SÂM 144
144
1Ka Lungpi BAWIPA cu thangṭhat in um ko seh, ka kut hna hi raldoh a cawnpiak i ka kutdong hna hi dohning a cawnpiak. 2Ka duhdawtnâk le ka ralhruang, ka himnâk innsâng le ka khamhtu, ka phaw le ka zâmnâk, kami le hna ka tang i kun awkah aka teipiaktu. 3BAWIPA, minung hi zeidah a si i na hngalh tawn? Mi fapa zong hi zeidah a si i na lungkil ah na chiah? 4Minung hi thaw bantuk a si i a nun chung ni hna cu a lo zaumi thladêm bantuk a si. 5Maw BAWIPA, na van hna cu niamter in, rung ṭum tuah, tlâng hna khi tawng law, a khu a chuak lai. 6Nimtlau lekter law, annih cu ṭhek dih hna; na thal kha kap law, hrawk dih hna. 7Cunglei in na kut in banh hna law, ka ral hna kut in ka khamh, tilian lakah ka himter ko. 8Ankâ cu lihchimnâk a si i an orhlei kut cu diklonâk a si. 9Maw Pathian, nangmah thangṭhat in hlathar ka sak lai, tingtang hrihra ngeimi he nangmah thangṭhat in hla ka sa lai. 10Amah hi a si, siangpahrang hna sinah khamhnâk a pe i ṭih a nungmi vainam chungin a sal David a khamhtu cu. 11Ka ral, lih lawng te a chimmi le, an orhlei kut zong a dik lomi thil lawngte in a khatmi hna chungin ka khamh ko. 12Ka fapa le hna cu thlai bantukin zawkzawk in ṭhang hna seh law, ka fanu le hna zong siangpahrang in i ṭamhmi lung bang si ko hna seh. 13Kan rawl in khat hna seh law, rawl phunphun in khat ko hna seh; kan Tuu hna nih fa a thongthong in hring hna seh law, lo chungah a singsing in hring hna seh. 14Kan cawpa hna nih phur luaimai hna seh law, kan saṭil hna roktu le, lohtlau tertu um loin, khuachung zalam ah vansannâk aw um hlah seh. 15Cubantuk covo a cotu hna cu mithluachuak an si. BAWIPA Pathian ah â ngeihmi hna cu mi thluachuak an si.
Currently Selected:
SÂM 144: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
