HEBRU 11
11
1Zumhnâk hi ruahchanmi thil a um taktak tiah hngalhnâk, hmuh lomi thil hmuhfiannâk a si. 2Zeitintiah cu zumhnâk ruangah upa hna nih minṭhatnâk an rak co cang. 3Vawlei hi Pathian bia in ser a si tiah kan hngalhnâk cu zumhnâk a si, cuticun hmuhkhawh mi hna hi a langkhomi i ser an si lo. 4Zumhnâk in Âbel nih Kain nâkin raithawinâk ṭha deuh Pathian sinah a pêk, cunihcun miding a sinâk a langhter, a pêkmi cu Pathian nih a hngalhpi i cu thil nih a thih hnu tiangin bia a chim. 5Zumhnâk in Enok kha thi loin lo lakin lâk a si i, “Pathian nih a lâk ruangah an hmu ti lo,” lâk a si hlanah Pathian lawmhtertu a si tiah hngalhpinâk a ngei. 6Zumhnâk lo in Amah lawmhmi si khawh a si hrimhrim lo; Pathian sinah a rami nih, Amah cu a um ti kha a zumh hrimhrim lai i biatak chuah in a kawltu sinah laksawng petu a si ti kha a zumh awk a si. 7Zumhnâk in Noa cu hmuh rih lomi thil kongah cung leiin ralrin pêk a si, Pathian ṭih buin a chungkhar khamhnâk caah tilawng a tuah, cu nih cun vawlei kha thiamlo a coter i zumhnâk ningin dinnâk ro cotu a si. 8Zumhnâk in Abraham nih a co hngami hmun i kal dingah kawhnâk kha a pom. A kalnâk ding hmun hmanh hngal loin â thawh cawlh. 9Zumhnâk in kamhmi ramah ramdangmi bangin a um i â lomi biakam copitu Isaak le Jakob hna he puanthlâm chungah an um, 10zeitintiah Pathian hrimhrim nih a dirh i a sakmi le hrambunhmi khualipi kha a hngah. 11Zumhnâk in Sarah zong nih biakamtu zumhtlâk sinâk kha a zumh ngam ruangah tar a si hnu ah fa pawi dingin ṭhawnnâk a co i fa a hrin. 12Cucaah mi pakhat, mithi bang a si cangmi sinin van arfi bangin a tammi le rihli kam i relcawk lo these zat bantukin tampi an rak chuak. 13Cuhna cu an dihlak in zumhnâk ngei in an thi i biakammi thil tu cu an co manh lo, asinain lamhla pi in an rak hmuh chung cang, lungdai tein an rak i lawmhpi i vawlei ah hin khual le ramdangmi bantuk an si kha an rak hngalhter cang. 14Zeitintiah cubantuk an chimmi nih anmah ca i ram a kawlmi an si kha a langhter. 15Cun an rak chuahnâk ram nih an lung lenter hna sehlaw kirṭhân dingah cânrem zong an ngei ko lai. 16Asinain an duhmi cu ram ṭha deuhmi a si i cucu vanram a si. Cucaah Pathian nih an Pathian si a ning a zak lo i an caah khualipi a rak timhtuah piak hna. 17Zumhnâk in Abraham cu hniksak a si lio ah khan, Isaak kha a pêk, biakamnâk a hmutu nih a fapa ngeihchun kha a pêk; 18“Isaak ah hin na tefa tiah kawh an si lai” tiah a rak chim cang. 19Pathian nih mithi zong a thawhter khawh ko tiah bia tlâng a komh i thih nâkin a nung ṭhanmi bangin a hmuh ṭhân tak tak. 20Zumhnâk in Isaak nih a ra laimi thil kongah Jokob le Esau kha thluachuah a pêk hna. 21Zumhnâk in Jakob nih a thih laiah Josef fale cu thluachuah a pêk hna i a ṭhiangṭhunh zim hngatchan in Pathian a biak. 22Zumhnâk in Josef nih khan a thih cân a naih tikah, Israel hna an chuahnâk ding kong a chimchung i a ruh kong i an tuah hngami tiang a chimh chung hna. 23Zumhnâk in Moses a rak chuah lio ah khan, â dawh ngaimi nau te a si caah, bawi nawlpêk hmanh ṭih loin, thlathum chung a nu le pa nih an thuh. 24Zumhnâk in Moses kha a upat tikah, Faraw fanu fapa ah um a duh lo; 25a lo ṭhân ding sualnomhnâk chungah um duh loin Pathian mi hna he fahnâk tuar kha â thim deuh. 26Krih ruang i minchiatnâk cu Ezip ram i rumnâk nâkin chawva sunglawi deuh ah a ruah i a hmuh hngami laksawng kha a conh peng caah. 27Zumhnâk in bawi thinhun lai zong ṭih loin Ezip ram cu a chuahtâk i hmuh khawh lo cu ahmuh ruangah lungsau in a in ko. 28Zumhnâk in lanhtâk Thô le thisen theh kha hram a thawk piak hna i hrawktu nih khan an fater a tongh ve nâkhnga lo. 29Zumhnâk in Rihli sen kha tlângcung kal bangin an tan i Ezip mi hna nih kalve an timh i ti nih a khuh dih hna. 30Zumhnâk in Jeriko khua kulhnâk kha ni sarih an vel hnu ah a cim. 31Zumhnâk in Rahab hlawhhlâng nu kha ngiathlaitu hna ṭha tein a rak zohkhenh hna caah zumlotu hna lakah a thi ve lo. 32Zeidah kan chim rih lai? Gidion le, Barak le, Samson le, Jeptha le, David le, Samuel le Profet hna kong kha chim ninglaw, cân nih a kan zo lai lo; 33cu hna nih zumhnâk in ram an lâk i dinnâk an tuah, biakammi kha an co i chiandeih kâ zong an phih, 34ṭih a nungmi mei alh an mihter i a hârmi vainam in an luat, derthawm nâkin ṭhawnter an si, raldohnâk ah mi ralṭha an si i ramdang ralkap kha an zâmter hna. 35Nuhna nih an mithi thoṭhân an hmuh, Midang nih tukthah an tong, thawhṭhânnâk ṭha chin an co khawh nâkhnga luatnâk zong an kawl duh lo. 36Cheukhat nih mi nisawh le sikvelh an tuar, asi, thongchung ah hrengkhenh in an um. 37Lungin an cheh hna, hluahin an tan hna, tukforhnâk an ton i vainam in thah an si. Tuphaw le meheh phaw i hruk in an vakvai, sifak ngai le, har ngai in, diriam ngaiin an rak serhsat hna - 38cu hna caah cun vawlei hi umnâk tlâk a si lo. Ramcar le tlangcung le, lungkua le khor chung hna ah an um tawn. 39Cuticun cu vialte hna nih zumhnâk thawngin thangṭhat an rak co i biakam mi tu cu an rak co rih lo. 40Pathian nih annih le kannih â ruang tein tlamtlinter i kan um khawh nâkhnga, a ṭha chinmi thil a kan ruah piak caah a si.
Currently Selected:
HEBRU 11: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
