EFESA 4
4
1Cucaah, kawh nan sinâk he â tlakmi nunning i nun awkah, kei, Bawipa i thong a tlami nih kan nawl hna; 2toidornâk le nunnemnâk, lungsaunâk le dawtnâk i inkhawhnâk vialte he 3daihnâk ah i funtom in, Thlarau i pumkhat sinâk kha i tlaihpeng u sih. 4Ruahchannâk pakhat i kawh nan si bangin, pum pakhat le Thlarau pakhat lawnglawng a um, 5Bawipa pakhat, zumhnâk pakhat, baptisma pakhat, 6Pathian pakhat le zeizong vialte Pa, zeizong vialte cungah, zeizong vialte lan in, zeizong vialte chung le nan dihlak chungah a ummi a si. 7Asinain Krih thilpêk tahnâk bangin mikip sinah zângfahnâk cu pêk a si. 8Cucaah hitihin a chim, “Cunglei i a kai lio ah khan, tlaihmi sal kha â kaipi hna i, minung sinah thilpêk a pêk hna. 9(Cubangin, “A kai timi hi zeidah a sullam? Vawlei tang bikah a rung ṭum khawh nâkhnga. 10A rungṭummi cu van vialte cung i a kaimi kha a si, cucu thil vialte ah a khah dih khawh nâkhnga caah a si.) 11Amah nih cheukhat lamkaltu ah, cheukhat profet ah, cheukhat evangelist ah, cheukhat pastor le cheukhat cawnpiaktu ah a pêk hna. 12zeitintiah mithiang hna timhtuahnâk i rianṭuantu ding le Krih pum ṭhanter dingah, 13Pathian Fapa theihhngalhnâk kong le zumhnâk ah kan dih lakin pumkhat kan si nâkhnga, Krih tlamtlinnâk bantukin nutling patling ah kan i chuah lai i 14fimzer ngai le thiam ngaiin mi a hlengtu cawnpiaknâk thlitu phunkip nih a thenh lengmang mi ngakchia si ti loin, 15dawtnâk in biatak tu kan chim lai i Lu a simi Amah ah a lamkip in kan ṭhang kho lai- 16Amah in pum dihlak kha, rem tein hmunkhat ah pehtonh dih in, nge vialte rianṭuan ning cio cu fonh in, dawtnâk i i sersiam awkah, pum cu a ṭhanter tawn. 17Cucaah hihi Bawipa ah kan hngalhter hna, santlai lomi ruahnâk ngeitu, Gentel mi bangin um ti hlah u. 18Annih cu Pathian nunnâk chungin ṭhen an si i an ruahnâk cu a mui dih, an lung a khon ruangah i hngalhchuahnâk an ngei kho ti lo, 19cu hna cu poi tinâk ngei lo le ningzah hngal loin, thûrhnawmhnâk ah zat ti um loin, hornâk ah an i pumpe. 20Asinain Krih ah nan cawnmi cu cubantuk a si lo. 21Amah cu nan theih i Amah cawnpiakmi nan si taktak ahcun, Jesuh i a ummi biatak bang khan, 22hlan lio nan nunning i minung hlun ziaza, hlen a duhmi kha i phoih u law, 23nan ruahnâk thlarau ah tharchuah in um ko u, 24minung thar, dinnâk le thiannâk taktak Pathian duhning i sermi in i thuam u. 25Cucaah, lihchim ngol in, mikip nih mahle inpa sinah biadik chimseh, zeitintiah pakhat le pakhat fonhmi membar kan si. 26“Thinhung ko, sualnâk tu tuah hlah,” na thinhunnâk nitlâk pi hlah, 27khuachia caah hmun pe hlah. 28Firhmang nih fir ti hlah seh, chambau mi a bomh khawh nâkhnga a kut in ba lakin rian ṭuan seh. 29Bia ṭhalo nan kâ in chuak hlah seh, mi ṭhatnâk ding bia tu chim deuh ulaw, nan bia ngaitu caah zângfahnâk si ko seh. 30Pathian Thiang Thlarau kha ngaihchiatter hlah u, tlanhnâk ni caah Amah ah chinchiahmi nan si cang. 31Chiatkhâtnâk le, thinhunnâk le, thinhânnâk le, i siknâk le, thangchiatnâk vialte hlei ah, ruahnâk chia-kha vialte hi nan sinin hloh dih si hna seh. 32Pathian nih Krih ah an ngaihthiam hna bangin i zângfah in, vel i ngeih ulaw, i ngaithiam u.
Currently Selected:
EFESA 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
