HEBRU 1
1
1Pathian, hlan lio ah cân dang dangah phun dang dangin hringtu hna sinah profet hna hmangin bia a rak chimtu nih khan, 2hi ni hmadung ah a Fapa in kan sinah bia a chim cang, Amah cu thil vialte rocotu ah a ruah i Amah hmangin vawlei hi ser a si. 3Amah hi a sunparnâk ceu cu a si i Mi a sinâk kokek taktak langhtertu a si, a bia ṭhawnnâk nih zeizong vialte hi a tlaih i kan sualnâk kha Amah hrimhrim nih a thianter hnu ah Cungnung bik orhlei kamah a ṭhu. 4Vanmi hna nâkin a ṭha deuhmi ah a cang, anmah nâk i a cungnung deuhmi min rocotu sinâk kha a co. 5Zeitintiah vanmi ahosinahdah hi bia hi a chim bal? “Nang cu ka Fapa na si, Nihin ah kan hrin?” ti le, “Keimah cu Amah caah Pa ka si lai i Amah cu ka caah Fapa a si lai,” timi hi. 6Asinain a fater vawlei i a ratpi ṭhân tikah, “Pathian vancungmi vialte nih Amah cu bia hna seh,” tiah a ti. 7Cun vanmi hna kongah, “Amah nih a vanmi hna cu thlarau ah a canter hna i a rian ṭuntu zong meialh ah a canter tawn hna,” tiin. 8Asinain Fapa sinah hitinhin a chim, “Maw Pathian na bawi`hunhdanh cu, zungzal in zungzal ca a si. Dinnâk ṭhiangṭhunh zong na pennâk ṭhiangṭhunh a si. 9Dinnâk kha na dawt i nawlbuarnâk kha na huat. Cucaah Pathian, na Pathian nih na hawi le hna nâkin lawmhnâk sathau cu an thuh,” tiin. 10“Nang, BAWIPA, a hramthawk in vawlei hram na bunh cang i van khi na kut chuak an si. 11An rawk dih lai nain Nang cu na hmun lai: Cuvialte cu thilthuam bangin an hlun dih te lai: 12Puan bangin na zual lai i an i thleng dih lai, Nangtu cu na hmun zungzal i nâkum zong a dongh lai lo,” tiin. 13Asinain vanmi ahosin bik ahdah hihi a chim bal? “Na ral hna na ke chiahnâk i ka canter hlan pauh cu ka orhlei ah ṭhu,” tiin. 14An dihlak in rianṭuantu thlarau, khamhnâk ro a co hngami zohkhenhtu ah thlah an si lo maw?
Currently Selected:
HEBRU 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
