelnâk kha kanmah ah a tlin khawh nâkhnga caah a si. 5Zeitintiah thisa duhnâk i a nungmi hna nih thisa duhnâk lawng an ruah i Thlarau duhnâk i a nungmi nih Thlarau duhnâk kha an ruah tawn. 6Thisa duhnâk lawng ruah cu thihnâk a si. Thlarau thil ruah cu nunnâk le daihnâk a si. 7Zeicatiah thisa lungput nih Pathian a ralchanh i Pathian nawlbia tangah um a duh lo, a um zong a um kho lo. 8Cuticun thisa in a ummi hna nih Pathian an lawmhter kho lo. 9Asinain Pathian Thlarau nanmah i a um taktak ahcun, thisa i ummi si loin, Thlarau i ummi nan si. Mizei pauh Krih Thlarau a ngeih lo ahcun Amah ta an si lo. 10Cun Krih cu nanmah i a um ahcun, pum cu sual ruangah a thi i Thlarau tu cu dinnâk thawngin a nung. 11Asinain thihnâk in Jesuh a thawhtertu Thlarau nan chungah a um ahcun, thihnâk in Krih a thawhtertu nih khan, nan chungah a ummi Thlarau thawngin a thi khomi nan pum cu a nunter lai. 12Cucaah u le nau hna leiba kan ngei, thisa leiin thisa phung i nun awkah a si lo. 13Zeitintiah thisa leiin nan nun ahcun nan thi lai, asinain pumsa duhnâk kha Thlarau in nan thah ahcun nan nung lai. 14Zeitintiah Pathian Thlarau hruaiin a ummi vialte cu Pathian fa an si. 15Zeitintiah ṭihnâk le sal sinâk thlarau nan co lo i fa sinâk Thlarau tu nan co. Amah thawngin, “Abba, Kapa” tiah kan au tawn. 16Thlarau hrimhrim nih kanmah thlarau he Pathian fa kan si kha a kan hngalhter, 17fa kan si ahcun, ro cotu kan si. Pathian ro cotu Krih ro copi hawi kan si, Amah kan tuarpi taktak ahcun a sinah thangṭhat kan si ve lai. 18Zeitintiah atu cân i temtuarnâk hna hi hmailei i langhter ding sunparnâk he cun tahchunh tlâk ah ka ruat lo. 19Zeitintiah Pathian fale langhter an si lainâk kha sermi thil vialte nih hngahhlang ngai le i ruahchan ngaiin an cuan. 20Zeitintiah sermi thil vialte cu rawhralhnâk tangah umter an si. Anmah thu si loin, A umtertu nih ruahchanh nâkin a um termi an si. 21Zeicatiah sermi thil vialte zong rawhralhnâk chungin luatter an si lai i a liannganmi Pathian fale zalonnâk ah an lut ve lai. 22Zeitintiah sermi thil vialte hi atu tiangin aihramnâk le nau nganfah tuarin an um tiah kan hngalh. 23Culawng hmanh si loin, kannih Thlarau theitlai a ngei cangmi zong hi kan pumsa tlanhnâk le fa i canter lai cu hngahhlang ngaiin kan hngak i kan hrum ai ve ko. 24Zeitintiah ruahchannâkin dahkaw khamh kan si cu. Asinain hmuh khawhmi ruahchannâk cu ruahchannâk a si bal lo. Zeitindah mi nih a hmuh cangmi cu â ruahchan khawh lai? 25Kan hmuh rih lomi khi kan i ruahchan ahcun lungsau ngaiin kan hngak tawn. 26Cubangin Thlarau nih kan thazâng dernâk ah a kan bomh tawn. Zeitindah thla cam awk a si, ti hmanh kan hngalh lo cân ah Thlarau nih hmurkâ in chimkhawh lomi aihrâm nâkin kan caah thla a kan campiak tawn. 27Cubangin Pathian duh ningin mithiang hna caah a halpiak tawn caah lungthin a zohtu nih Thlarau lungput cu a hngalh tawn. 28Cun Pathian a dawtu amah nih a duhning i a kawhmi hna caah zeizong vialte hi a ṭha leiah a tuahpiak hna, ti kha kan hngalh. 29Zeitintiah a fapa cu unau tampi lak i fater a si khawh nâkhnga, a hngalh chungmi hna cu, Amah fapa bantuk i um dingah a khaukhih diam cang hna. 30Cu hlei ah a khaukhihmi hna cu a kawh hna i a kawhmi hna cu thiam a coter hna, thiam a cotermi hna cu a thangṭhat hna. 31Hi kongah hin zeitindah kan chim lai? Pathian kan leiah a `an ahcun ahonihdah a kan doh khawh lai? 32A fapa hmanh zuah loin kan dihlak caah a kan pêk ahcun, zeitindah thil vialte zong Amah sinah manlo tein pêkchih loin a kan um hnga? 33Pathian thimmi cu ahonihdah sual an puh khawh hna lai? Thiamcotertu kha Pathian a si i 34ahonihdah thiamlo a coter lai? A thimi kha Krih a si, culawng hmanh si loin, a tho ṭhân i Pathian orhlei kamah um in a kan nawlpiaktu cu amah ṭhiamṭhiam kha a si. 35Krih dawtnâk chungin zeinihdah a ka ṭhen khawh lai? Harnâk nih maw, ngaihchiatnâk nih maw, serhsatnâk nih maw, pâmnâk nih maw, taklawng umnâk nih maw, ṭihnung nih maw, vainam nih maw a kan ṭhen hnga maw? 36“Zeitintiah Nangmah ruangah nitlâk tein thah kan tong, thah ding a simi tuu bang i ruah kan si” tiah ṭialmi bang khan. 37Ṭhen hlah e! Cu thil vialte hna cu a kan dawtu thawngin teitu hna nâkin teitu kan si deuh. 38Thihnâk le nunnâk, vanmi le buainâk, thiltikhawhnâk, thil um liomi le thil um laimi, 39sannâk le thuhnâk, sermi thil dang vialte zong nih, kan Bawipa Jesuh Krih i a ummi Pathian dawtnâk chungin a ka ṭhen kho lai lo tiah fiang tein ka hngalh.
Currently Selected:
ROM 8: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
