GALATIH 4
4
1Hitihin ka chim, ro cotu cu zeizong vialte cungah hotu sihmanhsehlaw, ngakchia a si chung pauh cu sal he an i thleidang lo, 2a pa ruahmi cân a phâk hlan lo cu zohkhenhtu tangah a um ko rih. 3Cubantukin kannih zong ngakchia kan si lio ah, vawlei cawnpiaknâk hram tangah sal in kan rak um. 4Asinain a tlingmi cân a phâk tikah, Pathian nih a Fapa cu a run thlah, nu hrin nâkin, nawlbia tangah a rak chuak, 5cucu nawlbia tang i a ummi kha tlanh awk le, fa sinâk kan co khawh nâkhnga caah a si. 6Fa nan si caah, Pathian nih a Fapa Thlarau cu nan lungthin ah a run thlah i, “Abba, Ka Pa,” tiin a au. 7Cucaah sal nan si tilo fa nan si cang, cun fa nan si ahcun Krih thawngin Pathian ro cotu nan si. 8Asinain Pathian nan rak hngalh lo cân ah khan an kokek hrim hrimah pathian a si lomi hna rian nan rak ṭuan tak tak. 9Atu Pathian nan hngalh hnu ah, asiloah, Pathian hngalhmi nan si hnu ah tiawk a si deuh, zeitindah san a tlai lomi cawnpiaknâk hramah i mer in cu sal i um cu nan duh ṭhân khawh rih? 10Ni le thla, cân le kum hna nan ulh ṭhânmi hi. 11Nan caah thazâng ka chuahmi pakpalawng a si sual lai kha ka phâng ko. 12Unau hna keimah bantuk si dingin kan nawl hna, keizong nanmah bantukin ka um. Fahnâk nanka pe hrimhrim lo. 13Thawngṭha nan sin i ka chim hmasat tan ah khan ka taksa derthawm tuk ruangah a si kha nan hngalh. 14Ka taksa cung i hneksaknâk a ummi kha nan zomhtaih lo i nan hlaw fawn lo. Pathian vanmi hna le, Jesuh Krih bantukin nanka cohlan kha. 15Vanṭha nan i tinâk vialte kha zeitindah a um kun? Sikhosehlaw nan mitmu hmanh coih i pêk nanka duh ti kha ka philh lo. 16Biatak kan chimh hna ruangah nan ral ah ka cang maw? 17Ṭhahnem ngai ngaiin nanmah lemsawi an timtu hna kha nan ṭhatnâk ding an duh ruangah a si lo, anmah lei nan hoih i a dang tein lâk an in duh hna ruangah a si. 18Thilṭha tuah dingah, nan sin ka um lio lawng si loin zeitik cân pauhah ṭhahnem nan ngaih awk a si. 19Ka unau hna, nan lakah Krih muisam langhhter a si hlan pauh cu nau nganfah bangin nan caah ka ngan a fâk. 20Atu lio hna ah hin nan sin i um i ka aw thlen ka duh ngai ngai, nan kongah ka lung a hring. 21Nawlbia tang i um a duhmi hna ka chim tuah u, nawlbia cu nan thei bal lo maw? 22Hitihin ṭial a si. Abraham nih fapa pahnih a ngei, pakhat cu salnu sin in, a dang pakhat cu zalongnu sin in. 23Asinain salnu sin in a chuakmi cu thisa phungin a chuak i zalongnu sin in a chuakmi cu biakammi ruang i a chuakmi a si. 24Cu bia cu zohchunh ding a si. Zeitintiah cucu biakam pahnih an si. Pakhat cu Sinai tlang, sal siding i fahringtu Hagar a si. 25Cuticun Hagar hi Arabia ram i Sinai tlâng a si i atu lio Jerusalem sining he â khatmi a si, a fa le he salah an um. 26Asinain cunglei Jerusalem tu cu zalongmi a si i cucu kan nih vialte nu a si. 27Hitihin ṭial a si, “Maw, nang, a cingmi, Fa ngeilo nu i lawm tuah. Nang nau nganfah a tuar bal lomi, au tuah. Va ngeimi nu nâkin lileng nu nih fa tamdeuh a ngei.” 28Unau hna, kan nih hi Isak bangin biakam fale kan si. 29Asinain thisa phung i a chuakmi nih khan, Thlarau phung i a chuakmi a serhsat bantukin, atu zongah cubantuk a si. 30Asinain Cathiang nih zeitindah a chim? “Salnu cu a fale he ṭhawl hna u; zeitintiah salnu fapa nih zalong nu fa kha ro a copi kho lai lo,” tiah a ti. 31Cuticun unau hna, salnu fale kan si lo, zalong nu fale kan si.
Currently Selected:
GALATIH 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
