JUDAS 1
1
1Judas Jesuh Krih ah ṭemmi-sal le Jeim unau pa nih, Pa Pathian nih a thianter i a kawhmi hna le, Jesuh Krih kilvenmi hna sinah: 2Zângfahnâk le daihnâk le, dawtnâk nan cungah karhter in um ko seh. 3Dawtmi hna, kan co ṭimi khamhnâk kong nan sinah biatak tein ṭial ka timh nain mithiang hna sinah pêkchanh cangmi, hi zumhnâk kong hi felfai tein nan kilven khawhnâk lai, thazâng pêknâk biatu nan sinah ṭial a herh deuh tiah ka ruah. 4Zeitintiah mizei maw a thliin an lut, cu hna cu Pathian-zeiaharellomi an si, Pathian zângfahnâk hi hornâk caah an hman i kan ngeih chun, Bawipa Pathian le kan Bawipa Jesuh Krih zong an hlawt, cubantuk mi hna cu hlan lio pi khan thiamlo co ding ah ruah ciami an si. 5Hihi nan hngalh ciami a si nain hngalhter ṭhân kan duh hna. Ezip ram in Bawipa nih Ami le kha a khamhhna i cuhnu ah zumlotu kha a hloh dih hna, timi bia hi. 6Cun vanmi hna, vanmi an sinâk duh loin an umnâk a kaltâkmi hna cu zungzal ṭêmnâk i ṭêm buin biaceihnâk ni lianngan i biaceih awkah muihnâk tangah chiah an si. 7Sodom le Gomora le kiangkap khua hna zong thleidang loin fih a nungmi hornâk ah an i pe, a hleituk in an hor i zungzal meipi i hremnâk a tuar hngami umtuning zohchunh awkah chiah an si. 8Cubantukin hi mi hna zong nih an mangah an thisa an thurter, nawlngeitu hna an hlawt i hmaizah awktlâk an thangchiat hna. 9A cungnung bik vancungmi Michael hmanh nih, Moses ruak kong i khuachia he bia an i al ah khan, thangchiat lei in sual a puh ngam lo, “Bawipa nih in sî seh,” tiah a ti. 10Cu hna nih an hngalh lomi kha an thangchiat hna, kokek hngalhnâk an ngeihmi cu, samram a hrutmi hna hngalhnâk nâkin a cungnung hlei lo, hi thil hna ah hin anmah le anmah an i hrawk tawn. 11Zeitluk ngaihchia dah an si! Kain lam kha an zulh i hlawh hmu dingah Balaam lamah hakkau ngai in an tli i Kora ralthawhnâk bangin an lo tlau dih te lai. 12Cuhna cu nan dawtnâk rawl thurhnawmtertu an si, ṭihnâk zeihmanh ngei loin, mah zawn lawng ruahnâk lungput he nan sinah an i tel tawn. Ruah ti a phor lomi khuadawm, thli nih a chawih lengmangmi bantuk an si, favâng thingkung theipar ngei lo, voihnih a thih hnu i a hram in bonghmi bantuk an si, 13rili tilet, mah mualphonâk langhter i a phuan a chuah lenmi bantuk an si, a zuangmi Arfi a nak tak takmi zungzal muihnâk chiahpiakmi bantuk an si. 14Cubangin Enok Adam in pasarihnâk nih khan, cubantuk mi hna sinah a rak chimchung cang, 15“Zohhmanh u, mi vialte cungah biaceih ding le, Pathian bia a zum duh lomi vialte nih, Pathian ṭihzahnâk um loin an tuahmi thil vialte le Pathian-zeiaharellomi hna nih Amah ralchanh in bia an chimmi vialte cung i biaceih ding le thiamlo coter dingin Bawipa cu a mithiang thong hra he an ra lai.” 16Himi hna hi phunzai a hmangmi, mi sawitu an si i anmah duhnâk nih a hruaimi hna an si, an nâl ngai i an hlawknâk ding zoh in mi an tlawnhtlamh tawn hna. 17Asinain dawtmi hna, nannih nih kan Bawipa Jesuh Krih lamkaltu hna nih bia an chimchung mi hna kha philh hlah u: 18cân hmadungah nisawh tu hna an um te lai, Pathian-zeirellonâk he anmah duhning lawngin khua a sami an si lai, tiah an chim chung cangmi kha philh hlah u. 19Hi hna hi pumsa mi, Thlarau ngei lo, ṭhennâk chuahtertu an si. 20Asinain dawtmi hna, nannih cu Thiang Thlarau ah thlacam ulaw, nan zumhnâk a thiang bikmi cungah nanmah te fek tein dir ko u. 21Pathian dawtnâk ah i kilveng ulaw, zungzal nunnâk tiangin kan Bawipa Jesuh Krih velngeihnâk kha zoh u. 22Cheukhat cungah zângfahnâk ngei ulaw, ralring tein ruahthiamnâk ngei u; 23cheukhat `ihbu in khamhhna ulaw, mei chungin chuah hna u, taksa nih a thûrtermi thilthuam tiang khan hua u. 24Cubangin nan tlûk nâkhnga lo an kilveng khotu le a sunparnâk hmai ah lawmhnâk taktak he thûrhnawm lo in an chia khotu, 25Amah lawng a fimmi kan Khamhtu Pathian sinah, sunparnâk le biaceihnâk, Uknâk le ṭhawnnâk hna cu Atu le zungzal tiangin um ko seh. Amen.
Currently Selected:
JUDAS 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
