SÂM 119
119
1 BAWIPA nawlbia â nunpi i lamah â thurter lomi cu mithluachuak an si. 2Lungthin dihlak in amah kawltu hna le, a hngalhtermi bia a zultu cu mithluachuak an si. 3Sualpalhnâk zong an tuah lo i a lam kha an zulh tawn. 4Na phungbia kha teimâk chuah i zul dingin nawl nakan pêk. 5Maw, na phunglam zul dingin, ka lam hna hi fehter hei si sehlaw! 6Na nawlpêk vialte ka zoh tikah ningzak in ka um lai lo. 7Bia naceihmi a din zia ka hngalh fian tikah, a dikmi lungthin he kan thangṭhat lai. 8Na phunglam kha ka zulh hna lai; aw ka kaltâk hrimhrim hlah. BETH 9Mino nih zeitindah a nunning a thianter khawh lai? Na bia ṭha te i zulhnâk lawngin a thiang kho lai. 10Ka lungthin diklak in kan kawl, aw na nawlpêk pialtâk ding cu ka siang hrim hlah. 11Na cungah sualnâk ka tuah nâkhnga lo, na bia kha ka lungchung ah ka thuh hna. 12Maw BAWIPA, thangṭhat in um ko! na phunglam kha ka cawnpiak. 13Na hmurkâ chuak biaceihnâk vialte kha ka hmurkâ in ka phuan hna. 14Rumnâk nih a lawmhter hna bangin na hngalhtermi bia hna nih aka lomhter. 15Na phungbia kha ka ruah hna lai i na lam kha ka hlathlai hna lai. 16Na phunglam ah kâ lawm lai i na bia cu ka philh lai lo. GIMEL 17Na bia zul in ka nun khawh nâkhnga, na sal cungah ṭhatnâk tam piin langhter hrâm ko. 18Na nawlbia ah khuaruahhar thil hna ka hmuh khawh nâkhnga, ka mit hi ka auter hrâm ko. 19Vulei ah hin khual ka si; na nawlpêk kha ka thuh kanh hna hlah. 20Cân vialte i na biaceihnâk hngak in ka nunnâk hi a kuai hnik tawn. 21Mi ruamkai, chiatserhmi kha na sîk hna, na nawlpêk pialtâktu an si. 22Thangchiatnâk le nautatnâk hi ka sin in ṭhial, zeitintiah na hngalhternâk kha kâ cinken hna. 23Bawi hna zong ka kong ceih in an ṭhu, asinain nasal nih cun na phunglam kha a ruah tawn. 24Na hngalhternâk bia hna hi kâ lomhnâk le rem aka ruahpiaktu an si. DALETH 25Ka nunnâk hi leidip ah â benh i na bia ningin run ka hlau tuah. 26Ka lam kha kan hngalhter i nangnih naka leh; na phunglam kha ka cawnpiak. 27Na phungbia kha ka hngalhter law, na tuahmi khuaruahhar kha ka ruah hna lai. 28A rittuk mi ruangah ka nunnâk hi a tlum i na bia ningin ka ṭhawnter hrâm ko. 29A palhmi lam in ka ṭhial law, zângfahnâk in na nawlbia cu ka pe hrâm ko. 30Lam dik cu kâ thimcang i na biaceihnâk zong ka hmaiah ka chiah tawn. 31Maw BAWIPA na hngalhternâk kha kâ tlaih, ningzak in ka umter hlah. 32Na nawlpêkmi lam zulh in ka tli lai, zeitintiah ka lungthin hi na kauhter lai. HE 33Maw BAWIPA, na phunglam kha ka cawnpiak law, a dongh tiangin ka zulh lai. 34Hngalhthiamnâk ka pe law, na nawlbia cu ka zulh hna lai, asi ka lungthin diklak in ka zulh lai. 35Na nawlpêkmi lam kha ka zulhter ko, zeitintiah cucu kâ lomhnâk a si. 36Na hngalhternâk bia lei ah ka lungthin hi mer law, hakkauhnâk lei ah cun si hlah seh. 37San a tlai lomi thil kha zoh lo dingin ka mit hi mer law, na lam ah ka ṭhang ṭhân ko. 38Na sal sinah na bia fehter law, nangmah ṭihzah in a nung lai. 39Thangchiat ka ṭihnâk in ka mer ko, zeitintiah na biaceihnâk cu an ṭha. 40Zohhmanh na phungbia hna hi ka ngai, na dinnâk in ka ṭhang hrâm ko. WAW 41Maw BAWIPA, na velngeihnâk le na bia ningin na khamhnâk kha ka sin zongah phân ko seh. 42Cuticun aka thangchiattu kha ka leh khawh lai, zeitintiah na bia cu kâ bochan. 