PHUNGTHLÛKBIA 5
5
1Ka fapa, ka fimnâk hi ngai law, ka theihthiamnâk ah na hna chi. 2Ruahthiamnâk na ngeih khawh nâkhnga le na hmur nih hngalhnâk â cinken khawh nâkhnga. 3Zeitintiah nu ṭha lo hna hmurkâ cu khuaihliti bangin a thlum, a kâ hna cu chiti nâk in a nal deuh. 4Asinain a donghnâk cu anfangkhâ bantukin a khâ i kaphnih har vainam bantuk in a har. 5Ake nih thihnâk lam a panh i ake phau nih hell mei a panh. 6A nun lamthluan na ruat lo i a lam a feh lo kha na hngal hna lo. 7Cucaah ka fale hna, atu ka ngai tuah u, ka hmurkâ chuak bia hna hi pialtâk hlah u. 8A sinin hla pi ah i ṭhial u law, a inkâ hram zong va naih hlah u. 9Culoahcun upatnâk na hmuhmi hi midang sinah â ṭhial sual lai, mi nunchia hna lakah na nunnâk na hman dih sual lai. 10Culoahcun ramdangmi nih na rumnâk in an i nuam lai i na ṭuanmi theipar hna cu ramdangmi inah a kal sual lai. 11Cun na thisa le pum a derthawm tikah na ṭahpi hna sual lai. 12“Zeitindah cawnpiaknâk kha ka rak huat i nunchimnâk kha ka lungthin in ka rak zomhtaih! 13Aka cawnpiaktu aw ka rak zulh duh lo i a cawnpiaknâk ka rak ngaih lo kha mu! 14Mizapi le â pummi hna sinah rawhnâk ka ton lo lawng a si ko hi ta,” na ti te lai. 15Nangmah tikhor, nangmah tikhor in a chuakmi ti hrimhrim kha ding. 16Na tikhor hna cu ramkip ah luang in, zatlâng lam hna ah an luang dih ko lai maw? 17Nangmah ca lawng lawngah si seh, midang hrawmh awk a si lo. 18Na tikhor cu thluachuah in um sehlaw, na no lio nupi ah na lung tling seh. 19Duhnung mi sazuk la bantuk le â dawhmi sazuk pa bantukin a ṭangnem nih na lungdi remhter seh, cun a dawtnâk nih na lungdi riamter ko seh. 20Zeitindah nang ka fapa nih nu ṭha lo cu na duh lai i a ṭangnêm cu na pom lai? 21Zeitintiah minung nuncan vialte hi BAWIPA nih a hmuh dih, a zulhmi lam vialte hi a hngalh dih. 22Amah ruahnâk nih misual cu a tlaih lai i a sualnâk hrihrual in khih a si lai. 23Cawnpiaknâk a bau ruangah a thi lai i a nganmi a hruhnâk ruangah a tlau lan lai.
Currently Selected:
PHUNGTHLÛKBIA 5: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
