ROM 14
14
1Zumhnâk i zângdermi kha cohlang hna u, an lunghrinhmi thil kha al hna hlah u. 2Zeitintiah mi pakhat nih thil vialte eikho in â ruah, asinain zângdermi nih tisik anhnah lawng a ei. 3Zeizong vialte a eimi nih a ei lomi zomhtaih hlah seh, a ei lomi zong nih a eimi zomhtaih hlah seh, zeitintiah Pathian nih a cohlan veve ko hna. 4Midang sin-um a sawitu cu ahodah na si? A dirah siseh, a tlukah siseh, amah uktu sinah a si. Asinain amah cu dirter a si ko lai, zeitintiah Pathian nih a dirter khawh ko. 5Mi pakhat nih nikhat hi nidang nâkin sunglawi khun in a ruah. Midang pakhat nih ni vialte hi â khat dih ah a ruah. Cucaah mikip nih mah le ruahnâk cio ah ṭha tein ruat seh. 6Ni ultu nih Bawipa caah a ulh tawn, ulh khunmi a ngei lomi zong nih a ulh lo cu Bawipa caah a si. Eitu nih Bawipa sinah lawmhnâk bia a chim i Bawipa caah a eimi a si; cun a ei lotu zong nih Bawipa sinah lawmhnâk bia chimin a ei lomi a si. 7Zeitintiah ahohmanh mah caah kan nung lo i ahohmanh mah caah kan thi lo. 8Kan nun le Bawipa caah kan nung i kan thih le Bawipa caah kan thi. Cucaah kan nun ah siseh kan thih ah siseh Bawipa ta kan si. 9Zeitintiah Krih a thih i a thawhṭhannâk le a nun chan cu mithi le minung Bawi a si khawh nâkhnga caah a si. 10Asiah nang nih zeiruangahdah na unau na sawi? Zeiruangahdah na unau na serhsatnâk cu na langhter. Zeitintiah Pathian biaceihnâk ṭhutdanh hmaiah kan dih lakin kan dir te lai. 11Zeitintiah hitihin ṭial a si, “Ka nun bangin, khuk vialte ka hmaiah an i bil lai i lei vialte zong Pathian hmai ah an i phuang lai,” tiah Bawipa nih a ti. 12Cuticun kan dih lakin Pathian sinah kanmah kong cio kan chim te lai. 13Cucaah i sawi ti hlah u sih, aho pauh nih mah unau caah dawntu le tluktertu si lo kha i tim cio u sih. 14Zeithil pauh hi amah te long ahcun thianglo a um lo tiah Bawipa Jesuh ah fiang tein ka hngalh, asinain thianglo i a ruattu caah a thiang lo a si ko. 15Na eidin ruang i na unau a lung a fah ahcun dawtnâk lam na zul ti lo, tinâk a si. Krih nih a ca i a thihpiakmi kha na eidin nih hrawhpiak hlah seh. 16Cucaah ṭha nan timi kha mi thangchiat in um hlah seh, 17zeitintiah Pathian pennâk cu ei le din a si lo, dinnâk le daihnâk, Thiang Thlarau ah i lawmhnâk te hna hi an si. 18Cubantukin Krih riantuantu hna cu Pathian lomhmi le minung zong nih an cohlanmi an si. 19Cucaah daihnâk a sertu thil hna le midang thazâng petu a simi thil kha dawi hna u sih. 20Rawl ruangah Pathian rian kha hrawk hlah. Thil vialte hi an thiang taktak ko, asinain midang tluknâk ca i ei cu, a eitu caah sual a si. 21Na unau tlukrilhnâk ding le thazâng dernâk ding a si ahcun sa ei lo le mitsur hang din lo le zei thil pauh tuah lo hi a ṭhami a si. 22Zumhnâk na ngei maw? Pathian hmai ah ngei ko. A pommi kongah mah le mah sual â phaw lomi cu mi lunglawm an si. 23Asinain lunghrinh bu i ei cu, zumhnâk i a ei lo ruangah thiamlo a co cang, zeitintiah zeithil pauh hi zumhnâk in a si lomi cu sual a si.
Currently Selected:
ROM 14: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
