BIAPHUAN 1
1
1Jesuh Krih Biaphuan, a rauh hlanah a phân hrimhrim laimi Pathian nih a sal le hmangin hngalhter a timhmi cu hihi an si. A vancungmi thlah in a sinum Johan sinah a hngalhter; 2amah nih Pathian bia le Jesuh Krih kong a hmuhmi vialte kha a hngalhter hna. 3Hi chimchungbia a rel i a theitu le a chung i ṭialmi â cinkentu hna cu mi thluachuak an si, zeitintiah a cân cu a nai cang. 4Kei Johan nih, Asia ram i a ummi kawhhran pasarih hna sinah, a um liomi le a um cangmi le a um laimi sin le bawiṭhutdanh hmai i Thlarau pasarih hna sin le; 5Jesuh Krih zumhtlâk biahngaltu, thihnâk in a tho hmasa bik le lei cung siangpahrang hna cungah biaceihtu a simi sinin zângfahnâk le daihnâk um ko seh. A kan dawt i a thisen in kan sualnâk kha a kan ṭawl piak, 6A Pa le a Pathian caah siangpahrang le tlângbawi ah a kan sertu sinah, Amah sin hrimhrim ah cun sunparnâk le uknâk cu zungzal in zungzal tiang um ko seh. Amen. 7Zohhmanh, khuadawm lakah ara lai, mit vialte nih an hmuh lai, Amah a chunhtu hrimhrim nih khan an hmuh lai. Cun lei i miphun vialte cu Amah ruangah an ṭap lai, cubantuk cu si ko seh. Amen. 8“Kei Alpha le Omega, Hramthawknâk le Donghnâk, a um liomi le a um cangmi le a um laimi Zeizongtuahkho ka si,” tiah Bawipa nih a ti. 9Kei Johan nan unaupa le Jesuh Krih ah harsatnâk le pennâk le inkhawhnâk an hrawmhpitu hna hi Pathian bia le Jesuh Krih bia hngalhternâk ruangah Patmos tikulh an timi ah ka um; 10Bawipa Ni ah Thlarau in ka um i ka hnulei in muko tumthawng bantuk aw thang ngaimi ka theih, 11Cu aw nih “Kei cu Alpha le Omega, Hmaisa bik le Hmahnung bik ka si. Na hmuhmi cu cauk ah ṭial law, Asia ram i a ummi kawhhran pasarih; Efesa, Smirna, Pergamos, Thiatira, Sardis, Filadelfia le Laodisia sinah kuat hna,” tiah a ti. 12Aka chawntu hmuh duhah aw ka theihnâk lei ah kâ mer i sui meiin chiahnâk pasarih kha ka hmuh; 13meiin pasarih chiahnâk laifang ah Mi zeimaw, Mi Fapa bantuk a kedong tiang puan â aihmi a um i a ṭângah sui taisawm â sawmhmi zong ka hmuh. 14Alu le a sam cu tuhmul bangin a râng i hawhra bangin a râng, Amit cu meialh bantuk a si; 15A kephah hna cu a tleumi dar thianternâk mei i thianhter cangmi bantuk a si, cun a aw thawng cu ti tampi luan thawng bantuk a si. 16A orhlei kut in arfi pasarih kha â put i akâ chungin vainam kaphnihhar a rak chuak. Amui cu chunlai niceu bantuk a si. 17Ka hmuh tikah mithi bangin ake hramah ka tlu. Asinain a orhlei kut kha ka cungah a chiah i “ṭih hlah, keimah cu Hmasa bik le Hmahnung bik ka si,” tiah a ti. 18Keimah cu a nungmi ka si, ka rak thi cang, cun zohhmanh zungzal ca in ka nung cang. Amen. Thihnâk le Mithikhua tawh kha ka ngeih hna. 19Hi na hmuhmi thil, atu a um liomi le tu hnuah a um laimi kha ṭial hna. 20Ka orhlei kut i arfi pasarih na hmuhmi hna le sui meiin chiahnâk pasarih hna biathli cu hihi a si: Arfi pasarih hna cu kawhhran pasarih hna i an vancungmi an si. Meiin chiahnâk pasarih hna cu kawhhran pasarih kha an si.
Currently Selected:
BIAPHUAN 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
