2TIMOTE 3
3
1Asinain hihi philh hlah, ni hmahnung ahcun ṭih a nung mi cân an phân lai. 2Minung cu mah le mah â dawmi, phaisa a dawmi, tluangkhawn a hmangmi, miruamkai, Pathian thangchiattu, nu le pa nawl ngai lo, lawmh a hngal lomi le a tluangtlam lomi, 3dawtnâk ngei lomi, ngaihthiam a duh lomi, mi kongcaih a hmangmi, â sum kho lomi, nun chiakha, ṭhatnâk a huami, 4hlawt a hmangmi, lung khongmi, â uahmi, Pathian daw loin mah nomhnâk a daw deuhmi an si lai. 5Pathian duh ngaimi an i lawhter lai, asinain a ṭhawnnâk an zum lai lo. Cubantuk mi hna cu hrial hna. 6Zeitintiah cubantuk mi hna cu in kipah a lêng i zângdermi nu le sualnâk nih a nenhmi hna le duhnâk sual a phunphun i a rak tlu tawnmi hna hlengtu an si, 7cuhna cu a cawng lengmang ko nain biatak a pemh lomi an si. 8Janes le Jambres nih Moses an ralchanh bantuk khan, cubantuk mi hna nih biatak kha an doh, ruahnâk ṭhalo, zumhnâk kong i cohlan khawh lomi an si, 9cu hna caah hmainawr khawh a si lo, zeitintiah Janes le Jambres bantuk khan, an hruhning cu mi vialte hmuh ah a lang te ko lai. 10Asinain nang tu cu ka cawnpiaknâk le ka umtuning, ka tinhmi, ka zumhnâk, ka lungsaunâk le ka dawtnâk, ka inkhawhnâk le, 11serhsatnâk le harnâk inter ka sinâk kha na hngalh ko, Antiok le Ikonion le Lustra ah khan zeibantuk serhsatnâk dah ka ton kha na philh lo. Cu vialte chungin Bawipa nih a ka khamh. 12A si, Pathian-aṭanh i Krih Jesuh ah umpeng â timmi hna nih serhsatnâk kha an ton ko lai. 13Asinain misual le a deu in a nungmi hna cu an sual chin lengmang lai, mi an hlen hna lai i anmah zong hlenin an um ve lai. 14Asinain nang tu cu ahosinahdah na cawn kha hngal law, na cawnmi le na hngalhmi kha i nunpi, 15zeitintiah Krih Jesuh zumhnâk thawngin khamhnâk hmu lakin an fimter khotu Cathiang kha, na ngakchiat lio tein na hngalh cang. 16Cathiang vialte hi Pathian thawchuah hnawhmi an si i cawnpiaknâk le, chimhhrinnâk le, palhmi-remhnâk le dinnâk cawnpiaknâk caah a ṭhahnemmi a si, 17Pathian-mi cu rianṭha vialte ṭuan awkah felfai tein tlamtlinter a si khawh nâkhnga.
Currently Selected:
2TIMOTE 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
