SÂM 145
145
1Maw Siangpahrang, ka Pathian, kan cawisân lai. Na min cu zungzal in zungzal tiang ka thangṭhat lai. 2Ni fatin kan thangṭhat lai, na min hi zungzal in zungzal tiang ka thangṭhat lai. 3BAWIPA cu a lianngan i liannganngai i thangṭhat awk a si. A lianngannâk cu dothlat cawk a si lo. 4Chankhat hnu chankhat na tuahmi kha an thangṭhat lai, a lianngan ngaimi na tuahmi thil hna cu an hngalhter lai. 5Na lianngannâk le dawhnâk hi ka ruah lengmang lai, thilmak na tuahmi zong ka ruah hna lai. 6Mi hna nih na ṭhawnnâk le khuaruahhar thil hna hi an chim lai; kei zong nih na lianhnganning ka hngalhter hna lai. 7Na ṭhatnâk lianhnganning an hngalh zungzal mi kha an phuan hna lai, na dinnâk cu hla in an sak lai. 8BAWIPA cu zângfahthiam, zawnruahnâk in a khatmi, lungsaumi le vêlngeimi a si. 9BAWIPA cu mivialte cungah a ṭha, â dawhmi a vêl cu a sermi thil vialte cungah a um. 10Maw BAWIPA, na sermi thil vialte nih lomhnâk bia an in chimh lai. Na mi thiang hna zong nih an in thangṭhat lai. 11Na pennâk lianhnganning an chim lai i na ṭhawnnâk kong an i ruah lai. 12Minung fale hna sinah na tuahmi thil lianngan le, â dawhmi le liannganmi a pennâk hngalhter dingin. 13Na pennâk cu zungzal pennâk a si i na nawlngeihnâk cu chan vialte tiangin a hmun. 14BAWIPA nih a tlumi kha a tlaih tawn hna i a kunmi vialte kha a thawhter tawn hna. 15Mit vialte nih hngahhlang ngai in nangmah an in zoh i nangmah nih a cân te ah rawl na pêk tawn hna. 16Na kut na samh tikah, thilnung vialte duhnâk na tlinter tawn. 17BAWIPA cu a lamkip in a ding dih i a tuahmi thil pauh hi vêlngeihnâk an si. 18BAWIPA nih amah autu kha a naih tawn hna, biatak i amah autu vialte hna cu. 19Amah ṭihtu hna duhning cu a hlawhtlin ter lai, an aunâk aw theiin, anmah cu a khamh hna lai. 20BAWIPA nih amah dawtu vialte cu ṭha tein a kilven hna i misuaksual hna tu cu a hrawk dih hna lai. 21Ka hmurkâ nih BAWIPA thangṭhatnâk a chim lai, thisa vialte nih a min thiang cu zungzal in zungzal tiang an thangṭhat lai.
Currently Selected:
SÂM 145: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
