ROM 7
7
1Asiloah ule nau hna, (nawlbia a hngalmi hna sinah ka chim lai) nawlbia nih mi a nun chung vialte a cungah nawl a ngei tiah nan hngal lo maw? 2Zeitintiah va a ngeimi nu cu ava nun chung vialte cu nawlbia nih ava ah a ṭemchih tawn. Asinain ava a thih ahcun ava i ṭemchih a simi phungin phoih a si. 3Cuticun ava nun lioah va dang a ngeih ahcun ṭangdang kai an ti lai; ava a thih ahcun, va phungin thlah a si caah, vadang a ngeih zongah ṭangdang kai a si lai lo. 4Cucaah ka ule nau hna, Krih pum ruangah nawlbia chungin nan thi cang; cuticun midang, thihnâk in thawhter Mi kha nan vat khawh cang i Pathian sinah theitlai nan chuah khawh cang lai. 5Zeitintiah thisa i kan um lioah khan, nawlbia nih a thawhtermi sual duhnâk nih kan pum ṭengnge hna ah thihnâk tiang a chuahpitu theitlai a chuahpi tawn. 6Asinain atu nawlbia chungin chuahter kan si cang i a kan ṭemtu kha kan thihtâk cang, cuticun ca i ṭialmi phunghlun si ti loin Thlarau tharin rianṭuantu kan si cang. 7Zeidah kan chim kun lai? Nawlbia cu sual a si maw? Si naisai hlah! Khatte lei khelin, Nawlbia um hlah sehlaw sual hi sual a si kan hngal lai lo. Nawlbia nih, ‘hngar hlah’ ti hlah sehlaw, ‘hngar’ hi sual a si kan hngal lai lo. 8Asinain nawlpêk hi sual nih cân rem ah a lâk i keimah ah duhnâk sual a phunphun a chuahter. Zeitintiah Nawlbia a umlonâk ah sual cu thi a si. 9Nawlbia loin ka rak nung tawn. Asinain nawlpêk a um le cângkâ sual â hlau i ka thi. 10Cun nunnâk ding i nawlpêk cu thihnâk tu a si kha ka hngalh. 11Zeitintiah sualnâk nih nawlpêk kha cân remah hmangin a ka hlen i nawlpêk kha hmangin a ka thah. 12Cucaah nawlbia cu a thiang, nawlpêk zong a thiang, a dik i a ṭha. 13Asiahcun thilṭha cu ka caah thihnâk a rak si maw? Si naisai hlah! Asinain sual, sual zia a langh khawh nâkhnga, thilṭha cu hmangin keimah ah thihnâk a phâkter, cuticun nawlpêk he ṭangṭi in sual sualning kha a fianter. 14Zeitintiah nawlbia cu thlarau lei thil a si. Kei tu cu thisa mi, sual sal i zuarmi ka si. 15Zeitintiah ka tuahmi zong hi zei a si ka theithiam lo. Tuah ka duhmi hi, ka tuah lo i ka huatmi tu ka tuah tawn, 16cuticun ka duh lomi kha ka tuah ahcun, nawlbia a ṭha tiah pompitu ka si. 17Asinain a tuahtu kha keimah ka si lo, ka chung i a ummi sual nih a tuahmi a si. 18Zeitintiah keimah ah (cucu ka thisa ah tinâk a si) ṭhatnâk a um lo ti kha ka hngalh; zeitintiah ṭhatnâk tuah duhnâk cu ka ngei, asinain zeitindah ṭhatnâk cu ka tuah lai ti kha a lam ka hmu lo. 19Zeitintiah ṭhatnâk tuah ka duhmi ka tuah lo, ka duh lomi Ṭhatlonâk tu ka tuah tawn. 20Ka duh lomi kha ka tuah ahcun, a tuahtu cu keimah si loin ka chung i a ummi sual nih a tuahmi a si. 21Cuticun hi nawlbia hi ka hmuh khawh cang, ṭhatnâk tuah ka duh lioah, Ṭhatlonâk ka sinah a um tawn. 22Zeitintiah ka chunglei minung cu Pathian nawlbia ah â lawm tawn. 23Asinain ka pum ṭengnge ah hin nawlbia phundang a um ti kha ka hngalh, cu nih cun ka ruahnâk nawlbia kha an ralchanh i ka pum ṭengnge i sual nawlbia a ummi sinah sal ah a ka hruai tawn. 24Maw, zângfah awktlâk ka va si dah! Hi thihnâk pumsa chungin ahonihdah a ka khamh khawh lai? 25Kan Bawipa Jesuh Krih thawngin Pathian sinah lawmhnâk bia ka chim! Cuticun ka ruahnâk nih Pathian nawlbia kha a rian i ka pumsa tu nih sual nawlbia kha a rian tawn.
Currently Selected:
ROM 7: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
