PHUNGTHLÛKBIA 4
4
1Ka fale hna, pa cawnpiaknâk cu ngai u law, theihthiamnâk hngal dingin ngai tuah u. 2Zeitintiah cawnpiaknâk ṭha kan pêk hna, ka nawlbia hi kaltâk hlah. 3Kapa fapa ka si lio ah, kanu fapa ngeihchun le dawtmi ka si. 4Ka sinah chim in cawn zong a ka cawnpiak, “Na lungthin in ka bia hna hi i cinken, ka nawlpêk hna hi zul law, nung. 5Fimnâk ngei law! theihthiamnâk ngei! ka hmurkâ chuak bia hna hi philh in mertâk hna hlah. 6Kaltâk hlah law, an kilven lai, daw law, an huhphenh lai. 7Fimnâk hi biapi bik a si, cucaah fimnâk hi ngei, na ngeihmi thil vialte ah, theihthiamnâk hi ngeih chih. 8Cawisâng law an santer lai, pom law, upatnâk ah an kalpi lai. 9Nalu ah ṭamhmi zângfahnâk an chinh lai, sunparnâk bawiluchin an pêk lai.” 10Ka fapa, ka chimmi hi ngai in cohlang hna law na nun chung kum hna a tamter lai. 11Fimnâk lam kan cawnpiak i a dikmi lamah kan hruai. 12Na kal tikah, nake caah dawntu a um lai lo, na tlik tik ah na ril lai lo. 13Nuncawnnâk cu fek tein i tlaih law, thlah ti hlah; i tlaih peng ko, zeitintiah na nunnâk a si. 14Misuaksual lamthluan ah lut hlah law sualnâk lam ah kal hlah. 15Hrial law, a cungah kal hrimhrim hlah; mertak law lo diam kaltâk. 16Zeitintiah thilṭhalo an tuah lo ahcun an i hngilh ballo, mi pakhat khat an rilhter lo ahcun an mit aku kho lo. 17Zeitintiah suahsualnâk changreu an ei i zângennâk zu an din tawn. 18Asinain midik hna lam cu ni ceu bantuk a si, cucu chun laifang ceunâk bantuk a si. 19Misuaksual hna lam cu khuamui bantuk a si, an tlukrilhnâk chan zong an hngal lo. 20Ka fapa, ka bia ṭha tein ngai hna law, ka chimmi hi biatak in ruat hna. 21Na mit hmuh in chuahter hlah, na lungthin laifang ah i cinken hna. 22Zeitintiah a hmutu hna caah nunnâk a si, an taksa dihlak caah ngandamnâk a si. 23Thildang vialte nâkin na lungthin ṭha tein kilveng, zeitintiah nunnâk rak chuahnâk hram a si. 24Hlennâk hmurkâ hi hlawt hna, cun palhsualnâk hmur kha hlapi ah chia. 25Na mit in hmailei kha ding tein zoh law ding tein na hmailei khi cuan hna. 26Na lamthluan kha hlathlai hmasa law, na lam vialte cu fehter si hna seh. 27Orh lei ah siseh, kehlei ah siseh pial hlah, Ṭhatlonâk in nake kha ṭhial.
Currently Selected:
PHUNGTHLÛKBIA 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
