PHUNGTHLÛKBIA 6
6
1Ka fapa, na hawi caah âmah nâ khân i midang ca i bia na rak i kam laklawh cang a si ahcun, 2Na hmurkâ chuak bia lila nih an foih cang, na hmurkâ chuak bia in lâk na si cang. 3Cuticun ka fapa, hitihin nanmah le nangmah na khamh lai; zeitintiah na hawikawm kutah na phân cang i toidornâk he va kal law, ngaihthiam va hal ko. 4Nguttâk hlah law, hngilhtâk fawn hlah. 5Sapeltu sinin sakhi a zâm bantukin zâmtâk law, vate vehtu sinin vate bantukin lodiam in zuantâk. 6Nang, thathu pa, hngerhte sinah va kal law, an umtuning in fimnâk va cawng, 7Annih cu, hotu, ngiathlai tu, asiloah uktu an ngeilo nain, 8Ṭhal cân ah rawl an pumh i rawlṭuan cân ah rawl an pumh. 9Maw, thathu pa, zeicandah na ih lai? zeitikahdah nâ hlauh lai? 10It rih ning law, tlawmpal i hngilh ko rih ning, kutsih in i dinta rih ko ning, na ti lio ah. 11Sifaknâk nih zan i a vakmi bangin chikkhatte ah an phanh lai i herhbaunâk nih rakkap bangin an phanh lai. 12Santlai lo pa, misuaksual pa cu, sullam ngei setlo biachim in â chawk len. 13A mit â sur, a ke â hngirh lengmang i a kut dongin a sawh len hna. 14A lungput a ngawi i Ṭhatlonâk lei lawng a ruat peng, sikcâknâk thlaici a tuh tawn. 15Cucaah rawhralnâk nih chikkhat te a tlun hnawh lai, chikkhatteah damter khawh lomi rawhralnâk a ton lai. 16Hi thil paruk hna hi BAWIPA nih a huat hna, asi a fihmi phun sarih an si. 17Â uahmi mit, lihchim mi lei, sual ngeilo thisen chuahnâk kut, 18Ṭhatlonâk a ruat tawnmi thinlung, thilṭha lo tuah awkah a zuanzâng mi ke, 19Lihchim tawnmi biahngaltu deu le unau karlak i remlonâk thlaici tuhtu hna an si. 20Ka fapa, napa nawlpêk kha zul law, nanu nawlbia cu kaltâk hlah. 21Na lungchung ah i chiah law, na hngawngah i awih peng. 22Na vah nâkah an hruai lai, nâ hngilh tikah an ven lai i nâ ṭhangh tikah a rak in chawnh lai. 23Zeitintiah nawlpêk cu meiin a si nawlbia cu ceunâk a si; chimhhrin cawnpiaknâk cu nunnâk lam a si. 24Nu ṭha lo le, bia thlum-al i lemsawi hmangmi chungin an khamh lai. 25Na lungthin in â dawhnâk hngar hlah, asiloah a mit-au dawhnâk nih in hnûk hlah seh. 26Zeitintiah hlawhhlang nu ruangah patling hi changreu kuaimi pel ah â cang tawn, mi nupi ṭangah a kaimi nih a sunglawimi a nun kha a hrawh cikcek a si. 27Minih â hrukmi hnipuan kanglo in mei alh a pom kho hnga maw? 28Minih a ke kanglo in meiṭil cungah a kal kho hnga maw? 29Cuticun a inpa nupi a ihpitu zong cabantuk cu a si; a tawngtu nih thiamlo a co lai. 30Arawl aṭam ruangah minih thil a fir ahcun, cu mifir cu minih an zomhtaih lo. 31Hmuh a si ahcun a leh sarih in a cham hrimhrim awk a si, a inn i a chawva kha pêk a herh kho ko. 32Mi nupi a ihpitu pauh cu theihhngalhnâk a baumi a si, amah nunnâk a hrawktu a si. 33Hliamhma tuar le minchia ngaiin a um lai, amin a chia peng cang lai. 34Zeitintiah hamtuknâk hi vale thinhun tertu a si, cucaah dimdawihnâk um loin phu a hlam lai. 35Lungoihter khawh a si lai lo, thilpêk tampi zongin lungoih khawh a si lai lo.
Currently Selected:
PHUNGTHLÛKBIA 6: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
