EFESA 3
3
1Hiruangah hin keimah Paul, nanmah Gentel mi hna caah Krih Jesuh ah thong i a tlami hi- 2nan ca i Pathian zângfahnâk rian aka pêkmi hi nan hngalh tak tak ahcun, 3zeitindah cu biathli cu langhnâk i hngalhter ka si kha (hlan ah tawi tein ka ṭial cangmi kha, 4kha kha nan rel tikah Krih biathli ka hngalhning hi nan theihthiam ko lai), 5Thiang Thlarau nih atu lio i a thiangmi a lamkaltu hna le profet hna sinah a langhter bantukin, cuhlan ah minung fale hna sinah hngalhter a rak si lo: 6Cu biathli cu Thawngṭha thawngin Krih ah Gentel mi hna hi rocopi hawi, pum ṭengnge, biakam co pitu an si, timi hi a si. 7A ṭhawnnâk rian, hmual a ngei ngaimi in ka sinah pêk a simi Pathian zângfahnâk thilpêk ningin cu thawngṭha rianṭuantu ah cantermi ka si. 8mithiang vialte hna lakah a hme bik nâkin a hme deuhmi ka si nain, a dongh kho lomi Krih rumnâk hi Gentel mi hna sinah ka chim nâkhnga, 9Jesuh Krih thawngin zeizong vialte sertu Pathian nih zungzal in a rak thuhmi i hawikawmhnâk biathli cu mi vialte sinah phuang dingin hi zângfahnâk hi pêk ka si. 10Cuticun van hmun i bawinâk le nawlngeihnâk tiangah khin a liannganmi Pathian fimnâk hi kawhhran hna nih an hngalhter khawh lai, 11cucu zungzal a rak tinhning tein kan Bawipa Jesuh Krih ah a tlinter. 12Amah i zumhnâk thawngin amah lila ah khan ralṭha le ngamh ngaiin luh khawhnâk kan ngei. 13Cucaah nanmah ruang i kan inmi harnâk ruangah nan lung dong hlah seh, cucu nan sunparnâk a si. 14Hi ruangah hin kan Bawipa Jesuh Krih i a Pa hmaiah khuk bilin ka kun tawn, 15Amah cu lei le van i chungkhar vialte nih min an i bunhnâk a si. 16A rummi a sunparnâk bangin nan chunglei minung kha Amah Thlarau nih ṭhawnnâk an pêk hna lai, 17cun zumhnâk thawngin Krih cu nan lungthin ah khua a sak khawhnâk hnga le dawtnâk ah hram nan bunh i hngatchan miah nan i ngeih khawh nâkhnga, 18mithiang vialte hna he, a kauhning, a sauning, a thuhning le a sanning hna hngal kho ding le, 19hngalh cawk lomi Krih dawtnâk hngal kho dingin Pathian tlamtlinnâk i tlinter in nan um kho lai. 20Cuticun kanmah i rian a ṭuan tawnmi ṭhawnnâk bangin kan halmi le kan ruahmi vialte nâk i tam deuh i rian a ṭuan khotu sinah, 21zungzal in chan vialte tiangin kawhhran le Krih ah sunparnâk um ko seh. Amen.
Currently Selected:
EFESA 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
