1TIMOTE 1
1
1Paul, Pathian a kan khamhtu le kan i ruahchanmi Jesuh Krih nawlpêk bangin Jesuh Krih lamkaltu nih. 2Zumhnâk i ka fa taktak Timote sinah, Pathian kan Pa le kan Bawipa Jesuh Krih sin in zângfahnâk, vel le daihnâk um ko seh. 3Masidonia ka kal lai i kan nawl bang khan Efesa khua ah um peng law, micheu khat nih cawnpiaknâk hmânlo an cawnpiakmi kha cawnpiak tilo dingin rak chim hna, 4pupa hna min le tuanbia sawh sawh ruah le khah kha ngol hna seh, cu nih cun Pathian lei zumhnâkah ṭhathnemnâk zeihmanh a ngei lo, elhnialnâk men a chuahter. 5Nawlpêk nih a tinhmi cu, zumhnâk taktak le chiaṭha hngalhnâk ṭha le lung thin thiangin a chuakmi dawtnâk hi a si, 6cuthil hna cu kaltâk in mi cheukhat nih santlai lo bia sawhsawh an buaipi. 7thiam ngaiin an chimmi nih zeidah a sawh i sullam zeidah a ngeih ti zong ruat loin nawlbia cawnpiaktu si kha an duh. 8Asi nawlbia hi minih tling tein a hman ahcun a ṭha ti kha kan hngalh, 9hihi hngal hna seh, nawlbia hi miṭha caah ser a si lo, nawlbia zeiah a rel lomi, nawlbia ral chanh i a nungmi, Pathian-zeiaharellomi, misual, a thiang lomi, biaknâk zeiaharellomi, nu le pa thattu, lainawng, 10nupa sualnâk tuah a hmangmi, tawkâ hor, minung fir a hmangmi, lih chimmi, a deu in chiatserh i biakam a hmangmi, cawnpiaknâk hmân ralchanhtu, 11thangṭhattlâk Pathian thawngṭha sunparnâk kan sin i chiahmi ralchanhtu hna caah ser a si. 12Hi rian ṭuan kho i a ka sertu le zumhtlâk i a ka ruattu Krih Jesuh kan Bawipa sinah lawmhnâk bia ka chim. 13Hlanah thangchiattu le serhsattu le mi sawksâmtu ka rak sinain zumlonâk le hngallo buin ka rak tuahmi a si caah velhngeihnâk ka rak conâk hi a si. 14Cun kan Bawipa zângfahnâk tamzia cu Krih Jesuh ah a ummi zumhnâk le dawtnâk thawngin tamtuk in a liam in a liam. 15Krih Jesuh cu misual hna khamh dingah vawlei ah a ra, ti hi zumh awk a tlâkmi le cohlan awk a tlâkmi a si, an lakah a sual bik ka si. 16Asinain hi ruangah hin velngeihnâk ka hmuh hi a si, cucu Jesuh Krih nih ka cungah a lungsaunâk vialte a langhter hmasa i atu thawkin zungzal nunnâk co awkah a zum hngami hna caah zohchunh awk a si nâkhnga. 17Zungzal Siangpahrang, a thi kho lomi, hmuh khawh lomi, amah lawng a fimmi Pathian sinah zungzal in zungzal tiang upatnâk le sunparnâk um ko seh. Amen. 18Ka fapa Timote, hlan i na kong an rak chim chungmi bangin um awkah raldohnâk ṭha kha na doh khawh nâkhnga, cu ṭuanvo cu na cungah ka chiah. 19Zumhnâk le chiaṭha hngalhnâk thiang kha i tlaih peng, ceukhat nih cucu an namnul i tilawng a kuaimi bangin an zumhnâk kha a kuai tawn. 20Cuhna lak ah Humanias le Aleksandria an i tel, Pathian thangchiat a poining an hngalh khawh nâkhnga annih cu Satan sinah ka pêk hna.
Currently Selected:
1TIMOTE 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
