HEBRU 8
8
1Cubangin hihi kan chimmi hna tlângkomhtu cu a si; cubantuk Tlângbawi Ngan bik, van cungah Cungnung bik ṭhutnâk orhlei kam i a ṭhumi, 2hmunthiang le biakthlâm taktak, minung sakmi si loin, Bawipa sakmi chung i Rianṭuantu kan ngei, timi hi. 3Zeitintiah tlângbawi nganbik pauh cu thilpêk le raithawinâk pechân ding i ruahmi an si. Cucaah hi Tlângbawi Nganbik zong nih pêkchanh awk zei maw cu a ngeih ve a herh. 4Zeitintiah Amah hi lei cungah a ummi rak si sehlaw tlângbawi zong a si theng hnga lo, a chan cu nawlbia ningin thilpêk pechântu kha an um ko. 5Moses nih biakthlâm a sak lai i cung leiin nawlpêk a hmuh bantuk khan, annih nih cun vawlei thil zohchunh in a muithlâm in rian an ṭuan tawn. Zeitintiah, “Tlângcung i zohchunh awk na hmuh bantuk khan zeizong vialte na ser lai,” tiah a rak ti. 6Asinain atu ah a ṭha deuhmi biakam, ṭha chin chinin kamhmi bia cungah fehter cangmi caah lamkaltu a si bangin, a ṭha deuhmi rian a co cang. 7Zeitintiah a voi khatnâk biakam kha palhnâk umlo rak si sehlaw, a voi hnihnâk caah hmun kawlpiak a herh hnga lo. 8Amah ah palhnâk a hmuh ruangah BAWIPA nih, “Ngaihmanh Israel chungkhar le Judah chungkhar hna sinah biakam thar ka tuah laimi ni a nai cang. 9An pupa hna Ezip ram in chuahter awkah an kut i ka tlaih hna ni ah ansin i ka kamhmi bantuk si loin, zeicatiah ka biakamnâk ah an hmun lo, cucaah anmah cu zeiah ka rel hna lo,” tiah BAWIPA nih a ti. 10Cuhnuah Isarel chungkhar hna sin i biakam ka tuah laimi cu hihi a si, BAWIPA nih a ti. An ruahnâk ah ka nawlbia hna ka chiah lai i an lungthin ah ka ṭial lai. An Pathian ka si lai i annih cu ka mi an si lai. 11Ahohmanh nih ‘BAWIPA cu hngal ko’ tiin mah inpa le mah unau an cawnpiak ti lai lo; zeitintiah a hme bikin a ngan bik tiang an dih lakin anka hngalh cang lai. 12Zeitintiah an dinlonâk ah vel ka ngei lai i an sualnâk le nawlbuarnâk hna zong ka hngalh piak ti hna lai lo,” tiin. 13“Biakam thar,” tiah a chim caah, a hmasa kha a hmang ti lo. Atu i hman ti lomi le a hlun tuk cangmi cu lohtlau â thawk cang.
Currently Selected:
HEBRU 8: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
