1TIMOTE 6
6
1Pathian min le a cawnpiaknâk thangchiat a si nâkhnga lo, sal hngawngkual banhmi ṭemchih sal vialte nih anmah le hotu hna cu zeizong kip ah thangṭhat tlâk an si zia hngal hna seh. 2An hotu le zumtu an si i unau an si ruangah zeirel loin um hna hlah seh, anmah ruang i ṭhathnemnâk hmutu an si caah zumtu le dawtmi an si caah rian ṭuanpiak hna seh. Cucu cawnpiak law tha pe hna. 3Ahohmanh nih cawnpiaknâk dang a cawnpiak i a ngandammi bia, kan Bawipa Jesuh Krih bia hmanh pom lo in, Pathian upatnâk he â tlakmi bia hmanh a pom duh lo ahcun; 4mi porhlaw, zeihmanh a hngal taktak lomi, i elhnial le buaibainâk chuahter zong poi a ti lomi a si, cubantuk mi hna nih an chuahter bikmi cu, hnahchuahnâk le buaibainâk le thangchiatnâk le a ṭha lomi i lunghrinh nâk le, 5ruahnâk chia-kha le biatak pemh lo, a herh lo i bia el hmang le, biaknâk zong chawleh nâkah hman a ngamhmi an si. Cubantuk mi hna cu kawm hna hlah u. 6Pathian-ṭihzahnâk hi lungtlinnâk he cun a hlawk ngaimi a si. 7Zeitintiah vawilei ah hin zeihmanh kan luhpi lo i zeihmanh kan chuahpi lai lo. 8Ei awk le fenhaih kan ngeih ahcun kan lung a tlin awk a si. 9Asinain rum a duh tukmi hna cu tukforh nâk rap chungah an lut i duhnâk sual le hruhnâk thil nih mi a hrawh i chiatnâk le rawhralnâk sual ah mi a pilter tawn; 10Zeitintiah phaisa duhtuk hi sualnâk vialte hram a si, cheukhat nih cucu an duh i zumhnâk an kaltak i anmah le anmah ngaihchiatnâk tam piin an i chunh tawn. 11Nang Pathian-mi cu thil hna cu zâmtâk, cuticun dinnâk le Pathian duhnâk, zumhnâk le dawtnâk, inkhawhnâk le nunmennâk kha dawi hna. 12Zumhnâk i raldohnâk ṭha kha doh in zungzal nunnâk kha i tlaih, cucu co ding i kawh na si, hngalhpitu tampi mit hmuh ah zumhnâk ṭha na phuan cang kha. 13Zeizong vialte sinah nunnâk petu Pathian le Krih Jesuh, Pontius Pailat hmai i zumhnâk dik a ṭanhpengtu mithmuh ah nawl kan pêk, 14kan Bawipa Jesuh Krih â langhṭhân hlan tiang hi nawlpêk hi mawhchiat awk le sawiawk umlo in rak kilveng, 15thangṭhat awktlâk nawlngeitu lu, siangpahrang hna Siangpahrang, bawi hna Bawi nih Amah khiahmi cân ah a langhter lai, 16Amah lawnglawng nih thihkhawhlonâk a ngei i naih khawhlomi ceu ah a um, ahohmanh nih an hmu bal lo i hmuhkhawh zong a si fawn lo, Amah sinah zungzal in upatnâk le ṭhawnnâk um ko seh. Amen. 17Tuchan mirum hna nih an rumnâk kha porhlawtnâk i hmanglo ding le bochan awk a tlâk lomi chawva an i bochan nâkhnga lo le thil vialte kan i lawmhnâk dingah a kan petu Pathian kha i bochan dingin chimhring hna. 18Thilṭha tuah hna seh, thilṭha tuahnâk ah rum hna seh, midang nih an ciangzar an tem ve nâkhnga nun siang hna seh, 19zungzal nunnâk cu an i tlaih khawh nâkhnga le a ra laimi caah i ṭhumhnâk ṭha khong luaimai dingin tha pe hna. 20Aw Timote! nakut i chiahmi cu ṭha tein kilveng, Pathian-ṭihzahlonâk bia chim le ralchanhmi biafang hngalhnâk tiah silo ngaiin min an bunhmi kha hrial i zuam. 21Cucu cheukhat nih kan ngeih tiah an i ruah i zumhnâk kha an pialtâk. Zângfahnâk na sinah um ko seh. Amen.
Currently Selected:
1TIMOTE 6: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
