HEBRU 12
12
1Cuticun kannih zong, hi tlukin a liannganmi hngalhpitu bu nih minmei bangin ankan kulh caah kan thilrit hna le fawi tein a kan foih kho tu sualnâk kha hlonh hna u sih law, kan hmai i tlikzuamnâk a ummi ah inkhawhnâk he tli u sih, 2Jesuh kan zumhnâk hrampi le tlintertu lei khi zoh in tli u sih, Anih nih cun a hmai lei i chiahmi lawmhnâk ruangah ningzahnâk zeirel loin vailamtahnâk kha tuar in Pathian ṭhutdanh orhlei kamah a ṭhu. 3Zeitintiah nan nunnâk kha thaba le zângder i a um sualnâk hnga lo, cubantuk i misual hna nih an ralchanhnâk le a temtuarnâk hna cu ruat tuah u. 4Thisen chuak lakin sualnâk hi nan doh rih ṭung lo. 5Fa le chimhhrin bangin chimhhrinnâk bia kha nan philh cang dah ra: “Ka fapa, BAWIPA chimhhrinnâk kha zeirel loin um hlah, sîk na si tikah na lungdong hlah seh. 6BAWIPA nih a dawtmi kha a chimhhrin tawn i a lawmhmi fa kha a velh tawn.” timi hi. 7Chimhhrinnâk nan tuar a si ahcun Pathian nih a fale bantukin an zoh hna tinâk a si, pa nih a chimhhrin lomi fa an um bal maw? 8Fa nih a huahmi chimhhrinnâk nan huah lo ahcun fatak si loin lakfa nan si tinâk a si lai. 9cuhlei ah kan ṭhatnâk dingah minung phungin pa le kan ngei, annih zong kan hmaizah hna. Cuhna nâkin a ngan deuhmi kan nun nâkhnga thlarau lei Pa nawl in kan um lai lo maw? 10Zeitintiah annih nih cântawi te chung ṭha an ti ningin an kan chimhhrin tawn, Anih nih cun kan ṭhatnâk dingin le a thiannâk kan i hrawm khawh nâkhnga a kan chimhhrin tawn. 11Cun chimhhrinnâk hi in lio ah cun lawmhnâk leiin a lang kho lo, a fak taktak mi a si; asinain inkhawh hnu ah hnangamnâk theipar, dinnâk kha a chuahter. 12Cucaah kuat uaimi kha ṭhawnter hna ulaw, khuk dermi zong ṭhawnter hna u, 13cuticun kebei mi kha tlu sawn loin damter an si nâkhnga, nan ke caah nan lam kha dinter hna u. 14Mi vialte he i remnâk le thiannâk kha dawi u, cu thiannâk loin ahohmanh nih Bawipa an hmu lai lo. 15I ralring u, Pathian zângfahnâk ah tling loin nan um sual lai. Khâtnâk hram a corhmi nih an buaiter hna lai, mi tampi nih thûrhnomhnâk ah an hman cang; 16culoahcun, nupa sualnâk tuah hmangmi le Esau bangin Pathian upat lomi a um sual lai. Anih nih a fater sinâk kha rawl voikhat eiah a zuar. 17Cuhnu ah thluachuahnâk cu coṭhân a duh hmanh ah cohlan piak a si ti lo i mitthli he kawl len hmanhsehlaw ngaihchinnâk cânrem a hmu ti lo ti kha nan theih. 18Zeitintiah nannih cu tongh khawhmi tlâng, mei i kanghmi, khuadawm, khuamui, thli, 19muko thawng le biachim thawng umnâk hmun a phânmi nan si lo, cu thawng theitu hna nih biadang an sin i chim ti lo ding tiangin an nawl. 20(Zeitintiah nawlpêkmi kha an tuar kho ti lo: “Cun saṭil hmanhnih tlâng kha a tongh ahcun thi lakin lung i cheh, asiloah feiin thi lak i chunh ding a si,” 21An hmuhmi thil ṭih a nunning cu, Moses hmanh nih, “Ka ṭih tuk i a ka therh lengmang ko,” tiah a ti.) 22Asinain nannih cu Zion tlâng, Pathian nung khualipi, van Jerusalem, relcawklo vanmi hna civuipi, 23fater van i min bunhmi kawhhran hna, mi vialte cung i biaceihtu Pathian, midik thlarau tlamtlintermi, 24Jesuh biakam thar lamkaltu, thisen theh, Abel thisen nâk in bia ṭha deuh chimtu hna sinah a phânmi nan si. 25I ralring u Biachimtu hi nan rak hlawtsual lai. Zeitintiah vawlei i Biachimtu an duh lo ruangah hremnâk in an luat khawh lo ahcun van in Biachimtu zei i kan rel lo sual ahcun kan luat lo chin chin lai, 26kha cân ah a aw nih vawlei hi a rak hninh; atu ah, “Vawlei lawng hmanh si loin, voikhat cu van zong ka hninh lai,” tiah bia a rak kam ṭhân. 27Cubangin voikhat cu, timi nih hin, hninhkhawh lomi lawng an hmun lai, hninh cangmi hna cu, sermi thil dang bantukin lo lak i ṭhial an si dih lai, tinâk a si. 28Cucaah hninhkhawh lomi ram a cotu kan si caah, zângfahnâk ngei u sih, cuthil ruangah Pathian ṭihzah buin Amah cohlan awktlâk in a rian kan ṭuan khawh lai. 29Zeitintiah kan Pathian hi kânghtu mei a si.
Currently Selected:
HEBRU 12: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
