1THESALON 3
3
1Cucaah cubangin kan tuar khawh lo hnuah keimah lawngin Âthên khua ah umning law a ṭha lai tiah kan ruah, 2cun Timote kan unau pa le Pathian rianṭuantu, Krih thawngṭha i kan ṭuanpimi hi zumhnâk kongah nanmah fehter ding le hnangamter awkah kan rak thlah, 3hibantuk temtuarnâk nih in hnin hna hlah seh; zeitintiah hibantuk tuar awkah ruahmi kan si tiah nanmah lila nih nan hngalh. 4Zeitintiah nan sin i kan um hlan in harnâk kan tuar hngami kha kan in chimh chung cang hna, cubantukin a hung cang taktak ti zong kha nan hngalh. 5Hiruangah zumhnâk i nan kong hngal loin kan um khawh lo tikah a nih cu kan rak thlahnâk kha a si, culoahcun tukforhtu nih an tei sual hna lai i nan sin i kan ṭuanmi hi pakpalawng ah a cang sual lai. 6Asinain atu ah Timote nan sin in kan sinah a rak kir cang i hmuh kan in duh hna bantukin hmuh nan kan duh tuknâk kong le a ṭha leiin nan kan hngalh pengnâk le nan zumhnâk le dawtnâk kong thawngṭha kha a kan phorh - 7cucaah ule nau hna nan zumhnâk kong nih a kan hnemh ngaingai i kan harnâk le ngaihchiatnâk vialte ah kan hna a ngamter. 8Zeitintiah atu Bawipa ah fek tein nan dir ahcun kan nung cang. 9Zeitintiah nanmah ruangah hibantukin Pathian ah kan i lawm i zeibantuk set in dah Pathian sinah lawmhnâk bia nan ca ah kan chim lai? 10Nan mui kan hmuh khawh nâkhnga le zumhnâk lei i nan chamhbaunâk ah thazâng kan in pêk khawh hna nâkhnga chun zan hlanin fak piin thla kan cam tawn. 11Cubangin kan Pa le Pathian Amah hrimhrim le kan Bawipa Jesuh Krih nih nanmah lei ah kan hruai ko seh. 12Cun kan in dawt hna bantukin nanmah le mi vialte nan dawt khawh nâkhnga, nan dawtnâk cu Bawipa nih tam chin chin in karhter ko seh, 13cuticun kan Bawipa Jesuh Krih cu a mithiang vialte hna he a rat tikah, kan Pathian le kan Pa hmaiah nan lungthin kha sawi awk umlo le thianghlim tein an fehter khawh hna lai.
Currently Selected:
1THESALON 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
