PHUNGTHLÛKBIA 29
29
1Chimhhrin lengmang zong i a lung a khontermi cu, chikkhat te ah hrawh a si lai i damternâk a um lai lo. 2Miding hna nih nawlngeihnâk an co tikah mipi an i lawm tawn, asinain misuaksual hna nih nawlngeihnâk an co ahcun mipi an hrum ai tawn. 3Fimnâk a tlaihchantu nih a pa a lawmhter i hlawhhlang he â kawmmi nih a chawva a hloh dih tawn. 4Diknâk in siangpahrang nih a ram a fehter, asinain ziknawh a latu nih a hrawh dih tawn. 5A innpa a deu in a thangṭhattu nih, a ke awhnâk sur a phah a si. 6Nawlbuarnâk nih miṭhalo cu a foih, asinain miding cu lunglawm tein hla a sa tawn. 7Miding nih misifak zawn a ruah tawn, asinain misuaksual nih cubantuk hngalhnâk cu a theithiam hrimhrim lo. 8Mi zomhtaih a hmangmi hna nih khualipi an khangh tawn, asinain mifim nih thinhunnâk an kenh tawn. 9Mifim nih mihrut a doh ahcun, mihrut pa a nih zongah, a thinhun zongah daihnâk a um hlei lo. 10Thisen chuah a hmangmi nih sawiawk um lomi kha an huat hna, asinain midik hna nih an thlavâng an hauh tawn hna. 11Mihrut nih a thinhunnâk bia vialte a chim dih, asinain mifim cu â sûm tawn. 12Uktu nih lih kha poi a ti lo ahcun, a sinum vialte zong misuaksual ah an cang dih. 13Misifâk le lamchihtu hna nih hrawmmi pakhat an ngei, BAWIPA nih an mit a deiter ve ve hna. 14Dik ngai i misifak biaceihpiaktu siangpahrang cu, a bawiṭhutdan cu zungzal in fehter a si lai. 15Fung le chimhhrinnâk nih mi a fimter i ngakchia a daithlanh mi nih a nu caah ningzahnâk a phorh tawn. 16Misuaksual an tam tikah, nawlbuarnâk zong a karh tawn, asinain miding hna nih an tlukrih kha an hmuh hna lai. 17Na fapa cu chimhring law, dinhnâk an pêk lai, asi, na nunnâk nomhtertu a si lai. 18Langhnâk a um lonâk ah mizapi an daithlang tawn, nawlbia zultu cu mi thluachuak a si. 19Umpi cu bia-holh men i chimhrin khawh a si lo, zeitintiah theihmanhsehlaw a zul hlei lai lo. 20Ruatsetsai lo biachim hmang na hmu bal maw? cubantuk mi hna nâkin mihrut ah ruahchan ding a um deuh. 21A ngakchiat lio in sinum a dawt tuk sual ahcun, a donghnâk ah fasinâk hmanh a cuh te lai. 22Mi thintawi nih buainâk a chuahter tawn, mi thin butut nih nawlbia a buar cuahmah tawn. 23Porhlawtnâk hi a kan niamtertu a si i thlarau in toidormi cu mi nih an upat tawn. 24Mifir a kawmtu nih amah nunnâk tiang a huatu a si, biatak chim dingin chiat â serh na in, a chim hlei lo. 25Minung ṭihzahnâk nih rap bangin a kan foih tawn, asinain BAWIPA â bochanmi cu khamh a si lai. 26Mitampi nih uktu hna duhsaknâk an kawl, asinain minung ca i diknâk cu BAWIPA sinin a rami a si. 27Midiklo cu miding caah fihnung an si i dik ngaiin a nungmi hna hi misuaksual caah finung an si ve.
Currently Selected:
PHUNGTHLÛKBIA 29: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
