1JOHAN 3
3
1Ngaihmanh u Pa nih a kan dawt ning hi zeitlukindah a ngan! Pathian fale tiah kawh kan si! Cucaah vawlei nih ankan hngalh lo, zeicatiah Amah kha an hngal lo. 2Ka dawt le hna atu ah Pathian fa le kan si i zeidah kan si telai ti tu cu langhter a si rih lo, asinain Amah a langh tikah, Amah bang kan si lai ti kha kan hngalh, zeitintiah Amah cu a sining tein kan hmuh lai. 3Amah cungah cubantuk ruahchannâk a ngeimi pauh nih, Amah a thian bangin â thianter tawn. 4Sualnâk tuahtu pauh nih nawlbia zong a buar, zeitintiah sual cu nawlbuar a si. 5Amah cu kan sualnâk latu dingah langhter a si cang ti kha nan hngalh, Amah ah sual a um lo. 6Amah ah a hmunmi pauh cu sualnâk an tuah lo. Sualnâk a tuahtu pauh nih Amah a hmu lo, hngalh zong a hngal fawn lo. 7Nau le hna, ahohmanh i hlenter hna hlah u. Amah a din bantukin dinnâk a tuahtu cu a ding. 8Sualnâk tuahtu cu khuachia ta a si, zeitintiah a hramthawk in khuachia nih sualnâk a rak tuah cang. Pathian Fapa a langhchan cu khuachia rianṭuannâk a hrawh nâkhnga caah a si. 9Pathian hrin a simi pauh nih, a chungah Pathian ci a hmunh caah sualnâk an tuah peng lo, Pathian hrin a si caah sualnâk a tuah peng kho lo. 10Hitihin Pathian fa le khuachia fa cu langhter a si. Dinnâk a tuah lomi pauh cu Pathian ta an si lo, a unau a daw lotu zong Pathian ta an si lo. 11Pakhat le pakhat kan i dawt awk a si, tihi a hramthawk in biacah nan theihmi kha a si. 12Kain, misuaksual pa ta a simi, mah unau a thattu bangin nan um awk a si lo. Zeicadah a thah? A tuahmi kha a ṭhalo i a naupa tuahmi kha a din caah a si. 13Ka nau le hna, vawlei nih an in huat hna ahcun mak ti hlah u. 14Kan unau kan dawt hna ruangah, thihnâk in kan chuak i nunnâk ah kan lut cang ti kha kan hngalh. A unau a daw lotu cu thihnâk ah a hmun ko rih. 15A unau a huami pauh cu lainawng a si, lainawngmi cu zungzal nunnâk an chungah a hmun lo ti kha nan hngalh. 16Dawtnâk cu hitihin kan hngalh, kan ca i a nunnâk a pêkmi ah hin. Cun kan nih zong nih kan unau caah kan nunnâk kan pêk ve awk a si. 17Asinain mi zei pauh nih vawlei thilṭha ngeiin, a unau chambau in hmu sehlaw, a zângfah lo ahcun, zeitindah a chungah Pathian dawtnâk a hmunmi a si khawh lai? 18Ka nau le hna, lei le bia lawngin i daw loin tuahnâk le biatak in i daw u sih. 19Hitihin biatak ta kan si kha kan hngalh, a hmaiah lungdai te i kan um khawhnâk ah hin. 20Zeitintiah kan lung nih thiamlo a kan coh ahcun, Pathian cu kan lungthin nâk in a ngan deuh i zeizong vialte hngaltu a si. 21Dawtmi hna kan lungthin nih sual akan phawt lo ahcun, Pathian hmai ah kan ral a ṭha. 22Cun kan halmi kip kha a sinin kan hmuh, zeicatiah a nawlpêkmi kan zulh i a mit hmuh ah a lawmhnâk thil kha kan tuah caah a si. 23A nawlpêkmi cu hihi a si, a Fapa Jesuh Krih min zumh i nawl a kan pêk bangin pakhat le pakhat kan i dawtmi hi. 24A nawlpêk a zultu cu Amah ah a hmun i Amah zong a chungah a hmun ve. Amah kan sinah a hmun tiah kan hngalh khawhnâk cu Thlarau a kan pêkmi ah hin a si.
Currently Selected:
1JOHAN 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
