2TIMOTE 1
1
1Paul Krih Jesuh ah a ummi nunnâk biakam ningin Pathian duhning i Krih Jesuh lamkaltu nih, 2Ka dawtmi fa Timote sinah kan Pa Pathian le kan Bawipa Krih Jesuh sinin zângfahnâk le velngeihnâk le daihnâk um ko seh. 3Ka pupa nih an rak ṭuan tawn bangin chia le ṭha hngalhnâk thiang ngei in a rian ka ṭuanmi Pathian sinah lawmhnâk bia ka chim i chun zan hlanin ngol loin thla ka camnâk ah kan philh lo, 4lawmhnâk in ka khah khawh nâkhnga, na mitthli kha hngal in hmuh kan duh hringhran ko. 5Zumhnâk taktak nangmah i a um kha ka philh lo, cucu napi Lois ah a um hmasa, nanu Zunis zongah a um i nangmah zongah a um kha fiang tein ka hngalh; 6Cucaah ka kut chuannâk thawngin nangmah ah a ummi thilpêk kha alhter dingin kan hngalhter ṭhân. 7Zeitintiah Pathian nih ṭihnâk thlarau a kan pe lo, ṭhawnnâk dawtnâk le ruahnâk ṭha thlarau tu kha a kan pêk. 8Cucaah kan Bawipa kong hngalhpinâk hi zahpi hlah, asiloah Amah ruangah thongah a tlami keimah zong hi ka zahpi hlah, thawngṭha ruang i temtuarnâk hi Pathian ṭhawnnâk bangin ka hrawmpi ve, 9Amah nih kan tuahsernâk bang si loin Amah ruahning le zângfahnâk in a kan khamh i kawhnâk thiangin a kan kawh, cucu vawlei ser hlanin Krih Jesuh ah a kan pêk, 10asinain kan khamhtu Krih Jesuh â langhnâk in atu ah a langhter. Amah nih thihnâk kha a hrawh i thawngṭha in nunnâk le thihkhawh lonâk kha a phâkter cang, 11cucu Gentel mi hna cawnpiak dingah lamkaltu le cawnpiaktu ah ruahmi ka si. 12Hiruangah dahkaw hi thil hna hi katuar cu, asinain ka ning a zak lo, zeitintiah ka zumhmi kha ka hngalh, A sin i ka chhiahmi kha cu Ni tiangin him tein a umter khawh ti kha ka hngalh. 13Krih Jesuh i a ummi zumhnâk le dawtnâk in, a ngandammi cawnpiaknâk ka sin in na theihmi kha fek tein i tlaih. 14Thilṭha na sin i chiahmi kha kanmah i a ummi Thiang thlarau in kilveng. 15Asia ram i a ummi vialte nih anka mertâk dih ti kha na hngalh an lakah Figelas le Hermegenes zong an i tel ve, 16Bawipa nih Onesifaras chungkhar sinah vêl a pêk, zeitintiah amah nih thazâng thar a ka pêk i ka cikcin zong a zahpi lo; 17Rom i a rat lio zongah biatak chuah in a ka kawl i a ka ton. 18Efesa khua i rian ka ṭuannâk ah a lam kip in a ka bomhning cu nang zong nih na hngalhfian, cu Ni caah Bawipa sin in vêl a hmuh khawh nâkhnga Bawipa nih pe ko seh.
Currently Selected:
2TIMOTE 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
