EFESA 2
2
1Cun nannih nawlbuarnâk le sualnâk ruangah a thimi nan si lioah Amah nih an nunter hna; 2hlanah hi vawlei phung ningin khua nan rak sa, vanrâng i ṭhawnnâk bawi, atu i nawlngai lomi hna chungah rian a ṭuntu thlarau duh ningin, 3kannih zong hlanah cun kan thisa duhnâk zulin anmah bantukin kan rak um ve, thisa ruahnâk le duhnâk zulh in kan rak nung i midang bantukin kan kokek in thinhunnâk fa kan rak si. 4Asinain Pathian, zângfahnâk in a rummi le a liannganmi dawtnâkin a kan dawt caah, 5nawlbuar ruang i a thimi kan si lio ah, Krih sinah a kan nunter (zângfahnâk in khamh nan si), 6cun hmunkhat ah an kan thawhter i van hmunah Krih Jesuh he hmunkhat ah a kan ṭhutter, 7ara laimi chan ah Krih Jesuh thawngin avelngeihnâk le a rum tak takmi a zângfahnâk cu kan cungah a langhter khawh lai. 8Zeitintiah zumhnâk thawngin zângfahnâk i khamh nan si, cucu nanmah ta a si lo, Pathian thilpêk a si, 9tuahsernâk in a si lo, culoahcun, an ruam a kai sual lai. 10Thilṭha tuah dingah Krih Jesuh ah sermi kan si i Amah kutchuak kan si, cu thilṭha tuah cu kan umnâk dingah Pathian nih a rak timhlamh ciami a si. 11Cucaah nannih, taksa in Gentel, taksa kut i cuarpartanmi nih, ‘cuarpartanlomi’ an ti tawnmi hna, 12kha cân ah khan Krih tel loin nan um i Israel khua le ram le kamhmi biakam chungin khual nan si i hi vawlei ah Pathian ngei lole ruahchannâk ngei loin nan rak um. 13Asinain atu cu Krih Jesuh ah, nannih lam hla pi ah a ummi kha Krih thisen in nai te ah chiah nan si cang. 14Zeitintiah Amah hrimhrim cu kan daihnâk, a lai fangah ṭhennâk vanpang a hrawk i bu hnih kha bu khat ah a tuahtu a si, 15phunglam le nawlbia le nawlpêk hna nih an chuahpi mi ralnâk cu a taksa in a hrawk i pahnih hna cu Amah ah mithar pumkhat ah ser in, daihnâk kha a ser, 16cun i ralnâk kha thah piakin pahnih hna cu vailamtahnâk thawngin Pathian ah taksa pumkhat ah can terin i remṭhânnâk kha a tuah khawh lai. 17Cun a ra i nannih hla piah a ummi le, annih nai teah a ummi hna sinah daihnâk an chimh hna. 18Amah thawngin Pa sinah Thlarau pakhat in luhkhawhnâk kan ngei. 19Cucaah atu ah cun, khual le mising nan si tilo i mithiang hna he laikhat le Pathian inn chungkhar nan si cang. 20Lamkaltu le Profet hna bunhmi lung cungah sakmi nan si, cu inn ah a biapi bikmi a kil lung cu Krih a si, 21cu inn cu a ningpiin Amah ah pehtonh an si i Bawipa ah a thiangmi ṭempal ah a cang tawn, 22nannih zong Amah ah Thlarau i Pathian umnâk dingah pehtonh i sakmi nan si.
Currently Selected:
EFESA 2: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
