2CO 1
1
1Paul, Pathian duh ningin Jesuh Krih lamkaltu le kan unau Timote nih Korin khua i a ummi Pathian kawhhran le Akai ram pumpi i mithiang vialte sinah: 2Pathian kan Pa le Bawipa Jesuh Krih sinin zângfahnâk le daihnâk nan sinah um ko seh. 3Kan Bawipa Jesuh Krih Pathian le Pa, velngeihnâk Pa le hnangamnâk vialte Pathian cu thangṭhat in um seh. 4Pathian nih kan hna a ngamter bantukin harnâk a tuarmi vialte an hna kan ngamter khawh nâkhnga harnâk kan tuarmi vialte ah kan hna a ngamter tawn. 5Zeitintiah Krih temtuarnâk bangin tampi kan tuar tikah Krih thawngin kan hnangamnâk zong a tam chinchin. 6Harnâk kan tuar ahcun nan caah hnangamnâk le khamhnâk ding a si. Kan tuar cang bangin nannih zong nih lungsau in nan tuar khawh ve nâkhnga san a tlaimi a si. Kan hna a ngam a si le nan caah hnangamnâk le khamhnâk a rak si. 7Cun harnâk temtuartu nan si ve caah hnangamnâk zong nan co lai tiah fek tein ruahchannâk kan ngei. 8Ule nau hna, Asia ram i kan cungah a tlungmi kha nan hngalh lo kan duh lo. Kha tlukin tuar awk a ṭha lomi thilrit nih a kan nenh lio ah khan nun lai zong kan i ruat kho ti lo. 9Asi, thih lawng a si ko cang tiah kan ruah, kanmah ah i hngatchan loin, mi thi tiang a thawhtertu Pathian lawnglawng kan i hngatchan nâkhnga caah a si, 10kha tluk in a nganmi thihnâk chungin a kan khamh cang i a kan khamh ṭhân lengmang ko lai tiah Amah ah zumhnâk kan ngei, 11Mi tampi nih thla nankan campiaknâk thawngin, thilpêk kha kan hmuh, cucaah kan ai awh in mitampi nih lawmhnâk bia an chim khawh nâkhnga thlacam rak kan bawm rih ko u. 12Kan hmaihngalnâk cu hihi a si. Vawlei ah hin tluangtlam te le zumhtlâk in, minung fimnâk telhchih loin, Pathian zângfahnâk thawngin khua kan sa, nan sinah ṭha chinchin in kan um, ti hi kan chiaṭha hngalhnâk zong nih a pompi. 13Nan rel i nan hngalh ciami dah ti lo zeihmanh nan sinah ṭial ṭhân kan tim lo. Atu ah cun a dongh tiangin nan hngalhthiam lai tiah kan bochan hna, 14( kannih zong tlawmpal cu nankan theihthiam pi bantukin), Bawipa Jesuh Ni ah nannih hi kan hmalhngalhnâk nan si bangin kannih zong nan hmaihngalnâk kan si ve lai. 15Cucu fek te i zumh buin, a hlawknâk nan co ṭhan khawh nâkhnga nan sinah rat hmasat ka timhnâk cu a si, 16nanmah palpah in Masidonia ramah kal ning law; cuka in nan sinah rak kir ṭhân in, nanmah bomhnâk in Judia ram i kal ka timh. 17Cucaah cubantuk thil ka timh lio ah khan foi tein ka timh lamhmi a si maw? Asilo ah hi ka timhmi hi thisa duhnâk men i ka timhmi; ‘Asi, asi, ka timi cu, A silo a silo, a ti ṭhanmi maw ka si? 18Pathian cu zumhawktlâk a si bantukin nan sin i ka chimmi zong asi, tile a silo, ti ṭhân mi men men a si lo. 19Zeitintiah Pathian Fapa Jesuh Krih kong kei le Silvanas le Timote nih nan sin i kan chim tawnmi hi, “Asi ti le A silo, tiah cawhmi a si hrimhrim lo, Asi ti cu Amah ah a um. 20Zeitintiah Amah ah Pathian biakammi vialte cu Asi ti an si; cun kanmah thawngin Pathian a sunparnâk dingah Amah ah Amen, a um. 21Cubangin Krih ah kannih le nannih a kan fehtertu le sathau a kan thuhtu cu Pathian a si; 22Amah cu a kan chinchiahtu le kan lungthin i hamnâk Thlarau a kan petu zong a si. 23Cuhleiah fahnâk kan pêk sual hna nâkhnga lo Korin khua i ka rat tilo kha a si tiah ka thlarau hngalh pitu ah Pathian kha ka kawh. 24Nan zumhnâk cungah nawlngeih kan i timhnâk a si lo, nan i lawmhkhawh nâkhnga nan ṭuanpi hawi men kan si; zeitintiah zumhnâk ah nan dir.
Currently Selected:
2CO 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
