2CO 10
10
1Cubangin keimah Paul, hmaitonh i ralchia, langhlat i nan hmai ah a ral a ṭha ngaimi nih Krih lungnemnâk le nunnemnâk in kan nawl hna. 2Nansin i ka rat tikah, thisa ngai i a nungmi ah a ka ruattu hna lakah ralṭha ngai i um ka timhning i um a herh sual nâkhnga lo kan nawl hna. 3Zeitintiah thisa in um hmanh usihlaw, thisa bangin kan i doh lo. 4Kannih ral dohnâk ralthuam hna cu taksa thil an si lo, a fekmi ralhruang chimkhotu Pathian ṭhawnnâk tu a si, 5elhniahnâk le a sangmi thil, Pathian hngalhnâk dawntu dingah â santer chawmmi hna cu hrawk in, khuaruahnâk vialte hna cu Krih nawlngaihnâk sal ah kan luhpi tawn, 6cun nawl nan ngaih dih hnu ah, nawl ngai lomi vialte hrem dingin timhcia in kan um. 7Lenglei a langhning lawngin maw thil nan conh tawn? Mi zei pauh nih Krih ta ah â ruah ahcun amah cu Krih ta a si bangin kannih zong Krih ta kan si ve timi hi ruat ṭhân seh. 8Zeitintiah kan nawlngeihnâk, nanmah hrawhnâk si loin, kanmah remhnâk ca i Bawipa nih a kan pekmi hi hmaihngal pi hmanh ninglaw, ka ning a zak lai lo. 9Culoahcun, cakuat in nanmah ṭhih â timmi ka lo sual lai. 10“Zeitintiah a cakuat hna cu a rit i a ṭhawng, a pumtu cu a nêm taktak, a phungchim le zomhtaih awk tlâk,” nan ti fawn. 11Cubantuk mi nih cun hihi ruat seh, nan sin kan rat hlan i kan ca kuat ningte khan kan rat tik zongah kan tuah lai. 12Zeitintiah mah le mah â thangṭhatmi hna sinah cun kâ telhchih ngam lo, anmah he kan i tahchunh ngam fawn lo. Annih cu anmah le anmah an i tahchunhtawn, an hrut ngai. 13Kan nih tu cu Pathian nih kan ṭuannâk ding eria chung hlei in hmaihngalpi awk kan ngei lo, nannih zong cu eria nih cun an khumh chih hna. 14(Kan nawl ngeihnâk nih an khumhchih hna lo bantuk in) kan eria a si lomi eria bantuk i kan ruah si loin, nan sin tiangin Krih thawngṭha chim i kan rat kha; 15kan ṭuanmi hlei in midang rianṭuanmi kan i hmaihngal pi lo, asinain nan zumhnâk a ṭhanchoh bantukin nanmah thawngin kan eria hi a kau chinchin lai tiah kan i ruahchan, 16nan ram pinlei tiangin thawngṭha hi kan chim lai, cun eria dang mi ṭuan ciami cu kan i hmaihngalpi lai lo. 17Sihmanhsehlaw, “Hmaihngal a duhmi pauh nih Bawipa kha i hmaihngal pi seh.” 18Zeitintiah mah le mah i thangṭhat cu conglomh an tong bal lo. Bawipa nih a thangṭhat ahcun conglomh a tong deuh lai.
Currently Selected:
2CO 10: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
