1TIMOTE 5
5
1Putar kha sî hna hlah, pa bangin forh hna. Tlangval kha unau bangin zoh hna, 2pitar kha nu bangin zoh hna, ngaknu kha thiang tein farnu bangin zoh hna. 3Nuhmei tak tak a simi kha upat hna. 4Asinain tule fa a ngeimi a si ahcun an in chungah Pathian ṭihzah cawng hna sehlaw, anmah hringtu hna sinah ṭhatchuah cawng hna seh, cucu a ṭhami le Pathian caah cohlan awk a tlâkmi a si. 5Nuhmei tak tak, amah lawng a ummi nih, Pathian lawng â bochan i chunzan hlan in thlacam le nawlnâk donghcat loin a tuah tawn. 6Asinain nomhnâk lawng i a nungmi nuhmei cu a nun lio hmanhah a thimi a si. 7Sawiawk um lo an si khawh nâkhnga cubangin nawl pe hna. 8Asinain ahohmanh mah le sahlawh rualchan zeiah a rel lo i a umpimi chungkhar hmanh zei ah a rel lomi nih zumhnâk kha a hlawt i zum lotu nâkin a sual deuh. 9Nuhmei kum 60 hmanh a tling lomi cu nuhmei ah relchih hlah, va pakhat a rak ngei cang i 10ṭhatnâk tuahnâk kongah thangṭhatmi, fale zong tlamtling in a rak bawmtu le, thilṭha kip ṭhahnem ngai i tuahtu a si ahcun nuhmei ah ṭial khawh a si. 11Asinain ano deuhmi nuhmei hna cu ṭialchih hna hlah, zeitintiah an pumsa duhnâk i sum kho loin, Krih nâkin va-ngeih an duh tawn, 12hmaisa bik an zumhnâk kha an hlawt caah thiamlo an i coter tawn. 13Cun daithlânnâk nih a zulh hna i innkip ah lêngin, thathut le mikong ceih hmanh i za loin, tuah loding tuah in, chim loding tiang an chim tawn. 14Cucaah a no deuhmi nuhmei hna cu vâ ngei ṭhân ko seh, fale ngeiin, chungkhar zohkhenh sehlaw, a kan ralchanhtu hna sawinâk cân rem tuah hna hlah seh law ka duh. 15Zeitintiah atu hmanh ah cheukhat cu Satan lei ah an pial cang. 16Zumtu pa siseh, zumtu nu siseh, nuhmei umpi an ngeih ahcun cawmko hna seh, nuhmei taktak kha cawmken an si khawh nâkhnga kawhhran kha thilrit khinh hna hlah seh. 17Kawhhran upa fel tein biaceih a thiammi le, a hlei in phungchim le cawnpiak lei i a ṭuanmi hna cu a let hnih i thangṭhat tlâk an si. 18Zeitintiah Cathiang nih, “Cawtum nih facang a cil lioah a hmur ṭem hlah,” tiah a ti. “Rianṭuantu cu hlawh hmuh awk ah â tlâk,” tiah a ti ṭhân. 19Kawhhran upa sualpuhnâk cu hngalhpitu pahnih an si lo le, pathum an si lo ahcun cohlang hlah. 20Sualnâk tuah a hmangmi cu midang hmuh ah chimhring hna, midang zong nih an ṭih ve nâkhnga. 21Pathian le Bawipa Jesuh Krih le vanmi thiang hna hmaiah hi bia hna hi ruahning ngei cia lo le thleidan ngei lo tein fekte i dirpi dingin nawl kan pêk. 22Khulrang in mi zei lucung hmanh ah na kut chuang hlah, midang sualnâk i hrawm loin, thiang tein i zohkhenh. 23Ti lawng ding loin, na pawfah le na derthawm deuh caah misur hang tlawmte tein rak ding. 24Cheu khat sualnâk cu alang cawlh i lehrulh an si cawlh ve. Cheukhat sualnâk cu a lang zau lomi zong a um. 25Cubantuk ṭhiamṭhiam in mi chekhat ṭhatnâk tuahmi cu a langh a fawi, chekhat tuahmi ṭhatnâk cu lang rih lo hmanhsehlaw thuh thai khawh a si lo.
Currently Selected:
1TIMOTE 5: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
