1TIMOTE 2
2
1Cucaah a hmaisa bikah nawlnâk, thlacamnâk, midang ca i nawlnâk le lawmhnâk biachimnâk kha mi vialte caah tuah awkah kan forh, 2hnangam le dai te le Pathian upat le ṭihzah in khua kan sak khawh nâkhnga, bawi le nawlngeitu vialte caah thla cam u. 3Zeitintiah hihi kan Khamhtu Pathian hmai ah a ṭha i cohlan awk a tlâkmi si, 4Anih nih cun mi vialte khamh si hna seh law biatak hngal hna seh ti kha a duh. 5Zeitintiah Pathian pakhat lawng a um i Pathian le minung karlak ah lamkaltu pakhat lawnglawng a um, 6amah cu Minung mi vialte tlanhnâk ah a nunnâk a petu Krih Jesuh kha a si, cucu a cân te ah hngalh terin a um awk a si, 7zeitintiah keimah zong cu bia chimtu le lamkaltu ah ruahmi ka si, Krih ah biatak ka chim i ka lih lo, zumhnâk le biatak ah Gentel mi hna cawnpiaktu ah ruahmi ka si. 8Cucaah pa nih ka kip ah a thiangmi ankut thlir in thinhung lo le lunghring loin thla cam hna seh law ka duh, 9cubantukin nu zong nih tluangtlam tein i ṭamh hna seh, luan tukin an sam phiar hna hlah seh, sui le lungvar le man fak tukmi hnipuan i hruk hna hlah seh. 10Pathian a ṭanhtu nu hna nih a za tawkin thilṭha tuah in i ṭamh hna seh. 11Nu nih pumpeknâk he dai tein cawng hna seh. 12Pa cungah nawlngeih le cawnpiak cu ka onh hna lo, dai tein an um awk a si. 13Zeitintiah Adam kha ser hmasat a si, cu hnu ah Evi kha ser a si. 14Cun Adam kha hlen a si lo, Evi kha hlen a si i nawl buarnâk ah a tlu. 15Asinain zumhnâk le dawtnâk, thianhlimnâk le sumkhawhnâk he a um peng ahcun fa hrin ruangah khamh in a um lai.
Currently Selected:
1TIMOTE 2: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
