1 PETER 5
5
1Nan lakah upa hna, kei nan upat hawi, Krih tuarnâk hngalhpitu, sunparnâk a lang hngami cotu ding a simi nih hin tha kan pêk hna. 2Nan lak i Pathian tuurun kha kilveng hna u law, zohkhenhtu si ko u, tuahlo khawh lo bangin ruat loin, duhnâk taktak he, duhfah hakkauh ruangah si loin, lungtho te in ṭuan si seh, 3asiloah nan ukmi hna cungah i bawiter hlah u, tuurun zohchunh awktlâk si kha i zuam u, 4cun tuukhal hna Bawibik kha a langh tikah sunparnâk luchin a ziamkho lomi nan hmuh lai. 5Cubantuk in nannih mino hna, upa hna tangah i dor u. Asi, nandihlak in i pumpeknâk lungput ngei u law, toidornâk in i thuam u. “Pathian nih porhlaw mi a doh hna i toidormi kha vel a ngeih hna.” 6Cucaah a ṭhawngmi Pathian kut toi ah toidor tein um u law, Amah nih a cân a zat tikah an cawisan te hna lai; 7Amah nih nan zawn a ruah caah, nan buainâk vialte Amah cungah chawnh u. 8Lungfim tein um u law i ralring u, nan ral khuachia cu chiandeih a hrum-aimi bangin a ei khawhmi kawl ah â chawk lên ko. 9Vawlei cung i nan unau hna zong nih hibantuk hi an tuar ve ti kha hngal in, zumhfehnâk he amah cu doh u. 10Zângfahnâk vialte Pathian, zungzal a sunparnâk co dingin an kotu hna Krih Jesuh nih, cân tawite nan tuar hnu ah, tlam tlinter le fehter in, ṭhawnter le fek tein in dirter ko hna seh. 11Amah sinah sunparnâk le biaceihnâk cu zungzal in zungzal tiang um ko seh. Amen. 12Silvanas, zumh a tlâkmi unau i ka ngeihmi kut ah hin nanmah thazâng pêknâk bia, atu i nan dirnâk hi Pathian zângfahnâk dik a si ti kha hngalhternâk câ tawi tein ka rak kuat. 13Babilon mi nanmah he thimmi nu nih hin nan kut an tlaih hna. Cubantukin ka fapa Marka zong nih nan kut an tlaih hna. 14Dawtnâk hnamh in i hnamh u law nan kut i tlai cio u. Krih Jesuh i a ummi vialte sinah daihnâk um ko seh. Amen.
Currently Selected:
1 PETER 5: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
