1 PETER 4
4
1Cucaah Krih nih thisa in kan caah a tuar ruangah nannih zong cu lungput cu ngei ve u; taksa in a tuarmi hna nih cun sualnâk kha an ngol cang; 2cubantuk mi hna cu an nun chung vialte taksa duhnâk in an nung ti lo i Pathian duhning in an nung cang. 3Zeitintiah Gentel mi hna duhnâk tuahnâk dingah, kan rak nunpimi hornâk, taksa duhnâk, zuritnâk, zuhmun i i nomhnâk, zudinṭinâk le fih a nungmi milem biaknâk chung i umnâk caah cuhlan kha za cang seh. 4Cubantuk nomhhnaihnâk i nan i tel duh lomi hi mak an ti i nan thang tu an in chiat hna. 5Cuhna nih cun mithi le minung hna biaceih awk ah timhcia in a ummi hmai ah anmah kong an i chim cio te lai. 6Hiruangah hin mithi hna sin zongah thawngṭha chim a rak si kha; taksa in a ummi minung hna bangin ceihpiak an si lai, asinain thlarau lei ah Pathian duhning in an nun khawh nâkhnga. 7Thil vialte donghnâk a nai cang caah, thla nan cam khawh nâkhnga i bia takin i ralring u. 8Cun thildang vialte nâk in pakhat le pakhat i dawt hi rak uar bik ko u, zeitintiah dawtnâk nih sualnâk tampi a khuh tawn. 9Phunzai loin pakhat le pakhat i cohlang u. 10Pathian zângfahnâk phun tampi zohkhenhtu nan si bangin, thilpêk nan co ning cio in pakhat le pakhat rian i ṭuan piak u. 11Jesuh Krih thawngin Pathian cu zeizong vialte ah thangṭhat i a um khawh nâkhnga, mi zei pauh nih phung a chim ahcun Pathian chimning tein chim seh, mizei pauh nih rian a ṭuan ahcun Pathian nih ti khawhnâk a pêk ning tein ṭuan seh, sunparnâk le biaceihnâk cu zungzal in zungzal tiang Amah ta a si. Amen. 12Ka dawt le hna nan lakah a har tak takmi hniksaknâk a tlungmi kha khuaruahhar ngai mi thil a phânmi ah ruat hlah u. 13Krih teminnâk nan i hrawmhnâk a si tiah ruat in i lawm deuh u, cuticun a sunparnâk kha langhter a si tik ah lunglomh nâkin nan khat te lai. 14Krih min ruang i sik nan sin ahcun nan van a ṭha, zeitintiah sunparnâk Thlarau, Pathian Thlarau kha nan cungah a um. Anmah leiah Amah cu thangchiat a sinain nanmah leiah Amah cu thangṭhat a si. 15Asinain nan tuar chan cu lainawn ruang le, thilfir ruang le, Ṭhatlonâk tuah ruang le, a herh lo i midang kongah nan i thlak ruangah sihlah seh. 16Mizei pauh Kristian a si ruangah a tuar a si ahcun, ningzak hlah seh, Pathian thangṭhatnâk tu ah hmang deuh seh. 17Zeitintiah biaceihnâk cu Pathian chungkhar ah hin thawk a za cang, kanmah hmanh i a thawk ahcun, Pathian Thawngṭha zum duh lo hna donhgnâk cu zeitlukdah a si te lai? 18Cubangin “Miding hmanh khamh fangfang a si ahcun, Pathian-zeiah a rel lomi le misual cu khuazeiahdah a si kun lai?” 19Cucaah Pathian remti ningin a tuarmi hna caah thilṭha tuah in an thlarau kha zumh a tlâkmi Sertu sinah chân seh.
Currently Selected:
1 PETER 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
