1CO 9
9
1Lamkaltu ka si lo maw? Miluat ka si lo maw? Kan Bawipa Jesuh zong ka hmu cang lo maw? Nannih hna hi Bawipa rian ka ṭuanmi theitlai nan si lo maw? 2Midang caah lamkaltu ka silo hmanh ah, elkhawh lo in nan caah cun ka si ko. Zeitintiah nanmah hi Bawipa lamkaltu ka si hmelchunhnâk cu nan si. 3Sual aka puhtu sinah kâ kilvennâk cu hitihin a si. 4Ei le ding dingin nawl kan ngei lo maw? 5Lamkaltu dang, Bawipa unau le Peter bantukin khualtlawnnâk ah zumtu nupi hruainâk nawl kan ngei ve lo maw? 6Asiloah Barnabas le kei kan pahnih zong nih rianṭuan ngoltâk dingin zalonnâk kan ngei ve lo maw? 7Ahodah raldohnâk i kalpah in amah le amah â cawm bal? Ahodah a theitlai ei ṭung lo in misur dûm a tuah bal? Asiloah ahodah a hnûk ding lo in saṭil run a zohkhenh bal? 8Hi kong hi minung phung menmen i chim ka si maw? Nawlbia zong nih hihi a chim ve lo maw? 9Moses nawlbia cauk ah, “Cawtûm nih facang a cil lio ah a hmur ṭêm hlah,’ tiah ṭial a si. Pathian nih cawtûm kong lawng maw a ruah? 10Asiloah kanmah kong dah a chim? Zeitintiah kanmah kong i ṭialmi a si. Lei thuangmi nih ruahchannâk ngei in lei a thuan awk a si i facang cîltu zong nih comi ngeih lai ruahchannâk he a cîl tawn. 11Kannih nih thlarau lei thil nan sinah kan tuh i nan sinin vawlei thil kan zûn ah hin thil ngan ngai a si hnga maw? 12Midang zong nih nan sinah nawlngeihnâk an co ahcun kannih zong co chin chin awk kan si ko. Asinain kannih nih, cu nawlngeihnâk cu kan hmang ve lo. Krih thawngṭha kan phenh sual nâkhnga lo zeithil pauh hi kan in ko. 13Ṭempal i thil thianghlim cung i rianṭuantu hna nih cu thil hna ei cu an caah a thiang i biakṭheng cung i rianṭuantu hna zong nih biakṭheng cung i pekchanhmi cu an ei tawn ti kha nan hngal lo maw? 14Cubantuk in thawngṭha chimtu hna nih thawngṭha bia in ei an hmuh awk a si, ti cu Bawipa nawlpêkmi a si. 15Asinain keitu nih cun cucu pakhat hmanh ka hmang hlei lo. Ka cung i nan tuah awkah ka ṭialmi zong a si lo. Kâ porhlawt pimi hi zeihmanhlo i an canternâk cha cun thih hmanh ka duh deuh. 16Zeitintiah thawngṭhabia hi chimhmanh ninglaw porhlawt ding zeihmanh ka ngei lo. Tuahlo khawhlo in ka cungah khinhmi a si. Thawngṭha hi chim hlah ning law aka chiat lai. 17Zeitintiah mah duhnâk i tuahmi ka si ahcun ṭuanman ka ngei hnga. mahduhnâk i tuah ka si lo ahcun, thawngṭha zohkhenhnâk rian hi a thiah i thiahmi ka si, tinâk a si. 18Ka ṭuanman cu zeidah a si? Hlawhhlâm um lo in man loin thawngṭha ka chimmi hi a si. Keimah hlawknâk ca i thawngṭha i ka nawl ngeihnâk ka hman lomi hi a si. 19Zeitintiah mi vialte sinin zalonâk ka ngei nain, mi tampi ka tei khawh nâkhnga mi vialte sinum ah kâ tuah, 20Judah mi ka tei khawhnâk hnga Judah milakah Judah mi bangin ka um tawn. Nawlbia tang i a ummi hna ka tei khawh nâkhnga nawlbia tang i a ummi bantukin ka um tawn. 21nawlbai ngeilo mi ka tei khawh nâkhnga, nawlbia ngei lomi bangin ka um tawn (Pathian nawlbia buarlo le Krih nawlbia tangah um buin) 22zângdermi ka lak khawh nâkhnga zângdermi sinah, zângdermi bangin ka um. Lam pakhat khat in micheu khat ka khamhkhawh nâkhnga mi vialte sinah zeizong vialte ah kâ cang tawn. 23Nanmah he covo kangeih khawh nâkhnga hihi thawngṭha ruangah ka tuahmi a si. 24Tlik â zuammi cu an dihlak in an tli na in, an lakah pakhat te lawng nih laksawng a hmuh tawn ti kha nan hngal lo maw? Nan co khawh nâkhnga tli ve tuah u. 25Cun laksawng hmuh â timmi hna cu zeizong vialte ah â sum tawn. Annih nih a rawk khomi luchin hmuh awkah an i zuam i kannih nih a rawk kho lomi luchin hmuh awkah kan i zuam. 26Cucaah ka phanhnâk ding hngalcia in dah kaw ka tlik. Kâ thongh tik ah, thlitu men ka thongh lo. 27Ka pum hi ka uk i ka nawl tangah ka chiah, culoahcun, midang sin i ka aupi hnu hmanh ah keimah hmanh hi laksawng hmuhawk tlâk loin ka um sual lai.
Currently Selected:
1CO 9: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
