KOLOSE 3
3
1Krih sinah thawhter nan si ahcun cunglei Pathian orhlei ah a ṭhumi Krih umnâk i a ummi thil hna khi kawl u. 2Cunglei thil ah nan ruahnâk chia u law, leicung thil ah hin chia hlah u. 3Zeitintiah nan thi cang i nan nunnâk cu Krih he Pathian ah thuh a si. 4Kan nunnâk Krih a langh tikah nannih zong Amah sinah sunglawi ngaiin nanlang ve lai. 5Cucaah nan lei taksa ṭengnge nupa sualnâk, thûrhnawmhnâk, hornâk, duhnâk sual le hakkauhnâk, (cucu milem biaknâk a si)hna kha that hna u. 6Cuthil hna ruangah Pathian thinhunnâk cu zumlotu cungah a lang tawn. 7Nannih zong cubantuk thil hna tuah in nan rak nun lio ah khan, cubantuk thil tuah kha nan zia a rak si. 8Asinain atu cu nanmah ah thinhunnâk, thinhânnâk, huatnâk, thangchiatnâk le nan hmurkâ chuak fih a nungmi bia hi hlawnh hna u. 9Minung hlun cu a tuahsernâk he nan phoih cang bangkhan, lih i chim ti hlah u, 10zeitintiah hngalhnâk tling ngei ding le a sertu muisâm lo dingin tharchuah i a um cuahmah mi minung tharin nan i thuam cang. 11Cukaah cun Grik mi le Judah mi, cuarpartan le tanlo, miphun niam, Skuthia mi, sal le miluat zong um khawh a si lo, Krih cu zeizong ah zeizong a si. 12Cucaah Pathian thimmi, a thiangmi le dawtmi nan si bangin velngeihnâk, zângfahnâk, toidornâk, nunnemnâk le lungsaunâk in i thuam u; 13pakhat le pakhat karlakah sawinâk le ralchanhnâk bia nan ngeih ahcun lung sau tein i ngaithiam u, Krih nih an ngaihthiam hna bangin nan i ngaithiam hrimhrim awk a si. 14Cu thil vialte hna cungah dawtnâk i hruk u, cucu pumkhat sinâk i funtomnâk tlamtling a si. 15Cun Pathian daihnâk nih nan lungthin kha uk ko seh, cubantuk i um dingin pum pakhat ah kawh nan si, cun â lawmmi si u. 16Krih bia cu fimnâk phunkip he nanmah ah khat ko seh, biazâi le hla, thlarau lei hla hna in i cawm changin i cawnpiak u law, Bawipa sinah nan lungthin in zângfahnâk he hla sa u. 17Bia in siseh, tuahsernâk in siseh, nan tuahmi thil kipah Bawipa Jesuh min in tuah dih u law, Amah thawngin Pa Pathian sinah lawmhnâk bia chim u. 18Nupi le hna Bawipa mi sinâk he â tlak bangin nan vale sinah i pe u. 19Va le hna nan nupi le daw hna u law, an sinah chia-khâ tuk hlah u. 20Ngakchia hna, zeizong vialte ah nan nu le nan pa nawl ngai hna u, 21Pa le hna nan fa le thin hunter hna hlah u, culoahcun an lung a dong sual lai. 22Sinum hna, pumsa i nan hotu hna nawl kha zeizong vialte ah ngai u, mit rian ṭuntu le minung lawmh tertu men si loin, lungthin in i biatak u law, Pathian ṭihzahnâk he an nawl ngai hna u. 23Cun nan tuahmi thil vialte ah, minung caah ṭuan men si loin Bawipa ca i a tuahmi bantukin lungtho tein tuah u. 24Bawipa sin in nan ṭuanman nan co ding ro nan hmuh lai kha philh hlah u, zeitintiah Bawipa Krih riantu nan si. 25Asinain ṭhatlonâk tuahtu nih a tuahmi man cu a hmuh ko lai, zeitintiah thleidannâk zeihmanh a um lo.
Currently Selected:
KOLOSE 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
