1CO 16
16
1Mithiang mi hna ca i thawhlawm kong ah, Galatih ram i kawhhran hna sin i nawl ka pêk bantukin nan nih zong nih rak tuah ve u. 2Ka rat tikah khawlh a herh nakhnga lo, mikip nih nan hmuhmi thluachuahnâk he â tlâk cio in zarhkhat chung ni hmasa bik pauh ah rak pum hna u. 3Cun karat tikah nan thilpêk hna cu Jerusalem ah kalpi dingin nan zumhmi sinah ca ṭial in kan kenter lai i kan thlah lai. 4Ka kal ve nâk ding a si ahcun, keimah sinah an kal ve lai. 5Cubangin Masidonia ram ka ṭol dihin nan sinah ka ra lai. (Masidonia ram lanh cu kâ timh cia mi a si) 6Cun nan sinah sau deuh ka câm kho lai, khua sik cân chung dihlak zong a si kho ko. Khuazei lei a si hmanh ah nannih nih nanka thlah khawh ko lai. 7Zeitintiah khualtlawn pah i hmuh lawng cu ka lung a si lo, Bawipa nih rem a ti ahcun nan sinah sau deuh câm ka duh ko. 8Asi, Efesa khua ah Pentikos ni tiangin câm ka timh lai. 9Zeitintiah rianṭuannâk ding lam kau deuh le a hlawk deuh ding ka caah â ong, doh kalhtu zong tampi cuka ah an um. 10Timote a rat tikah ṭihphang lo tein rak umter u. Keimah nih ka ṭuan bantukin Bawipa rian ṭuntu a si. 11Cucaah ahohmanh nih rak zomhtaih hna hlah seh. Lungdai tein ka sinah a rat khawh nâkhnga ṭha tein nan rak thlah lai, zeitintiah unau hna he raṭi dingin kan rak hngah ko. 12Cubangin kan unau pa Apollos kha unau hna he hmunkhat ah nan sin ra ding in ka nawl len i atu cân i rat hi a ngaihlah ngai, asinain cân rem a ngeih tikah a ra hrimhrim ko lai. 13I ralring ulaw, zumhnâk ah fek tein dir u. ralṭha le ṭhawng ngai in um u. 14Nan tuahmi pauh cu dawtnâk in tuah si dih seh. 15Ule nau hna Stefenas chung le cu Akai ram i zumtu hmasa bik an si i mithiang hna rianṭuan piak awkah an i pêk ning nan hngalh; 16cubantuk mi sinah rian a kan ṭuanpi i sem a kan ngaih pitu hna sinah tangdor dingin kan nawl hna. 17Stefenas le Fortunatas le Akhaikas an rat hi kâ lawm taktak, zeitintiah nan umlo zong lang lo in an kan tuam hlawm. 18Zeitintiah annih nih nan thlarau an tharchuah bangin ka thlarau zong an tharchuah ngaingai. Cucaah hi bantuk mi hi cohlang hna u. 19Asia ram i kawhhran hna nih nan kut an in tlaih hna. Akuila le Prisilla an inn i kawhhran hna he nan kut an in tlaih hna. 20Unau vialte nih nan kut an in tlaih hna. A thiangmi hnamhnâk in nan kut rak i tlai u. 21Keimah Paul zong nih hi kut tlaihnâk hi keimah kut hrimhrim in ka ṭialmi a si. 22Mizei pauh nih Bawipa Jesuh Krih a dawt lo ahcun chiatserh in um seh. Maw, Bawipa ra ko cang. 23Bawipa Jesuh Krih zângfahnâk cu nan sinah um ko seh. 24Krih Jesuh ah ka dawtnâk cu nan dihlak cungah um ko seh. Amen.
Currently Selected:
1CO 16: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
