2CO 11
11
1Ka hruhdeuh hmanh ah ka ing hram u, asi in zong nanka in ko. 2Zeitintiah Pathian hnahchuahnâk in dah kaw kan hnahchuah hna. Krih sinah cun ngaknu thiang bangin kan pêk khawh hna nâkhnga va pakhat kan ham piak hna. 3Asinain rulnih a fimzernâk in Evi a hlen bantukin Krih i tluangtlam te i nan umnâk chungin nan ruahnâk kha a hrawh sual lai ti kha ka phang. 4Zeitintiah kan in chimhmi hna si loin, Jesuh dang chim ah a rami hna kha nan rak cohlan hna, nan co bal lomi thlarau nan co i na cohlan bal lomi thawngṭha dang zong nan rak co hlan ko mu! 5Zeitintiah cu lamkaltu ngan hna nâk in ka hme deuh lai tiah ka ruat hrimhrim lo. 6Biachim leiah cawnnâk ngeihlah hmanh ning, hngalhnâk ah cun ka si lo dah kaw. Lamkip in nan sinah kan langhter cang. 7Asiloah hlawh ngeilo in nan sinah Pathian Thawngṭha ka chim i cawisan nan si khawh nâkhnga kâ niamter mi kha ka rak palh maw? 8Nan sin i rian ka ṭuan lio ah khan kawhhran dang chawva kha la in cawmnâk ka rak hmuh. 9Cun nan sin i ka um lio i chambau i ka um ah khan ahohmanh thilrit ka khinh hna lo; Masidonia ram i a rami unau hna nih ka herhmi anka rin dih. Cun nan caah thilrit ka si lonâk dingah thilvialte ah keimah te kâ zohkhenh tawn. Cubantukin kâ zohkhenh lengmang ko lai. 10Krih biatak keimah i a um bangin Akai ram in ka hmaihngalnâk chungin ahohmanh nih anka thlauh kho lai lo. 11Zeiruangah? kan dawt hna lo ruangah maw? Pathian nih a hngalh! 12Asinain mi cheukhat cu kanmah bantukin langh an i tim i an hmai a hngal tawn, asinain cubantuk mi hna nih cânrem an ngeih nâkhnga lo ka tuah tawnmi hi ka tuah peng lai. 13Zeitintiah cubantuk hna cu lamkaltu deu, mihlenhmang, lamkaltu bangin â umtermi an si. 14Cucu khuaruahhar awk a si lo! Satan hmanh ceunâk vancungmi bantukin â umter khawh ko. 15A rianṭuantu hna zong dinnâk rianṭuantu bangin i umter hna hmanhsehlaw khuaruahhar awk a si lo. An tuahning tein an dongh te ko lai. 16Ka chim rih lai, ahohmanh nih mi hrut ah ka ruat hna hlah seh, an ka ruah a si ahcun, tlawmte tal ka hmaihngal ve nâkhnga, mihrut bangin rak ka cohlang hna seh. 17Ka biachim hi Bawipa bangin ka chim lo, mihrut bangin ka hmaihngalnâk le ralṭhatnâk in ka chim. 18Mi tampi nih thisa in an hmai a hngal bangin kei zong ka hmaihngal ve lai. 19Zeitintiah mifim nan si i mihrut hna cu lunglawm in nan in khawh hna. 20Zeitintiah minih salah in chia hna sehlaw, in ei dih hna seh, inhleng hna seh, amah le amah i hlawrhseh, nan hmai ah in beng hna seh, nan in ko rih hna lai. 21Kan thazâng a der ti hi a chimhmanh ningzak a si! Asinain mi nih zeithil pauh ah a ngamh ahcun hruhbia in chim ning law, kei zong nih ka ngamh ve. 22Hebru mi a si maw? keizong ka si. Israel mi an si maw? kei zong ka si. Abraham fale an si maw? keizong ka si. 23Krih rianṭuantu an si maw? Hruhbia in chim ning law, ka si deuh, anmahnâk in ka ṭuan deuh, a hleiin tuk ka ton, atu le atu thong ka tla, thihnâk hmunah voi tampi. 24Judahmi hna sinin ṭum khat ah voi sawmli, voikhat i tling lo in ṭum nga tuk ka ton. 25Voithum fung in anka tuk, voikhat lungin anka cheh; voithum tilawng rawhnâk ka ton, zankhat le nikhat rili cungah ka tâng. 26Ka khual tlawnnâk ah voi tampi ti lak i ṭihnung, damiah lak i ṭihnung, ka phunhawi chungin ṭihnung, Gentel hna chungin ṭihnung, khuapi chungin ṭihnung, ramcar i ṭihnung, rilipi chungin ṭihnung, unau deu hna chungin ṭihnung; 27zânghlei cawi i thabat tuk le buhrinâk ah voitampi, mitkuh vuailonâk ah, rawlṭam tihalnâk ah, voitampi rawlulhnâk ah, taklawng i khuasik temtuarnâk ah, 28hi vialte hna hlei ah kawhran hna zawn ka ruahnâk thilrit nih nifa te a ka nenh. 29Thazâng dermi hram lo in ka um bal maw? Mi an tluk tikah zawnruahnâk ngei lo in ka um bal maw? 30Hmaihngal ding ka si ahcun, ka thazâng dernâk tu hi ka hmaihngal pi hna lai. 31Kan Bawipa Jesuh Krih Pa le Pathian zungzal i thangṭhat mi nih cun lih ka chim lo ning hi a hngalh. 32Damaska khua ah khan siangpahrang Aretas tang i mangki bawi nih khan tlaih a ka timh i Damaska mi hna kha khualipi a conghter hna, 33asinain thlalang awngin hau pawngah bawmrângin an ka ṭhumh i a kut chung in kâ zûk kho.
Currently Selected:
2CO 11: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
