HEBRU 10
10
1Zeitintiah nawlbia cu a um laimi thilṭha hna muithlâm a si i cu thil hna muisam taktak cu a si lo. Cucaah kum fatin a phung bangin an pêk chanhmi raithawinâk nih a pe chantu hmanh tlam a tlinter kho hna lo. 2Cutin sihlahsehlaw, a biatu hna voikhatah thianter an si lai i sual hngalhnâk an ngeih ti lo ahcun pekchanhnâk cu an ngol diam cang lai lo maw? 3Asinain cu raithawinâk hna cu kumchiar te an sualnâk hngalhter ṭhântu a si. 4Zeitintiah cawpa le meheh thisen nih sualnâk a lohter kho lo. 5Cucaah vawlei i arat lio ah khan, “Raithawinâk le thilpêk na duh lo, cucaah pum kha ka caah naka timhlamh piak. 6Khangh thawinâk le sual ca i pêkchanhmi ah nâ lawm fawn lo. 7Cuticun hi ti hin ka chim, ‘Maw, Pathian ngaihmanh cauk chungah ka kong ṭialmi bangin, na duhnâk tuah awk ah ka ra,” tiah a ti. 8Ahmasaah, “Raithawinâk le thilpêk, khanghthawinâk le, sualthawinâk hna na duh lo i cuka ah cun nâ lawm fawn lo,” tiah a ti. (cu hna cu nawlbia ning i tuahmi an si) 9Cutikah, “Maw Pathian, ngaihmanh, na duhmi tuah awkah ka ra cang,” tiah a rak ti. A pahnihnâk hi a fehter khawh nâkhnga, a pakhatnâk kha a hloh. 10Cu duhnâk in Jesuh Krih taksa voikhat ah zungzal ca pêkchanhnâk thawngin thianter kan si cang. 11Tlângbawi hna cu nichiar tein sualnâk a la kho lomi thawinâk tuah in an dir lengmang ko. 12Asinain Anih nih cun zungzal caah sual thawinâk voikhat lawng a tuah hnu ah Pathian orhlei kam ah a ṭhu; 13cu cân thawk in a ral pawl a ke tang i a chiah hlan lo a hngah ko. 14Zeitintiah voi khat raithawinâk nih thianter lengmangmi hna cu zungzal ca in a tlinter cang hna. 15Thiang Thlarau zong nih a kan hngalhpi i hibangin a rak chim cang. 16“Cu ni hna hnu ah, an sin i bia ka kam ding cu hi bangin a si lai tiah, BAWIPA nih a ti. An lungthin ah ka nawlbia ka chiah lai i an ruahnâk chungah ka ṭial lai,” 17“An sualnâk le nawlbuarnâk zong kâ cinken ti lai lo,” tiin. 18Cubangin sual ngaihthiamnâk a umnâk hmunah sualthawinâk a um lengmang a herh ti lo. 19Cucaah unau hna, Jesuh thisen thawngin hmunthiang bik i luhnâk dingah ralṭhatnâk kan ngei, 20A taksa lanin onmi puanzar kha kan caah a kan ruah piakmi lam thar le a nungmi lam cu a si, 21cun Pathian chungkhar ah Tlângbawi Nganbik kan ngeih caah, 22lung taktak le zumhnâk i hngalhfiannâk ngeiin, kan lungthin i a thûrmi chiaṭha hngalhnâk hna kha thian terin kan taksa zong a thiangmi ti ah i kholh in Amah cu naih u sih. 23Kan i ruahchanmi zumhnâk hi â hninhlonâk dingah fek tein i tlai u sih, zeitintiah Biakamtu cu zumhtlâk a si. 24Cun dawtnâk le thilṭha tuahnâk in i tharthawh dingin ruat cio u sih. 25Cheukhat nih an ngol bangin, hmunkhat te ah i pumh lengmang hi ngol hlah usih, Ni cu a naih chin lengmang bangin i forhchin lengmang in pakhat le pakhat nan lung thawhter i zuam u. 26Zeitintiah biatak hngalhnâk kan co hnu i hrâmhrâm i kan sual lengmang ko ahcun sualnâk caah raithawinâk a um ti lai lo, 27a phân laimi biaceihnâk ṭihnung, A ral hna khangtu ding thinhunnâk mei lawng an hngahmi cu a si. 28Moses nawlbia buartu hna cu hngalhpitu pahnih pathum bia in zângfahnâk tel loin an thi tawn. 29Pathian Fapa a lamh chih i amah thiantertu biakam thisen a sawhsawh in a ruat i zângfahnâk Thlarau a cawhdehtu cu zeitluk a fakmi hremnâk dah tuar awktlâk ah nan ruah? 30“Zeitintiah phuhlam cu Keimah ta a si, Keimah nih ka lehrul lai, ti le, BAWIPA nih a mi le hna cu bia a ceih lai,” titu cu Mi zei a si kha kan hngalh. 31A nungmi Pathian kut i tluk cu ṭih a nung tak takmi a si. 32Hlan i ceunâk nan rak hmuh hnu i temtuarnâk le buainâk nganpi nan tuarmi kha ruat ṭhân hmanh u, 33cân khat khat cu minung hna conh awkah zomhtaih le harnâk chungah nan um, cân dangah cubantuk i tuahmi hna tuarpinâk ah nan um, 34zeitintiah ka cikcin ruangah nanka zângfah i nan thil an lâk zongah lunglawm tein nan in khawh, vanah a ṭha chinmi chawva zungzal a uhmi nan ngeih kha nan hngalh. 35Cucaah a liannganmi ṭuanman a ngeimi, nan zumhfehnâk kha hlawnh hrimhrim hlah u. 36Zeitintiah Pathian duhnâk nan tuah hnu i a kamhmi nan co khawh nâkhnga inkhawhnâk nan herh. 37Zeitintiah a rauh hlan ah ara dingmi cu ara lai, a rau lai lo. 38Ka miding cu zumhnâk in a nung lai. Hnulei a tawlh ahcun a cungah kâ lawm lai lo. 39Kannih cu lotlau dingin hnu leiah a tawlhmi kan si lo i nunnâk khamh dingin zumhnâk ngeitu kan si.
Currently Selected:
HEBRU 10: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
