JEIM 4
4
1Nanlakah dohdalnâk le sikvelhnâk hna kha khuazeiindah a rat? Nomhhnaihnâk nan duhtuknâk le nan chung i dohnâk a um tawnmi chungin a chuakmi a si lo maw? 2Nan duh nain nan ngei lo. Lai nan nawng, nan hngar, nan ngei kho hlei lo. Nan i doh, nan i vel. Asinain nan hal lo caah nan ngei lo. 3Nan hal, nan hmu lo, zeicatiah a hal nan i palh, nanmah nomhhnaihnâk lawng ah hman nan duh. 4Nannih ṭangdang a kaimi nu le ṭangdang a kaimi pa le hna! Vawlei he i hawikomhnâk hi Pathian he ralchanhnâk a si kha nan hngal lo maw? Cucaah vawlei hawikawm si a duhmi pauh cu Pathian ral ah â cang tawn. 5Asiloah Cathiang nih, “Kan chung i Thlarau a ummi nih hnahchuak lak in a kan ham,” ti hi a sawhsawh in a chim tiah nan ruat maw? 6Asinain zângfahnâk tamchin chin a pêk tawn. Cucaah Cathiang nih, “Pathian nih miporhlaw a doh hna i toidormi kha zângfahnâk a pêk tawn,” tiah a ti. 7Cucaah Pathian sinah i pe u. Khuachia kha doh u law an zâmtâk hna lai. 8Pathian naih u law, Amah zong nih an naih hna lai. Nannih misual hna, nan kut ṭawl ulaw, ruahnâk set ngei lomi hna, nan lungthin thianter u. 9Zûnngai le ngaihchia in ṭap u! Nan nihchuahnâk ngaichiatnâk ah cang sehlaw, nan i nomhnâk lungkuainâk ah cang seh. 10Bawipa hmai ah toi dor u law Amah nih an cawisan hna lai. 11Unau hna, pakhat le pakhat nan kong i ceihhlah u. A ho pauh nih a unau kong a ceih tikah siseh, a unau a sawi ah siseh, nawlbia a thangchiat i nawlbia a sawi a si. Nawlbia na sawi ah cun nawlbia zultu na si lo i a sawitu na si. 12Nawlbia petu pakhat lawng a um, khamh khotu le hrawk khotu kha a si. Nang, midang sawitu cu ahodah na si? 13Atu ah nannih, “Nihin ah maw, Thaizing ah maw, cuka, khaka, khualipi ah kan kal lai, cuka ah kumkhat ka va rau lai, chaw ka let lai i hlawknâk ka hmuh lai,” titu hna; 14thaizing ah zeithil dah a tlung lai ti kha na hngal lo. Nan nunnâk cu zeidah a si? Min mei cân tawi te a zâm i a lo ṭhanmi bantuk men hi a si. 15Hitihin nan chim deuh awk a si, Bawipa nih rem a ti ahcun, kan dam lai i cucu, kha kha, kan tuah lai,” tiin. 16Asinain hmaihngal ngaiin tluang nan khawng. Cubantuk hmaihngalnâk vialte cu sual a si. 17Cucaah aho pauh thilṭha tuah awk a hngal ko nain a tuah lo ahcun, a caah sual a si.
Currently Selected:
JEIM 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
