EFESA 1
1
1Paul Pathian duhning i Jesuh Krih Lamkaltu nih, Efesa khua i mithiang hna le Jesuh Krih ah zumhtlâk a simi hna sinah: 2Pathian kan Pa le Bawipa Jesuh Krih sinin zângfahnâk le daihnâk nan sinah um ko seh. 3Thlarau lei thluachuahnâk phunkip Krih in vancung ramah thlua a kan chuahtu Kan Bawipa Jesuh Krih i a Pa le a Pathian cu thangṭhat in um ko seh; 4Ahmai ah a thiangmi le sawi awk um lomi kan si khawh nâkhnga vawlei hram thawk hlan in Amah ah dawtnâk in a kan thim cang, 5Amah duhnâk le ṭha a ti ningin, Jesuh Krih thawngin Amah fa bang i canter awkah a kan khaukhih cang, 6a sunglawimi a zângfahnâk thangṭhat dingin cu zângfahnâk ah cun dawtmi ah Amah nih a kan cohlân. 7A thisen thawngin Amah ah tlanhnâk le a rummi a zângfahnâk bangin sual ngaihthiamnâk kha kan co, 8fimnâk le khuaruahthiamnâk vialte in kan sinah zângfaknâk cu liam thluahmah in a kan pêk. 9Amah nih â tinhning le lawmhning tein, a duhnâk biathli cu kan sinah a phuan cang, 10A remruatmi cân a tlin tikah, Amah ah zeizong vialte, vanah a ummi le vuleiah a ummi he Krih ah a pumh dih khawh nâkhnga. 11Amah ah rocotu sinâk zong kan co cang, cucu Amah duhning le remruat ningin zeizong vialte tuahtu tinh ningin ruahciami a si, 12kannih Krih â bochan hmasatu hna hi a sunparnâk thangṭhattu kan si nâkhnga. 13Nannih zong biatak bia nan khamhnâk thawngṭha kha nan theih hnu ah Amah kha nan i bochan i zumh zong nan zumh hnu ah, kamhmi Thiang Thlarau in hmelchunh nan si. 14cucu a ta dingah cawkmi, tlanh an si hlan tiang a sunparnâk thangṭhat dingah, ro cotu kan sinâk ca i hamchungnâk a si. 15Cucaah, kei zong nih Bawipa Jesuh nan zumhning le mithiang vialte nan dawtnâk ka theih hnu ah, 16thla ka camnâk ah nanmin chimin nan caah lawmhnâk bia chim kha ka ngol lo. 17Kan Bawipa Jesuh Krih Pathian, sunparnâk Pa nih Amah hngalhnâk ah, biaphuannâk le fimnâk thlarau an pêk khawh hna nâkhnga, 18nan lungthin mit dei terin, Amah kawhnâkah ruahchannâk le, mithiang hna ro coding a sunlawi ning le a rumning kha nan hngalhfian khawh lai, 19cun khuaruhhar a thiltikhawhnâk i rian a ṭuanning le, kannih zumtu hna ca i a ṭhawnnâk a lianhnganning hi zeibantuk set dah a si, 20Krih ah khan zeitiset in dah a ṭuan i thihnâk in a thawhter i vancung ah a orhlei tiangah a ṭhutter ning le, 21bawinâk, nawlngeihnâk, ṭhawnnâk le uknâk vialte, hi vawlei lawnghmanh si loin a um laimi vawlei zongah min bunhmi vialte lakah cungnung bik a si. 22A ke tangah thil vialte a chiah i Amah cu zeizong vialte cungah lu bik si dingin khawhran hna sinah a pêk, 23kawhhran cu Amah pum, zeizong i zeizong ah a khat dihmi Amah tlamtlinnâk kha a si.
Currently Selected:
EFESA 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
