ROM 13
13
1Mikip an cung i nawlngeitu hna nawl tangah an um awk a si. Zeitintiah Pathian tel loin nawlngeitu an um lo, nawlngeitu hna hi Pathian ruahmi an si. 2Cucaah ahopauh nawlngeitu bia al cu Pathian ruahmi altu an si i altu hna cu dântat an tong lai. 3Zeitintiah uktu hna hi thilṭha a tuahtu caah ṭihnung an si lo, asinain misual caah ṭihnung an si. Nawlngeitu ṭih lo tein um na duh maw? Ṭhatnâk tuah law, an sinin thangṭhat na co lai. 4Zeitintiah anmah cu na ṭhatnâk dingah Pathian rianṭuantu an si. Asinain sualnâk na tuah ahcun, ṭih hna; zeitintiah vainam cu â put sawh sawh lai lo. Anih cu Pathian rianṭuantu, sualnâk a tuahmi cungah a thin a hung i phuhlamtu a si. 5Cucaah an thin hun lai ṭih ruang lawngah si loin, na chia ṭha hngalhnâk ruang zongah an nawl ngaihnâk tang i kun ding na si. 6Zeitintiah hiruangah hin ngunkhuai zong nan pêknâk hi a si. Cubantuk rian `uanpeng dingin Pathian rianṭuantu an si. 7Cucaah nan batmi vialte pe hna u, leiman pêknâk dingah leiman pe ulaw, ngunkhuai pêknâk dingah ngunkhuai pe u. ṭih awk ṭih ulaw, hmaizah awk hmaizah u. 8Pakhat le pakhat i dawt dah tilo cu lei i ba hlah u, zeitintiah midang a dawtu nih cun nawlbia cu a zulh dih cang. 9Zeitintiah nawlpêkmi hna, “Ṭangdang kai hlah,” “Lai nawng hlah,” “Fir hlah,” “Lih in biahngaltu va si hlah,” “Hngar hlah,” timi le a tângmi nawlpêk dang hna zong, “Nangmah nâ dawt bangin na inpa na dawt lai,” timi nih a fun dih. 10Dawtnâk nih inpa a fahter bal lo; cucaah dawtnâk hi nawlbia tlamtlinnâk a si. 11Cun atu hi â hngilhmi hna i hlauh cân a si kha nan hngalh bangin hihi tuah u, zeitintiah atu ah cun kan zumh hramthawknâk nâkin kan khamhnâk ni cu a nai cang. 12Zan hi a dih dengmang i khua a dei dengmang cang, cucaah khuamui tuahsernâk kha hlawnh in khua ceu thuam kha i hruk u sih. 13Chun i um bangin dawh tein um u sih. Zuri le hnahnok i um loin, hor le pumsa duhnâk tuah loin, buaibai le i hnahchuah loin. 14Bawi Jesuh Krih tu in i thuam ulaw, nan pumsa duhnâk tlinter dingin zeihmanh tuah hlah u.
Currently Selected:
ROM 13: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
