PHUNGTHLÛKBIA 28
28
1Misuaksual hna cu ahohmanh dawilo in an zâm, asinain miding hna cu chiandeih bangin an ral a ṭha. 2Ram nih phung a buar ahcun, hruaitu an i thleng lelek, asinain theithiamnâk le hngalhnâk ruangah ram cu saupi a dir lai. 3Misifak nih sifakmi dang a lamh chihmi cu, ruahpi ei awk ngan loin a fenh dih bantuk a si. 4Nawlbia zeiah a rel lomi hna nih misuaksual an thangṭhat hna, asinain nawlbia a zultu hna nih an doh tawn hna. 5Misual hna nih diknâk hi an theithiam lo, asinain BAWIPA kawltu hna nih zeizong vialte an theihthiam tawn. 6Rum ngai i ningcang lo ngai i nun nâk cha cun, misifak an si hmanh ah zumhtlâk in an um ah a ṭha deuh. 7Nawlbia a zultu pauh cu fapa fim an si i orkhûmi a kawmtu hna nih a pa ning an zahter tawn. 8A karhmi la in chawva a ngei luaimai mi nih, misifak a bawmtu caah a khawnpiak mi a si. 9Nawlbia zeiah a rel lomi cu a thlacamnâk zong fihnung a si. 10Miṭha, lamdik lo i a hruaitu cu amah cawhmi khor ah a tla lai, miṭha sawi awk um lo mi nih thil ṭha an co lai. 11Mirum cu amah ruahnâk ah a fim ngai, asinain misifak theihthiamnâk a ngeimi nih a zo a langh te lai. 12Miding an i lomh tikah a liannganmi sunparnâk a um tawn, asinain misuaksual an dir tikah mi an i thup dih. 13A sualnâk a thuptu cu a hlawhtling lai lo, asinain thup loin, a phuang i a hlawtu hna nih velngeihnâk an hmuh lai. 14BAWIPA ṭhzahtu cu mithluachuak a si i a lung a khawnter pengtu nih vanchiatnâk a ton lai. 15Misifâk hna cung i biaceihtu suaksual hna umtuning cu, chiandeih a awnmi le vom nih mi a nam bantuk a si. 16Uktu theihhngalhnâk a baumi cu lamhchihtu a si i hakkauhnâk a huatu cu a nunchung ni sauter a si lai. 17Thisen a chuahtu cu khor chungah a tla lai, ahohmanh nih bawm hna hlah seh. 18Mizei pauh sawiawk um loin a ummi cu khamh a si lai, asinain ngerhngawi ngai i a nungmi cu chikkhat te ah a rawk lai. 19Amah lei a thuangtu nih eidin a ngeih lai i zeiruaramlo a zultu cu a si a fak lai. 20Zumh awk a tlâkmi nih thluachuah tampi a hmuh lai, asinain chikkhat te i rum ai timmi cu dântak lo in a um lai lo. 21Thleidan ngeih hi a ṭha lo, ziknawh tlawmte ruangah mi nih nawlbia an buar tawn. 22Misual mit nih rumzau lawng â tim, sifahnâk nih a rak don ko ti kha a hngal lo. 23A deu i mi thangṭhattu nâk cha cun mi chimhringtu nih a hnu ah cun thangṭhat an co deuh lai. 24Anu siseh, Apa siseh a rok i, “Nawlbuarnâk a si lo,” titu cu Hrawktu hawikawm a si. 25Mi porhlaw lungthin nih buainâk a chuahter tawn, asinain BAWIPA â bochantu cu a lam a tluang lai. 26Mah le ruahnâk lawng a kalpitu cu mihrut a si i fimngai i a ummi tu cu khamh a si lai. 27Misifak sin i thilpetu cu chambau in a um lai lo, asinain a mit a chinhkanhtu cu chiatserhnâk tampi a hmuh lai. 28Misuaksual hna nih nawlngeihnâk an co ahcun mi nih an thuh kanh tawn hna, asinain cubantuk hna an lohtlau tikah miding an karh tawn.
Currently Selected:
PHUNGTHLÛKBIA 28: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