43Ka kâ chungin biatak bia kha ka lâkpiak dih hlah, zeitintiah na phunglam ah ruahchannâk ka ngei. 44Cuticun na nawlbia cu zungzal in zungzal tiang ka zulh khawh hna lai. 45Zalong tein ka nung lai, zeitintiah na phungbia kha ka kawl hna. 46Siangpahrang hna hmai zongah na hngalhternâk kha ka chim lai, ka zahpi hna lai lo. 47Kei nih cun na nawlpêk kha kâ lomhpi peng lai, cucu ka tlaihchanmi a si. 48Na nawlpêk leiah kakut zong ka thlir hna lai, cucu ka tlaihchanmi a si i na phunglam zong ka ruah hna lai. ZAYIN 49Na sal sin i bia cu philhhlah, cu thawng cun ruahchannâk naka ngeihter. 50Hihi ka harnâk ah ka hnangamnâk a si, zeitintiah na bia nih nunnâk aka pêk. 51Mi porhlaw hna nih anka diriam ngai ngai, asinain na nawlbia cu ka pialtâk hna lo. 52Maw BAWIPA, hlan lio na biaceihnâk kha ka philh hna lo, cucu ka hnangamnâk an si. 53Na nawlbia a kaltâktu misuaksual hna ruangah lung si lo ngai in ka um tawn. 54Ka khualtlawnnâk innah hin, na phunglam kha ka hla an si. 55Maw BAWIPA, zan zongah na min ka philh lo i na nawlbia zong ka zulh tawn. 56Na phungbia hna ka zulh ruangah, ka ta ah an i cang. HETH 57Maw BAWIPA, nangmah hi ka covo na si, na bia kha ka zulh hna lai tiah ka rak chim cang. 58Ka lungthin dihlak in na mithmaiṭha kan nawl; na bia ningin ka cungah vêl ngei ko. 59Ka lam hna hi ka ruah tawn, na hngalhternâk lei ah kake hi â mer. 60Na nawlpêk hna zul dingin, khulrang in kâ tim i ka rau bal lo. 61Misuaksual hna hrihrual in anka ṭem, asinain na nawlbia kha ka philh lo. 62A dingmi na biaceihnâk ruangah na sinah chim dingin zanṭim ah ka tho lai. 63Nangmah ṭihtu hna le na phungbia zultu hna hawikom ka si. 64Maw BAWIPA, vulei hi na vêl in a khat; na phunglam kha ka cawnpiak. TETH 65Maw BAWIPA, na bia ningin na sal hi ṭha tein na tuahpiak tawn. 66Biaceihnâk ṭha le hngalhnâk ka cawnpiak, zeitintiah na nawlpêk kha ka zumh hna. 67Harnâk ka tuar hlan ah cun ka tlau tawn, asinain atu na bia kha ka zulh. 68Nang cu na ṭha i ṭhatnâk na tuah, na phunglam kha ka cawnpiak. 69Miporhlaw hna nih keimah ralchanh in lih an ṭawn, asinain ka lungthin dihlak in na phungbia kha ka zulh lai. 70An lungthin cu sathau bangin an thau, asinain na nawlbia ah kâ lawm. 71Na phunglam cawng kho dingin harnâk ka rak tuarmi hna kha ka caah a ṭha. 72Sui le ngun thong tampi nâkin na hmurkâ chuak nawlbia cu ka caah a ṭha deuh. YOD 73Na kut in sermi le thomhmi ka si, na nawlpêk kha ka cawn khawh nâkhnga theihthiamnâk ka pe. 74Nangmah ṭihtu hna nih anka hmuh tikah, an i lawm lai, zeicatiah na bia ah ruahchannâk ka ngei. 75Maw BAWIPA, dik ngaiin bia na ceih, harnâk naka tuartermi zong kha, zumhtlâk in na tuahmi a si kha ka hngalh. 