1CO 10
10
1Ule nau hna hihi nan hngalh lo ka duh lo, a kan hringtu vialte kha minmei tangah an um dih i an dihlak in rili zong an tan dih, 2an dihlak in Moses ah minmei le rili ah Baptisma an in dih, 3an dihlak in thlarau lei rawl an ei dih i 4an dihlakin thlarau lei dinawk hmunkhat ah an din dih. Anmah zultu thlarau lei lungpi chungin an din cio i cu lungpi cu Krih a si. 5Asinain an lak i mi tamdeuh cungah Pathian lung a tling lo i ramcar ah khan an thi dih. 6Cu thil hna cu kan caah zohchunhawk a si, sualnâk tuah an duh bang i kan duh ve nâkhnga lo. 7Anlakah cheukhat milem an biak bangin bia ve hlah u sih. “Mizapi hna cu ei le ding dingin an ṭhu i nomhhnaihnâk tuah awkah an tho,” tiah ṭialmi bangin. 8Anlakah cheukhat nupa sualnâk ah an tlu i nikhat ah mi 23000 an thih bang khan nupa sualnâk tuah hlah u sih. 9Anlakah cheukhat nih Krih an hneksak i rul hmang i hrawh an si bangkhan hniksak ve hlah u sih, 10asiloah anlakah cheukhat an phunzai i hrawktu hrawh i an um bangkhan phunzai hlah u sih. 11Cuthil hna cu i zohchunh awkah an cungah a tlungmi a si i cân hmadung phâk lainâk i a kan chimhringtu dingah an ṭialmi a si. 12Cucaah fek tein ka dir ko a timi kha i ralring seh, culoahcun a tlu sual lai. 13Minih anton tawnmi tukforhnâk dah tilo cu tukforhnâk nan cungah a tlung lai lo. Pathian cu zumhtlâk a si. Nan tuar khawh lengin tukforhnâk nan cungah tlunter a siang lai lo. Nan tuar khawh nâkhnga tukforhnâk chungin himnâk lam an ser piak hna lai. 14Cucaah ka dawtmi hna, milem biak hi zâmtâk u. 15Mifim sin i chimbangin ka chim. Ka chimmi hi nanmah te in rakruat ve u. 16Thluachuahnâk hrai, thlua kan chuah tawnmi hi, Krih thisen hrawmpinâk a si lo maw? Changreu kan cheumi zong hi Krih taksa hrawmpinâk a si lo maw? 17Zeitintiah kannih hi tampi kan si nain, changreu tlangkhat, taksa pumkhat kan si. Changreu tlangkhat chungin kan co cio mi a si. 18Isreal mi hna hi zoh hna hmanh u. Raithawinâk sa eitu hna nih biakṭheng cu an i hrawm lo maw? 19Chim ka timhmi hi zeidah a si? Milem kha maw biapi, asiloah milem sinah pêkmi thil hna dah? 20Ka chim duhmi cu, Gentel mi hna raithawinâk cu Pathian sinah si loin khuachia sinah a si, timi hi. Cucaah nannih cu khuachia he nan i komh hi kan duh piak hna lo. 21Bawipa hrai le khuachia hrai nan ding`i kho lai lo. Bawipa cabuai ta le khuachia cabuai ta zong nan eiṭi kho lai lo. 22Asiloah Bawipa a hnah kan chuahter lai maw? Amahnâk in kan ṭhawng deuh maw? 23Thil vialte ka caah a thiang nain, santlaimi an si dih theng lo. Thil vialte ka caah an thiang dih nain ka caah ṭhatnâk an si dih theng lo. 24Mikip nih mah zawn lawng ruat loin midang ca ṭhatnâk ding kha an ruah deuh awk a si. 25Chawdawr i an zuarmi sa pauh cu chiaṭha hngalhnâk i dot-hlat theng lo in ei ko u, 26zeitintiah vawlei le a chung i a ummi vialte hi BAWIPA ta an si. 27Zumlotu nih rawl ei an in sawm i kal naduh ahcun chiaṭha hngalhnâk ruangah dot-hlat theng lo in an in pêkmi pauh cu ei ko. 28Asinain nan sinah, “Hihi raithawinâk i pêkmi a si tiah an ti ahcun, an chimtu hna le chiaṭha hngalhnâk ruangah khan ei hlah u. “Vawlei le a chung i a ummi vialte hi BAWIPA ta a si. 29Chiaṭha hngalhnâk timi hi nangmah leiah si loin midang chiaṭha hngalhnâk kha ka ti duhmi cu a si. Midang chiaṭha hngalhnâk nih ka zallonnâk cungah zeiruangahdah nawl a ngeih khawh lai? 30Lunglawm tein lawmhnâk bia zong ka chim i ka eimi kongah maw chimchiat ka ton lai? 31Cucaah nan ei ah siseh, nan dinah siseh, nan tuahmi kipah Pathian sunparnâk ding lawng teah tuah u. 32Judah siseh, Grik siseh, Pathian kawhhran siseh, an tluknâk dingah zeihmanh tuah hlah u, 33kei zong nih kaca miaknâk ding lawng ka kawl ballo. Mi tampi nih an santlaih pi i khamh an si khawh nâkhnga, zeizong vialte ah mi vialte lunglawmhter in kan um tawn.
Currently Selected:
1CO 10: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
