FILEMON 1
1
1Paul Krih Jesuh ah thong a tlami le kan unauTimote nih kan dawtmi le kan ṭuanpi hawi Filemon sin ah le, 2kan dawtmi Afia le kan ralkap ṭuanpi Arkhippas le na in i kawhran hna sinah, 3Pathian kan Pa le Bawipa Jesuh Krih sinin zângfahnâk le daihnâk nan sinah um ko seh. 4Ka thlacamnâk ah na min chim in Pathian sinah lawmhnâk bia ka chim tawn. 5Bawipa Jesuh le mithiang vialte sinah na ngeihmi dawtnâk le zumhnâk kha thei in, 6na zumhnâk cu midang sinah na hngalhternâk thawngin Krih Jesuh ah na chung i a ummi ṭhatnâk phunkip hna nih hmual an ngeih khawh lai. 7Zeitintiah unau, nanmah thawngin mithiang hna lungthin tharchuah in a um cang, na dawtnâk nih a liannganmi lawmhnâk le hnangamnâk a ka pêk. 8Cucaah â tlâkmi nawl pe dingin Krih ah ralṭha ngaiin um hmanh ning law, 9dawtnâk ruangah kei Paul tarkhat zong a tarmi le Jesuh Krih caah thong a tlami nih a nawl in kan nawl. 10Cikcin he ka um lio ah ka hrinmi kafa Onesimas caah hin kan nawl, 11amah hi hlan ah na caah sân a tlai lo nain atu ah cun na ca le ka caah san a tlai cang. 12Amah cu ka rak thlah ṭhân. Cucaah amah cu rak cohlang ko, ti hi lungthin taktak in kan nawl, 13amah hi thawngṭha caah cikcin khih ka sinâk ah nangmah ai awh in rian a ka ṭuanpiak nâkhnga ka sinah umter peng ka duh. 14Asinain na hnatlâknâk loin zeihmanh tuah ka duh lo, cucu thilṭha na tuahmi zong hnekchawm si loin mah lungtho tein tuahmi a si nâkhnga. 15Zeitintiah cân tawite an ṭhenmi hi zungzal i na ngeih thainâk cânrem zong a si kho ko, 16sal bantuk si ti loin salnâk i a ṭha deuhmi-dawtmi unau bangin a si hnga lo maw, a hleiin kaca zongah duhnung a si ahcun naca zongah taksa le Bawipa ah duhnung a si chin chin ko lai. 17Cuticun rianṭuanpi hawi i naka ruah ahcun keimah naka cohlân bantukin amah hi rak cohlang te. 18Na cungah palhnâk a rak ngeih i na lei anbat ahcun keimah bat ah ruat. 19Kei Paul nih ka kut hrimhrim in ka ṭialmi a si. Keimah nih ka champiak lai, ka sinah nangmah nih leiba na ngei ka tinâk cu a si lo. 20Asi unau, Bawipa ah na sinin lawmhnâk ka ngeihter law; Bawipa ah ka lungthin hi hlauhter hram ko. 21Ka chimmi na zulh ko lai tiah ralṭhatnâk ka ngeih caah hi câ hi ka rak ṭial, ka chimmi nâk hmanh i ṭhadeuh in na tuah lai ti kha ka hngalh. 22Biakarlakah tlunnâk ding rakka timhlamh piak, nan thlacamnâk thawngin nan sinah pêk ka si zau lai tiah ka zumh. 23Epafaras Krih Jesuh ah ka thongtlakpi nih nakut an tlaih, 24ka ṭuanpi hawi Marka, Aristarkhas, Demas le Luka zong nih cubantukin na kut an tlaih. 25Kan Bawipa Jesuh Krih zângfahnâk na thlarau sinah um ko seh. Amen.
Currently Selected:
FILEMON 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