76Na sal sinah na bia ningin, na vêl le zângfahnâk cu ka hnangamnâk si ko seh tiah thla ka cam. 77Na velngeihnâk cu ka cungah langhter law ka nung kho lai; zeitintiah na nawlbia cu kâ lomhnâk a si. 78Miporhlaw kha ningzak in um hna seh, zeitintiah lih in diklo ngaiin anka buai ter; asinain na phungbia kha ka ruah hna lai. 79Nangmah ṭihzahtu hna le na hngalhternâk theitu hna nih keimah leiah i mer hna seh. 80Ka ning a zah nâkhnga lo, ka lungthin hi na phunglam hna cungah sawi awk umlo si ko seh. KAPH 81Na khamhnâk ngaiin ka nunnâk hi a ba, asinain na bia kâ ruahchan. 82Na bia ka hlathlainâk ah ka mit a fiang ti lo, “Zeitikahdah ka hna na ngamter lai?” tiah ka ti. 83Zeitintiah meikhu ngeuhmi saphaw thawl bantuk men ka si, asinain na phunglam cu ka philh hna lo. 84Na sal nunchung hi zeicandah a si lai? zeitikahdah aka serhsattu hna cungah bia na ceih lai? 85Na nawlbia bangin a um lomi miruamkai hna nih ka tlâknâk ah khor an cawh. 86Na nawlpêk mi vialte cu zumhawk an tlâk i annih nih cun diklo ngaiin anka serhsat, ka bawm ko. 87Lei cungin anka hloh cio mau, asinain na phungbia cu ka mertâk hna lo. 88Na duhdawtnâk bangin ka hlauhter hrâm ko, cuticun na hmurkâ chuak hngalhternâk kha ka zulh khawh hna lai. LAMED 89Maw BAWIPA, zungzal cain na bia cu vanah fehter a si. 90Zumhtlâk na sinâk cu chan vialte caah a hmun; vulei hi na fehter i a hmun. 91Ni hin tiangin narak ruahcia bangin an um peng, zeitintiah an dihlak in na sal an si dih. 92Na nawlbia hi kâ lomhnâk rak si hlah seh law, fahnâk ka in lio ah khan ka thi diam cang hnga. 93Na phungbia kha ka philh hrimhrim hna lai lo, zeitintiah cu hna hmangin nunnâk naka pêk. 94Nata ka si. Ka khamh ko sawh, zeitintiah na phungbia kha ka kawl hna. 95Misuaksual nih thah awkah anka bawh, asinain na hngalhternâk kha ka ruah hna lai. 96Ṭhat tlamtlinnâk zong nih donghnâk a ngei, asinain na nawlpêk cu a kau tuk hringhran. MEM 97Aw na nawlbia cu zeitlukindah ka tlaihchan, hihi nitlâk tein ka ruah. 98Na nawlpêkmi hna nih ka ral hna nâk in anka fimter deuh, zeitintiah ka sinah an um zungzal. 99Aka cawnpiaktu vialte nâk in theihthiamnâk tam deuh ka ngei, zeitintiah na hngalhternâk kha ka chunmang an si. 100Hlan lio mi hna nâk in theihthiamnâk ka ngei, zeicatiah na phungbia kha ka zulh hna. 101Na bia ka zulh khawh nâkhnga, Ṭhatlonâk lamkip ah kake ka chia hna lo. 102Na biaceihnâk kha ka pialtâk hna lo, zeitintiah nangmah hrim hrim nih naka cawnpiak. 103Na bia hi ka caah zeitlukindah an thlum! Ka kâ caah khuaihliti nâk in a thlum deuh. 104Na phungbia hna thawngin theihthiamnâk ka co cang, cucaah lam diklo hi ka huat hna. NUN 105Na bia cu kake caah meiin a si i ka lam caah ceunâk a si. 106A dingmi na biaceihnâk zulh awkah biakam in ka fehter cang. 107Fakpi in vansânter ka si, Maw BAWIPA, na bia ningin ka hlau ṭhân ko. 108Maw BAWIPA, lungtho tein ka hmurkâ chuak raithawinâk hi ka cohlân piak ko, tiah thla ka cam, na biaceihnâk kha ka cawnpiak. 