HEBRU 9
9
1A ngai ngai tiah, biakam hmasa zong nih vanlei rianṭuannâk le phunglam a ngei ve, cun lei hmun thiang zong a ngei. 2Zeitintiah biakthlâm an ser i a hmai lei cu meiin chiahnâk le, cabuai le changreu chiahnâk an si; cucu ‘hmun thiang’ timi cu a si. 3Cun puanzar pahnihnâk phên, biakthlâm ah ‘Hmun thiang Bik’ tiah timi a um, 4cukaah rimhmui khanghnâk suikheng, biakam kuang a kil kip suiin ṭamhmi a um, biakam kuang chungah mana chiahnâk sui bel le, Âron ṭhiangṭhunh a corhmi le, biakamnâk lungtlap kha a um, 5cu kuang cungah velngeihnâk ṭhutdanh an thla in a zarhtu, sunparnâk cherubim kha an um. Cu kong hna cu a dihumnâk in atu ah kan chim kho lai lo. 6Cuthil hna cu cubantuk in timhtuah a rak si i tlângbawi kha biakthlâm tonter ah rianṭuan dingin an lut tawn. 7Asinain a changtu ah tlângbawi nganbik kha amah lawngin kumkhat voikhat thisen put in a lut tawn, cucu amah ca le, mizapi nih hngal loin an tuahmi sualnâk ca i raithawinâk kha a pêkchanh tawn. 8Thiang Thlarau nih a hngalhtermi cu, biakthlâm hmasa a dir chung pauh cu Hmun thiang Bik luhnâk lam kha a lang rih lo, timi hi a si. 9Cu thil cu atu cân hmuhsaknâk a si; an thilpêk le raithawinâk hna nih a pechantu hna chiaṭha hngalhnâk zong an ṭuanmi nih a ṭhatter kho lo, 10cu hna cu serṭhatnâk cân a phâk hlan i thisa phunglam, ei le dinnâk kong le, ṭawlthiannâk a phunphun kong an rak si. 11Asinain Krih cu a um lai ding mi thilṭha caah Tlângbawi Nganbik bangin a ra, kut i sak a si lomi, hi sermi thil in sakmi zong a si lomi biakthlâm, a ngan deuhmi le tlam a tling deuhmi ah, 12meheh le caw thisen he si loin, Amah Thisen theng kha â put i zungzal tlanhnâk kha hmu in voikhat ah zungzal ca zalak in Hmun Thiang Bik ah a rak lut. 13Zeitintiah meheh le cawpa thisen le cawla khanghnâk vutcâm kha a thurmi hna cungah an theh hna i taksa leiin thiannâk an hmuh ahcun, 14Krih thisen, zungzal Thlarau thawngin Pathian sinah dotla in pekchanh mi nih, Pathian nung rianṭuan dingin, an chiaṭha hngalhnâk kha a thimi tuahsernâk chungin zeitlukindah a thianter chin chin lai! 15Hiruangah hin Amah cu biakam thar lamkaltu a si i biakam hmasa tang i nawlbuarnâk kha tlanh dingin a rak thi, cucaah kawhmi hna nih zungzal roconâk biakam cu an co khawh lai. 16Zeitintiah rovuihnâk câ a um nâkah, a thi cangmi rovuihtu zong a um hrimhrim a herh. 17Mi a nun lio ah cun ro a vuihmi nih ṭhawnnâk a ngei lo i rovuihtu thih hnu lawngah hmual a ngei tawn. 18Cucaah biakam hmasa zong kha thisen lo in an pechân bal lo. 19Zeitintiah Moses nih nawlbia ning tein phungbia kha mizapi a chimh hna lio ah khan cawfa le meheh thisen kha ti he, a senmi sahmul le hisop he, cauk le mizapi kha a theh hna, 20“Hihi biakam thisen Pathian nih nan zulh awkah a pêkmi hna a si,” tiah a timi kha a si. 21Cubantuk ṭhiam ṭhiam in biakthlâm le rianṭuannâk thilri vialte kha thisen in a theh hna. 22Cun nawlbia ning ah zeizong vialte dengmang hi thisen in thianter a si tawn, thisen chuah loin ngaihthiamnâk a um lo. 23Cucaah van thil hna muithlâm hmanh kha cubantuk raithawinâk i thianter a herh ahcun, van thil taktak a simi cu rai thawinâk a ṭha deuhmi i thianter a herh hrimhrim lai. 24Zeitintiah Krih cu kut i sakmi hmunthiang, a taktak muithlâm men i a lutmi a si lo, atu ah van hrimhrim ah, Pathian hmai ah, kan aiawh i dir dingah a lut; 25tlângbawi nganbik hna nih mah thisen zong a si lomi i put in kum chiarte Hmun Thiang bik i an rak luh bang khan, Anih cu Amah i pechan dingin a lut ṭhân ti lai lo; 26Cutin sihlahsehlaw, vawlei ser hramthawk khan voitampi a rak temtuar cang hnga. Asinain hi cân dongh ah hin, sualnâk hlawnh dingin a ra i Amah hrimhrim kha sual raithawinâk ah â pe. 27Minung caah voi khat thih cu ruah cia a si, cuhnu ah biaceihnâk a um lai, 28cubantukin Krih zong mi tampi sualnâk phor dingin voikhat pêkchanh in a rak um cang. Hngahhlang ngaiin Amah hngaktu hna caah, sual tel loin, khamhnâk caah a voi hnihnâk ah a ra ṭhân lai.
Currently Selected:
HEBRU 9: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
