2TIMOTE 2
2
1Cucaah ka fapa Krih Jesuh i a ummi zângfahnâk ah hin ṭhawng ngaiin um ko. 2Cun hngalhpitu tampi hna le keimah sinin na theihmi hna kha midang a cawnpiak chin khotu zumhawktlâk sinah pe chin hna. 3Cucaah Jesuh Krih ralkap ṭha bantukin harnâk kha lungsau in ing ko. 4Ralkap i a latu lungton dingah ralkap i a um liomi nih raldoh lio ah nunchung khuasaknâk in hna an i hnawhter bal lo. 5Cun minih tlikzuamnâk a ngeih tikah ningcang tein a tuah lo ahcun laksawng a hmu kho lai lo. 6Taihmâk te i rian a ṭuntu, lo ngeitu nih theipar hmasa cu a co awk a si. 7Ka chimmi hi ruat law Bawipa nih zeithilpauh ah theithiamnâk in pe ko seh. 8Ka chimmi thawngṭha Jesuh Krih cu David tefa, thihnâk in a thoṭhânmi a si ti kha philh hlah, 9zeitintiah cuthil ruangah sualnâk tuahtu bangin cikcin ṭembawh tiangin ka tuar, asinain Pathian bia tu cu ṭemkhawh a si lo. 10Cucaah Krih Jesuh khamhnâk cu zungzal i lianngannâk he an hmuh ve nâkhnga thimmi hna ruangah thil vialte ka tuar tawn. 11Hihi zumhawktlâk bia a si: Zeitintiah Amah he kan thih ahcun Amah he kan nung lai. 12Kan tuar ahcun Amah he bia kan ceih lai. Amah kan hlawt ahcun Amah zong nih a kan hlawt ve lai. 13Zumh tlâk loin kan um hmanh ah Amah cu zumhtlâk a si zungzal. Amah le Amah â hlaw kho lo. 14Hi thil hna hi hngalhter ṭhân hna, santlai lomi a ngaitu hna caah lohtlaunâk lawng a phâk pitu pakpalawng bia i el lengmang lo dingin Bawipa hmaiah chimhring hna. 15Pathian cohlan awktlâk si dingin i pe ko, biatak bia hmân tein ṭhen a thiammi rianṭuantu cu ningzah a herh lo. 16Pathian ṭihzahlo bia vaivuan a chim tawntu kha hrial hna, zeitintiah Pathian-zeirellonâk ah an zual chin chin lai. 17An cawnpiaknâk cu khensar bangin a karh lai. Humenia le Filet zong cu hna lakah an i tel ve, 18cuhna nih biatak kha pialtâk in thawhṭhannâk cu a si diam cangmi bangin an cawnpiak i cheukhat zumhnâk an hrawh piak hna. 19Asinain a fekmi Pathian lungphun cu a dirpeng ko, hi hmelchunhnâk hi a ngei: “Bawipa nih Ami le cu a hngalh” ti le, “Bawipa min a hlammi pauh nih sual kaltâk seh ti hi.” 20Asinain a ropi ngaimi in ah sui le ngun i sermi thil lawng an um lo, thing le tlâk i sermi zong an um ve, a sunglawimi an um lio ah a sunglawi lomi zong an um. 21Cucaah a hnu deuh chungin â thiantermi hna cu a thiangmi ûm, Bawipa hman awktlâk, rianṭha vialte caah timh ciain a ummi, sunh lawihmi ûm an si. 22Mino duhnâk kha zâmtâk law lungthin thiangin Bawipa kotu hna sinah felnâk zumhnâk dawtnâk le daihnâk kha dawi hna. 23Cun hruhthil le elhnialnâk ah i tel hlah, buaibainâk lawng a chuahter kha hngal ko. 24Bawipa sal caah buaibai awk a um lo, mi vialte cungah nunnem ngaiin cawnpiak khawh le inkhawh kha i zuam, 25toidornâk he anmah dohtu hna cu fianter hna seh, cuticun biatak an hngalh i an i ngaihchih tiang zongin Pathian nih a sian khawh ko, 26Cun Satan nih a duhnâk tuah awkah sal i a rak tlaihhna nâk chungin an lung a fim lai i rap in a foih hna nâk chungin an chuak ṭhân kho ko.
Currently Selected:
2TIMOTE 2: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
