GALATIH 3
3
1Maw Galati mihrut hna! Biatak zumlo dingah ahonihdah an in doih hna? Jesuh Krih cu nan mithmuh hrimhrim ah fiang tein khenhchih a sinâk cu langhter a si lo mei? 2Hi lawng hi nansin in hngalh ka duh. Thlarau nan comi kha nawlbia nan tuah ruangah maw nan co, zumhnâk bia nan theih ruangah dah? 3Hi tluk in maw nan hruh cang? Thlarau in nan thawk i pumsa in tlinter nan timh maw? 4Pakpalawng a si taktak ahcun, thil vialte kha pakpalawng in maw nan in kun lai? 5Nansin i Thlarau an petu le khuaruahharnâk a tuahtu nih khan, nawlbia tuahsernâk in maw an pêk hna zumhnâk bia nan theih ruangah dah? 6“Abraham nih Pathian a zumh, cucu a dinnâk ah ruahpiak a si bangin.” 7Zumhnâk i a ummi lawnglawng Abraham fa an si, ti kha hngal ko u. 8Cathiang nih a hmuh chungmi cu, zumhnâk thawngin Pathiannih Gentel mi hna thiam a coh lainâk hi a si, “Nangmah ah miphun vialte thluachuah an si lai,” tiin Abraham sinah hi thawngṭha hi chim a rak si cang. 9Cuticun zumhnâk i a ummi hna kha, zumtu Abraham he thluachuah an si. 10Zeitintiah Nawlbia tuahsernâk tang i a ummi hna cu chiatserhnâk tangah an um; zeitintiah Nawlbia cauk chung i ṭialmi vialte a tuah peng lomi hna cu chiatserh si ko seh, tiah ṭial a si. 11Asinain Pathian mithmuh ah nawlbia tuahsernâk in thiam a comi an um lo, ti cu a fiang “Zeitintiah miding cu, zumhnâk in a nung lai,” tiah ṭial a si. 12Cuhleiah Nawlbia cu zumhnâk he â tlai lo, “Cubantukin a tuah ahcun, a tuah ningin a nung lai,” ti a si. 13Krih cu kan ai awh-in chiatserh a si i nawlbia chiatserhnâk chungin a kan tlanh cang (zeitintiah thingkung cungah thlaimi pauh cu chiatserhmi an si,” tiah ṭial a rak si,) 14cuticun Abraham sin i thluachuahnâk cu Krih Jesuh thawngin Gentel mi hna cungah a um kho lai, cuticun zumhnâk thawngin kamhmi Thlarau kha kan hmuh khawh lai. 15Unau hna, minung phungin ka chim. minung biakam zong sihmanhsehlaw, fehter cangmi cu an phoih ballo i an chap bal fawn lo. 16Cuticun Abraham le a tefa sinah bia cu kamh a rak si. Mi tampi sin chim bangin, na tefa hna sinah, a ti lo i mi pakhat sawh in, na tefa sinah, ti a si, cucu Krih hi a si. 17Cun hitihin ka ti, Biakam, Pathian nih Krih ah a fehtermi cu, nawlbia kum 430 hnu i a ummi nih khan zeihmanh loah canter in a hrawk kho lo. 18Zeitintiah ro cotu cu nawlbia tuahsernâk ruang i coter a si ahcun biakam ruangah a si kho ti lo. Pathian nih ro cotu ding cu biakam in Abraham sinah a pêkmi a si. 19Cutiasiahcun nawlbia hi zeidah a um chan? Nawlbuarnâk ruangah tefa a rak langh hlan i biakammi chaptu ah pêk a si; cucu vanmi remnâk lamkaltu hna hmangin pêk a si. 20Lamkaltu hi mi pakhat sinah lamkal an sibal lo. Pathian tu cu pakhat a si. 21Nawlbia nih Pathian biakam cu a ralchanh maw? Ralchanh naisai hlah. Nuntertu nawlbia hi pêk rak si cang sehlaw, dinnâk zong nawlbia thawngin a um tak tak awk a si. 22Asinain Jesuh Krih zumh ruang i biakammi cu a zumtu hna sin i pêk a si khawh nâkhnga, Cathiang nih zeizong vialte hi sual nawlngeihnâk tangah a hrenh dih hna, tiah a ti. 23Asinain zumhnâk a rak phâk hlan i zumh hngami cu langhter a si hlan ah khan nawlbia tangah kilven kan rak si. 24Cuticun zumhnâk thawgin thiam kan co khawh nâkhnga nawlbia cu Krih lei ah a kan hruaitu a si. 25Asinain zumhnâk a rak phâk hnu ah cun hruaitu tangah kan um ti lo. 26Zeitintiah Krih Jesuh zumhnâk thawngin Pathian fale nan si dih cang. 27Zeitintiah nan lakah Krih chungah baptisma a ingmi vialte cu Krih in nan i thuam cang. 28Cuka ah Judah siseh, Grik siseh um khawh a si lo. Cuka ah sal siseh, miluat siseh um khawh a si lo, pa le nu zong an um kho hlei lo. Krih Jesuh ah nan dik lakin pumkhat nan si. 29Cun Krih ta nan si ahcun, Abraham tefa nan si i biakammi bangin ro cotu nan si.
Currently Selected:
GALATIH 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
