1THESALON 4
4
1Cuticun ule nau hna a donghnâk ah, Pathian lawmh terin nan nun khawh nâkhnga le kan sinin nan hmuhmi bantuk kha tam chinchin in nan ngeih nâkhnga Bawipa Jesuh ah tha pêk pah in kan nin nawl hna, 2zeitintiah Bawipa Jesuh in nawl kan in pêkmi hna kha nan hngalh. 3Zeitintiah Pathian duhning i thianghlim te i um cu nupa-sualnâk chungin i thianter hi a si. 4cuticun mikip nih mah le ûm cio thiang terin upat cio u sih, 5Pathian a hngal lomi Gentel bangin taksa duhnâk ah i hmang dih loin; 6hi kongah ahohmanh nih a unau cungah hibantuk sualnâk hi tuah hlah seh, Bawipa cu cubantuk sualnâk a tuahtu hna cungah lehrultu a si caah, kannih zong nih a hlan kanin ralrinnâk pein kan in hngalhter hna. 7Zeitintiah Pathian nih thûrhnawm dingin a kan ko lo, thianghlim te i um dingin a kan kawh. 8Cucaah hi thil a eltu cu minung eltu si loin, Thiang thlarau a kan petu Pathian eltu a si. 9Unau dawtnâk kong tu cu ṭialpiak nan herh lo, zeitintiah Pathian hrimhrim nih pakhat le pakhat i daw dingin a cawpiakmi nan si; 10Masidonia ram dihlak i unau vialte cung zongah cubantukin nan tuah cang. Asinain unau hna tam chinchin i tuah dingin kan nawl hna; 11cun nawl kan in pêk hna bangin, dai tein mah le ṭuanvo cio kha ruat in nanmah kut cio in rian ṭuan u, 12cuticun lenglei mi hmuhnâk ah ningcang tein nan um lai i baumi zeihmanh nan ngei lai lo. 13Ule nau hna midang ruahchannâk a ngei lomi bangin nan ngaih a chiat nâkhnga lo, â hngilhmi hna kong nan hngalh lo ka duh lo. 14Zeitintiah Jesuh a thi i a thoṭhan ti kha kan zumh ahcun, Jesuh i â hngilhmi hna cu Pathian nih Amah sinah a runpi hna lai. 15Zeitintiah hihi Bawipa bia in nan sinah kan chim, kannih Bawipa rat tiang i a nungmi hna nih â hngilhmi kha kan chawhkanh hna lai lo. 16Zeitintiah Bawipa hrimhrim cu au thawng he, cungnung bik vanmi aw thawng he, Pathian muko tum thawng he a rung ṭum lai. Cun Krih i a thimi an tho hmasa lai. 17Cuhnuah kannih a nung rihmi hna hi, cunglei i Bawipa hungton awkah anmah hna he minmei lakah cawi in kan um lai. Cubangin zungzal in Bawipa sinah kan um cang lai. 18Cucaah hi bia in pakhat le pakhat nan hna i ngamter u.
Currently Selected:
1THESALON 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