109Ka nunnâk hi ka kutah a um zungzal, asinain na nawlbia cu ka philh bal lo. 110Misuaksual nih ka caah rap an chiah, asinain na phungbia kha ka pialtâk hna lo. 111Na hngalhternâk kha zungzal ro caah kâ lâk cang, zeitintiah ka lungthin lomhtertu an si. 112Na phunglam hna tuah awkah ka lungthin ka tlukter cang, zungzal in a donghnâk tiangin. SAMEK 113Lungrep ngei lomi cu ka huat hna, asinain na nawlbia cu ka dawt. 114Nangmah cu kâ thuhnâk hmun le ka phaw na si, na bia cu ka ruahchannâk a si. 115Nannih Ṭhatlonâk tuahtu hna ka kaltâk u, zeitintiah ka Pathian nawlpek lawng kâ cinken hna lai. 116Ka nun khawh nâkhnga na bia ningin ka dirter. Kâ ruahchannâk hi ningzak thilah canter sawh hlah. 117Ka tlai law, ka him lai. Na phunglam kha ka zulh peng hna lai. 118Na phunglam in a pialmi vialte kha na hlawt dih hna, zeitintiah an i hlennâk cu lih a si. 119Lei i misuaksual vialte cu ekpon bangin na hlonh hna, cucaah na hngalhternâk kha ka tlaihchan hna. 120Nangmah ṭih in ka thisa an ther i na biaceihnâk kha ka ṭih hna. AYIN 121Ding le dik ngaiin ka tuah tawn, aka lamhchihtu hna sinah kape sawh hlah. 122Na sal caah a fekmi bawmtu si law, mi ruamkai hna lamhchihmi ka siter hlah. 123Na khamhnâk le dinnâk bia ka cuanhnâk ah ka mit a fiang ti lo. 124Na sal cungah na velngeihnâk langhter law, na phunglam kha ka cawnpiak. 125Na sal ka si, na hngalhternâk bia ka theih khawh nâkhnga theihthiamnâk ka pe. 126Maw BAWIPA, hihi na caah cawlcangh cân a si, zeitintiah na nawlbia zeihmanhlo ah an canter. 127Cucaah na nawlpêk hna cu sui nâk in, asi, suithiangmi nâk in ka duh deuh. 128Cucaah zeizong vialte cungah na phungbia hna hi a dik tiah ka ruah, lam diklo kha ka huat hna. PE 129Na hngalhternâk cu khuaruahhar an si, cucaah ka nunnâk nih â cinken hna. 130Na bia fianternâk nih ceunâk a pêk i mi sawhsawh kha theihthiamnâk a pêk. 131Ka kâ ka ân i fak piin thaw ka chuah, zeitintiah na nawlpêk kha ka ngai tuk hna. 132Run ka zoh law, ka zângfah ko, na min a dawtu hna na zângfah tawn hna bang khan. 133Ka kephau hna hi na bia in fehter law, ka cungah sualpalhnâk kha nawl ngeihter hlah. 134Minung hna lamhchihnâk hmun in ka tlanh law, na phungbia kha ka zulh khawh nâkhnga. 135Na sal hi na hmai in run ceuh law, na phunglam kha ka cawnpiak. 136Mi nih na nawlbia an zulh lo caah, tiva bangin ka mitthli an luang. TSADE 137Maw BAWIPA, nang cu miding na si, na biaceihnâk zong an dik. 138Hngalhternâk na pêkmi kha an ding i zumhawk a tlâk. 139Ka ral hna nih na bia an philh cang caah, kâ zuamnâk nih aka hloh. 140Na bia cu a thiang tak tak, cucaah na sal nih a duh. 141Mi fate zomhtaihawk tlâk sihmanh ning law, na phunglam kha ka philh hna lo. 142Na dinnâk cu zungzal dinnâk a si, na nawlbia cu biatak a si. 143Vansânnâk le ngaihchiatnâk nih anka tlunhnawh, asinain na nawlpêk cu kâ lomhnâk an si. 144Na hngalhtermi dinnâk nih zungzal a nguh, theihthiamnâk ka pe law, ka nung lai. DOPH 145Ka lungthin dihlak in kan auh, Maw BAWIPA, run ka let law. Na phunglam kha ka zulh lai. 146Na sinah ka au, ka khamh law, na hngalhternâk kha ka zulh hna lai. 147Khuadei hlan in ka tho i na bomhnâk hal in ka au tawn. Na bia cu kâ ruahchan. 148Na bia cu ka ruahpeng khawh nâkhnga, zan khuadei hngilh loin ka mit ka au tawn. 149Na duhdawtnâk bangin ka aw hi ka ngaihpiak law, Maw BAWIPA, na diknâk bangin ka tharchuah hrâm ko. 150Suahsualnâk tuah a hmangmi hna an nai chin lengmang, na nawlbia in hlapi ah an um. 151Maw BAWIPA, nangmah cu na nai i na nawlpêk vialte biatak an si. 152Na hngalhternâk kongah, zungzal caah na fehter cang ti kha tuan ah ka hngalh cang. RESH 153Ka temtuarmi cu ka ruahpiak law ka khamh, zeitintiah na nawlbia cu ka philh lo. 154Ka bia ka ruahpiak law ka tlanh. Na bia bangin ka tharchuah hrâm ko. 155Khamhnâk cu misuaksual sinin a hla taktak; zeitintiah na phunglam kha an kawl lo. 156Maw BAWIPA, â dawhmi na vêl cu an va lianngan dah, na biaceihnâk bangin ka hlau tuah. 157Ka ral le aka serhsattu an tam fawn. asinain na hngalhternâk cu ka pialtâk hna lo. 158Mi depde hna ka hmuh tikah ka fih tuk hna, zeicatiah na bia an zul duh lo. 159Na phungbia hna ka duhning hi ka ruahpiak law, Maw BAWIPA, na duhdawtnâk bangin runka hlua tuah. 160Na bia dihlak cu biatak a si, a dingmi na biaceihnâk cu zungzal in an hmun. SHIN 161Milian hna nih chan um loin anka serhsat, asinain ka lungthin cu khuaruahhar na bia ah a dir. 162Chawva tampi a hmutu bangin na bia nih aka lawmhter. 163Lihbia hi ka huat i ka fih, asinain na nawlbia cu ka duh. 164Na biaceihmi a din ruangah nikhat ah voi sarih kan thangṭhat. 165Na nawlbia aduhtu hna cu daihnâk nganpi an ngei, zeihmanh nih a tlukter hna lo. 166BAWIPA na khamhnâk hi kâ ruahchan, na nawlpêk kha ka tuah tawn hna. 167Ka nunnâk nih na hngalhternâk cu a zulh i ka tlaihchan taktak hna. 168Na phungbia le na hngalhternâk cu ka zulh hna, zeitintiah ka lam vialte cu na hmai ah a um. TAU 169Maw BAWIPA, ka aunâk aw hi nasin ah phân seh, na bia ningin theihthiamnâk ka pe ko. 170Ka nawlnâk nih na sin phân sehlaw, na bia ningin ka khamh. 171Ka hmurkâ nih thangṭhatnâk a phuan lai, zeitintiah na phungbia hna naka cawnpiak. 172Ka lei nih na bia a chim lai, zeitintiah na nawlpêk vialte cu dinnâk an si. 173Na kut cu aka bawmtu si seh, zeitintiah na phungbia kha kâ thîm cang. 174Maw BAWIPA na khamhnâk cu ka ngai tuk hringhran, na nawlbia cu kâ lomhnâk a si. 175Ka nunnâk hi nung sehlaw an thangṭhat lai, na biaceihnâk nih ka bawm hna seh. 176Tuu tlaumi bangin ka tlau, na sal hi run ka kawl, zeitintiah na nawlpêk ka philh hna lo.
Currently Selected:
SÂM 119: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
